জাৰ্মানীৰ ফ্ৰেংকফৰ্টৰ পৰা হায়দৰাবাদ বিমানবন্দৰত উপস্থিত হোৱাৰ কথা আছিল লুফথানছা এয়াৰলাইন্সৰ এখন বিমান। কিন্তু টেক অফৰ কিছু সময়ৰ পিছতে ই মাজ আকাশৰ পৰা ফ্ৰেংকফৰ্টলৈ উভতি যায়। হায়দৰাবাদ বিমানবন্দৰৰ সূত্ৰ অনুসৰি বোমাতংকৰ বাবেই বিমানখন ঘূৰি গৈছে।
হায়দৰাবাদ বিমানবন্দৰৰ এজন বিষয়াই সংবাদ সংস্থাক জনাইছে যে, “বোমাতংকৰ বাবে বিমানখন ঘূৰি গৈছে। সেই সময়ত বিমানখন ভাৰতীয় আকাশমাৰ্গৰ বাহিৰত আছিল।” কিন্তু লুফথানছা এয়াৰলাইন্সে দাবী কৰে যে অৱতৰণ কৰিবলৈ অনুমতি নোপোৱাৰ বাবে বিমানখন ফ্ৰেংকফৰ্টলৈ উভতি যায়।
হায়দৰাবাদ অভিমুখী বিমানখনে দেওবাৰে স্থানীয় সময় অনুসৰি দিনৰ ২:১৫ বজাত ফ্ৰেংকফৰ্টৰ পৰা উৰা মাৰিছিল। সোমবাৰে পুৱা ৬ বজাত হায়দৰাবাদত উপস্থিত হোৱাৰ কথা আছিল। কিন্তু দেওবাৰেই ৰাজীৱ গান্ধী আন্তঃৰাষ্ট্ৰীয় বিমানবন্দৰৰ এয়াৰ ট্ৰেফিক কণ্ট্ৰ’ললৈ এটা নটিফিকেশ্যন আহে। খবৰ আহে যে এল এইচ ৭৫২ বিমানখন মাজ আকাশৰ পৰাই ফ্ৰেংকফৰ্টলৈ উভতিছে। জনা যায় যে সেইখন বয়িং ৭৮৭-৯ ড্ৰিমলাইনাৰ বিমান আছিল।
ফ্ৰেংকফৰ্ট-হায়দৰাবাদ বিমানখনৰ বাহিৰেও আন এখন আন্তঃৰাষ্ট্ৰীয় বিমান দেওবাৰে আহি ভাৰতত উপস্থিত নোহোৱাকৈ উভতি যায়। দেওবাৰে লণ্ডনৰ পৰা চেন্নাইত উপস্থিত হোৱাৰ কথা আছিল ব্ৰিটিছ এয়াৰৱেজৰ এখন বিমান। কিন্তু লণ্ডনৰ হিথ্ৰ’ বিমানবন্দৰৰ পৰা উৰণৰ পিছত মাজ আকাশতে বিমানখনৰ ফ্লেপত যান্ত্ৰিক বিজুতিৰ সৃষ্টি হয়। ইয়াৰ বাবেই ই মাজভাগতে লণ্ডনলৈ উভতি যায়।
উল্লেখ্য যে যোৱা ১২ জুনত আহমেদাবাদৰ পৰা লণ্ডন অভিমুখী এয়াৰ ইণ্ডিয়াৰ বিমান উৰণৰ কিছু সময়ৰ পাছতে দুৰ্ঘটনাগ্ৰস্ত হয়। এজনৰ বাহিৰে বিমানত থকা সকলো যাত্ৰী আৰু ক্ৰুৰ মৃত্যু হয়। বিমানখন দুৰ্ঘটনাগ্ৰস্ত হোৱা অঞ্চলতো কেইবাজনো লোকে প্ৰাণ হেৰুৱাইছে। এই পৰিস্থিতিত আন্তঃৰাষ্ট্ৰীয় পৰ্যায়ত বিমান পৰিচালনাত অতিৰিক্ত সাৱধানতা অৱলম্বন কৰা হৈছে।
