অসমত চৰকাৰৰ সলনি ছিণ্ডিকেট চলোৱাৰ গুৰুতৰ অভিযোগ তুলিছে চট্টিশগৰৰ কংগ্ৰেছৰ মুখ্যমন্ত্ৰী ভূপেশ বাঘেলে।
বৃহস্পতিবাৰে হোটেল পেলেচিওত এক সংবাদমেল সম্বোধন কৰি এই গুৰুতৰ অভিযোগ তুলি বাঘেলে আৰু কয় “গৰুৰ নামত ভোট বিচাৰি বিজেপি চৰকাৰে গৰুৰ চোৰাং বেহা চলাইছে। ২০১৬ চনত বিজেপি চৰকাৰ অসমত শাসনলৈ আহিল আৰু ২০১৮ চনত বাংলাদেশত এই মাংস ২১১ শতাংশ পৰ্যন্ত বাঢ়িল। সোণোৱাল চৰকাৰে বাৰে বাৰে অবৈধ তথা গৰুৰ চোৰাং বেহা ৰোধ কৰিবলৈ ভিন্ন সময়ত বাহিৰলৈ চালান দিয়া গৰু জব্দ কৰে যদিও সেইবোৰ কোন কোন গো শালত ৰখা হৈছে তাৰ স্পষ্টীকৰণ দিয়ক।”
দ্বিতীয়তে সোণোৱাল চৰকাৰে কয়লা ছিণ্ডিকেট চলাই যোৱা বুলি অভিযোগ তুলি বাঘেলে লগতে কয় “অবৈধ কয়লা বিক্ৰীৰ ক্ষেত্ৰত সোণোৱাল চৰকাৰে সকলো ৰেকৰ্ড ভংগ কৰিছে। সূত্ৰ অনুসৰি ৫০০ খন ট্ৰাকৰ জৰিয়তে এই ৰমৰমীয়া বেহা চলি আছে।”
আনহাতে একেখন সংবাদমেলতে বাঘেলে নিবনুৱাসকলক সোণোৱাল চৰকাৰে ক’ত চাকৰি দিলে বুলি প্ৰশ্ন কৰি আৰু কয় “তেওঁলোকে বছৰি চাৰি লাখ ষাঠি হাজাৰ নিবনুৱাক চাকৰি দিয়াৰ প্ৰতিশ্ৰুতি দিছিল। পাঁচ বছৰত অতি কমেও ২৩ লাখ নিবনুৱাই চাকৰি পাব লাগিছিল। সোণোৱাল চৰকাৰে কিমান নিবনুৱা যুৱকক চাকৰি দিছে সেয়া স্পষ্ট কৰক।”
ইপিনে, চাকৰি দিয়াৰ নামত প্ৰলোভন দি ৪ লাখ অসমীয়াৰ চাকৰি কাঢ়ি নিলে বুলি তেওঁ সংবাদমেলত গুৰুতৰ অভিযোগ তোলে।
ইপিনে, সোণোৱাল চৰকাৰৰ পতন আৰম্ভ বুলি দাবী কৰি বাঘেলে লগতে কয় “অসমৰ জনতাই বিজেপি চৰকাৰৰ চতুৰালি ভালদৰে বুজি উঠিছে। যোৱা ৫ বছৰে তেওঁলোকে চিন্তা কৰি আছে যে তেওঁলোকে কিয় বিজেপিক ভোট দিছিল।
“এইবাৰ জনতাই সেই ভুল নকৰে। কংগ্ৰেছে নিজৰ মিত্ৰজোঁটৰ জৰিয়তে বহুমত চৰকাৰ গঠন কৰিবলৈ সাজু হৈছে।” বাঘেলে দাবী কৰি কয়।