বলিউডৰ অভিনেতা ছনু সুদ আৰু তেওঁৰ সহযোগী স্বেচ্ছাসেৱকসকলে প্ৰাণৰক্ষা কৰিলে ২২ জনকৈ ক’ভিড-১৯ ৰোগীক।
মঙলবাৰে অভিনেতা আৰু তেওঁৰ সহযোগী স্বেচ্ছাসেৱকসকলে বাংগালোৰৰ এখন চিকিৎসালয়লৈ ১৬টা অক্সিজেন চিলিণ্ডাৰ যোগান ধৰে, যাৰ ফলত ২২ জন ৰোগীৰ প্ৰাণৰক্ষা পৰে।
চহৰখনৰ আৰাক হস্পিতালত (ARAK hospital) অতিশীঘ্ৰে অক্সিজেন চিলিণ্ডাৰৰ প্ৰয়োজন হোৱাত এগৰাকী আৰক্ষী বিষয়াই ছনু সুদ চেৰিটী ফাউণ্ডেচনৰ কৰ্ণাটকৰ শাখালৈ জৰুৰীকালীন যোগাযোগ কৰাৰ পাছতে অক্সিজেন চিলিণ্ডাৰসমূহ যোগান ধৰা হয়।
উল্লেখযোগ্য যে ইয়াৰ পূৰ্বে হস্পিতালখনত অক্সিজেনৰ নাটনিৰ ফলত ইতিমধ্যে দুজনকৈ ৰোগী মৃত্যুমুখত পৰিছে।
২২জনকৈ ৰোগী মৃত্যমুখৰ পৰা উদ্ধাৰ লাভ কৰাৰ পাছত তেওঁৰ ফাউণ্ডেচনৰ স্বেচ্ছাসেৱকসকলক প্ৰশংসা কৰিছে ছনু সুদে।
এটা বিবৃত্তিত তেওঁ কয় যে স্বেচ্ছাসেৱকসকলে চিকিৎসালয়খনলৈ অক্সিজেন যোগান ধৰাৰ উৰে ৰাতি প্ৰাণে পণে কষ্ট কৰিছিল।
”মই ধন্যবাদ জনাব বিচাৰো সেইসকলক, যিসকলে যোৱা ৰাতি কেইবাটাও জীৱন ৰক্ষা কৰাত সহায় কৰিলে।”- তেওঁ কয়।
উল্লেখযোগ্য যে ক’ভিডৰ দ্বিতীয় ঢৌৱে ভাৰতত হাহাকাৰৰ সৃষ্টি কৰাৰ সময়তে অভিনেতাগৰাকীয়ে ব্যক্তিগতভাৱে বিভিন্ন পদক্ষেপ হাতত লৈছে।
যোৱা বৰ্ষতো কেন্দ্ৰীয় চৰকাৰে বলৱৎ কৰা লকডাউনৰ সময়ত অভিনেতাজন সাংঘাটিকভাৱে চৰ্চিত হৈ পৰিছিল।
ইয়াৰ কাৰণ আছিল লকডাউনত সৰ্বস্বান্ত হোৱা প্ৰব্ৰজিত শ্ৰমিকসকলক নিজ নিজ গৃহ ৰাজ্যলৈ উভটাই পঠাবলৈ অভিনেতাজনে যাতায়তৰ যোগান ধৰিছিল।
তদুপৰি বহুতো শ্ৰমিকক বিকল্প জীৱিকাৰ ক্ষেত্ৰতো তেওঁ সহায় কৰিছিল।
অভিনেতাজনৰ এই ব্যতিক্ৰমী কৰ্মৰাজীয়ে দেশবাসীৰ ভূয়সী প্ৰশংসা লাভ কৰিছিল।
আনকি প্ৰব্ৰজিত শ্ৰমিকসকলে তেওঁক ‘ছেভিয়ৰ’ (ৰক্ষাকৰ্তা) হিচাপেও অভিহিত কৰিছিল।
