অসমৰ ছয় জনগোষ্ঠীক জনজাতিৰ মৰ্যাদা প্ৰদান কৰাৰ চৰকাৰী প্ৰচেষ্টাৰ বিৰোধিতাৰে সোমবাৰে সোণাপুৰত উত্তাল প্ৰতিবাদ সাব্যস্ত কৰে ৰাজ্যৰ বিভিন্ন প্ৰান্তৰ সহস্ৰাধিক জনজাতীয় লোকে। সদৌ অসম ট্ৰাইবেল সংঘৰ (All Assam Tribal Sangha – AATS) উদ্যোগত সোণাপুৰৰ ক্ষুদ্ৰ খেলপথাৰত অনুষ্ঠিত এই বিশাল গণ সমাৱেশত ১৪ টা জনজাতীয় সংগঠনে অংশগ্ৰহণ কৰি স্পষ্ট কৰি দিয়ে যে তেওঁলোকে কোনো কাৰণতে এই জনজাতিকৰণ মানি নলয়।
শেহতীয়াকৈ ৰাজ্য চৰকাৰে ছয় জনগোষ্ঠীৰ জনজাতিকৰণৰ ক্ষেত্ৰত গুৰুত্ব প্ৰদান কৰাৰ সময়তে বৰ্তমান অনুসূচিত জনজাতিৰ মৰ্যাদা থকা লোকসকল এনেদৰে প্ৰতিবাদমুখৰ হৈ পৰিছে।
বৰ্তমানে অনুসূচিত জনজাতিৰ মৰ্যাদা থকা এই ১৪ টা জনজাতিৰ লোকসকলে গভীৰ উদ্বেগ প্ৰকাশ কৰিছে যে, ছয় জনগোষ্ঠীক জনজাতিৰ মৰ্যাদা প্ৰদান কৰিলে পূৰ্বৰ জনজাতিসমূহৰ ভাষা, সংস্কৃতি, আৰু ঐতিহ্যৰ অস্তিত্ব বিপদাপন্ন হ‘ব পাৰে। ১৪ টা জনগোষ্ঠীৰ সংগঠনৰ নেতৃত্বই সকীয়াই দিছে যে এনে কাৰ্য কোনোপধ্যেই হ‘বলৈ দিয়া নহ‘ব।
প্ৰতিবাদকাৰীসকলে চৰকাৰক কঠোৰভাৱে সকীয়াই দিয়ে যে আগন্তুক ২৫ নৱেম্বৰৰ ভিতৰত যদি ৰাজ্যিক কেবিনেটে এই ক্ষেত্ৰত কোনো যোগাত্মক সিদ্ধান্ত গ্ৰহণ নকৰে, তেন্তে তেওঁলোকৰ আন্দোলন অধিক ক্ষীপ্ৰ আৰু ভয়ংকৰ হৈ উঠিব।
এই প্ৰতিবাদৰ পূৰ্বে জনগোষ্ঠীয় সংগঠনৰ প্ৰয়াত নেতাসকলৰ প্ৰতিচ্ছবিত পুষ্পাঞ্জলি অৰ্পণেৰে শ্ৰদ্ধাঞ্জলি জ্ঞাপন কৰা হয়। সমাৱেশত বড়ো, কাৰ্বি, তিৱা নৃত্য প্ৰদৰ্শন কৰাৰ লগতে তেওঁলোকৰ জনগোষ্ঠীয় গীত পৰিৱেশন কৰা হয়।
উল্লেখ্য যে, অসমৰ ছটা জনগোষ্ঠী—টাই-আহোম, মৰাণ, মটক, কোচ ৰাজবংশী, চুতীয়া, আৰু চাহ জনগোষ্ঠী—য়ে দীৰ্ঘদিনৰ পৰা জনজাতিকৰণৰ দাবী উত্থাপন কৰি চৰকাৰৰ ওপৰত হেঁচা প্ৰয়োগ কৰি আহিছে। ২০২৬ চনৰ বিধানসভা নিৰ্বাচনৰ পূৰ্বে এই দাবীত পুনৰ সৰৱ হৈ পৰিছে ছয় জনগোষ্ঠী।
ইফালে, শেহতীয়াকৈ মুখ্যমন্ত্ৰী হিমন্ত বিশ্ব শৰ্মাই মন্তব্য প্ৰকাশ কৰিছে যে মৰাণ, মটক, আৰু কোচ ৰাজবংশীসকলক জনজাতিকৰণ কৰাৰ ক্ষেত্ৰত বিশেষ সমস্যা নাই। তেওঁ সদৰী কৰিছিল যে এই তিনিটাৰ ক্ষেত্ৰত ট্ৰাইবেল সংঘৰ স্থিতি সহনশীল। মুখ্যমন্ত্ৰীয়ে লগতে জনাইছিল যে মন্ত্ৰী গোটে ২৫ নৱেম্বৰত বিধানসভাত এই সন্দৰ্ভত প্ৰতিবেদন দাখিল কৰিব। বৰ্তমানৰ জনজাতীয় লোক আৰু ছয় জনগোষ্ঠীৰ দাবীৰ এই সংঘাতে আগন্তুক দিনবোৰত ৰাজ্যৰ ৰাজনীতিত কি নতুন পাক লয়, সেয়া লক্ষ্যণীয় হ‘ব।
