পুনৰ হাস্পাতালত ভৰ্তি ছোনিয়া গান্ধী; এইবাৰ দিল্লীৰ গংগা ৰাম হাস্পাতালত ভৰ্তি কংগ্ৰেছ নেত্ৰী

কংগ্ৰেছ সংসদীয় দলৰ অধ্যক্ষ ছোনিয়া গান্ধীক পুনৰ চিকিৎসালয়ত ভৰ্তি কৰোৱা হৈছে। দেওবাৰে সন্ধিয়া দিল্লীৰ ছাৰ গংগা ৰাম হস্পিতালত ভৰ্তি কৰোৱা হয়। চিকিৎসালয়ৰ সূত্ৰ অনুসৰি তেওঁ গেষ্ট্ৰ’এণ্টেৰ’লজী বিভাগত চিকিৎসাধীন হৈ আছে আৰু বৰ্তমান তেওঁৰ অৱস্থা সুস্থিৰ।

চিকিৎসকে কয় যে ছোনিয়া গান্ধীৰ পেটৰ লগত জড়িত কিছুমান সমস্যাৰ সৃষ্টি হৈছে। তেওঁৰ চিকিৎসাৰ বাবে বিশেষ চিকিৎসা দল গঠন কৰা হৈছে আৰু তেওঁক তীক্ষ্ণ নজৰত ৰখা হৈছে।

উল্লেখ্য যে যোৱা ৭ জুনত শিমলাৰ ইন্দিৰা গান্ধী চিকিৎসা মহাবিদ্যালয় হাস্পতালত ছোনিয়া গান্ধীৰ এম আৰ আই স্কেন কৰা হৈছিল, কিয়নো সেইদিনা উচ্চ ৰক্তচাপ আৰু অস্বস্তিত ভুগিছিল নেত্ৰীগৰাকী। চলিত বছৰৰ ফেব্ৰুৱাৰী মাহত পেটৰ সমস্যাৰ বাবে একেখন চিকিৎসালয়তে তেওঁক ভৰ্তি কৰোৱা হৈছিল যদিও পিছদিনা ঘৰলৈ যাবলৈ দিয়া হৈছিল।

আনহাতে, ২০২২ চনৰ ছেপ্টেম্বৰ মাহত আমেৰিকালৈ চিকিৎসা ভ্ৰমণ কৰিছিল, যিটো কোভিডৰ বাবে পূৰ্বতে পিছুৱাই দিয়া হৈছিল।

কংগ্ৰেছে আনুষ্ঠানিকভাৱে জনাইছে যে তেওঁৰ অৱস্থা সুস্থিৰ আৰু এতিয়া চিন্তাৰ কোনো কাৰণ নাই। অৱশ্যে চিকিৎসা দলটোৱে সঘনে নিৰীক্ষণ কৰি আছে।