‘দেশ ৰজাৰ বাবে নহয়, ৰজা দেশৰ বাবে। জনপ্ৰতিনিধিসকল সমাজৰ বাবে বা দেশৰ বাবে।আস্থা আৰু বিশ্বাসেৰে জনসাধাৰণে আমাক নিৰ্বাচিত কৰি পঠিয়াইছে।‘ নিজৰ মুখ্যমন্ত্ৰী পদৰ পৰা পদত্যাগ কৰি সৰ্বানন্দ সোণোৱালে পৰামৰ্শ আগবঢ়ালে পৰৱৰ্তী মুখ্যমন্ত্ৰী হিমন্ত বিশ্ব শৰ্মাক।
ইপিনে, ‘কোভিড যুঁজত আমি জয়ী হ’ব লাগিব।‘ বুলি উল্লেখ কৰি সোণোৱালে লগতে পৰামৰ্শ দি কয় ‘পূৰ্বৰ শাসনকালত আমি নিষ্ঠাৰে কাম কৰাৰ বাবে ৰাইজে পুনৰ আস্থাত লৈ নিৰ্বাচিত কৰিছে। জনপ্ৰতিনিধি সকলে ড০ হিমন্ত বিশ্ব শৰ্মাৰ নেতৃত্বত নিষ্ঠাৰে জনসাধাৰণক সেৱা কৰিব লাগিব।‘
ইপিনে, তিনিটা দলে হিমন্ত বিশ্ব শৰ্মাক বিধায়িনী দলৰ নেতা হিচাপে নিৰ্বাচিত কৰিলে বুলি উল্লেখ কৰি সোণোৱালে ইয়াৰ বাবে বিধায়িনী দলৰ নেতাক কৃতজ্ঞতা জ্ঞাপন কৰে।
তেওঁ লগতে আশা প্ৰকাশ কৰি কয় ‘সকলোকে লগত লৈ আগন্তুক দিনত হিমন্ত বিশ্ব শৰ্মাই দৃঢ়তাৰে নেতৃত্ব দিব। মৰম চেনেহৰ জৰিয়তে ভাতৃত্ববোধ গঢ় দিব লাগিব।‘
হিমন্তলৈ সোণোৱালৰ অন্য এক পৰামৰ্শ ‘বৰাক ব্ৰহ্মপুত্ৰ, পাহাৰ-ভৈয়ামত বসবাস কৰা জনসাধাৰণক হিমন্ত বিশ্ব শৰ্মাৰ নেতৃত্বত আগুৱাই নিব লাগিব।অসমৰ ভিতৰত থকা প্ৰাকৃতিক সম্পদৰ যি সম্ভাৱনা আছে সেই শক্তিক উজ্জীৱিত কৰি এই শক্তিৰ দ্বাৰাই অসমক ভাৰতৰ ভিতৰতে সৰ্বশ্ৰেষ্ঠ আত্মনিৰ্ভৰশীল ৰাজ্য হিচাপে গঢ় দিব লাগিব।‘
সোণোৱালৰ দৃঢ় বিশ্বাস ‘আগন্তুক দিনত ড০ হিমন্ত বিশ্ব শৰ্মাই তেওঁৰ ৰাজনীতিৰ পথাৰত থকা অভিজ্ঞতাৰে কাম কৰি অসমক সৰ্বশ্ৰেষ্ঠ ৰাজ্য হিচাপে গঢ় দিয়াৰ বাবে চেষ্টা অৱ্যাহত ৰাখিব।‘
‘দুৰ্নীতিমুক্তভাৱে কাম কৰাৰ বাবেই বিজেপি চৰকাৰে ৰাইজৰ পৰা সমাদৰ বুটলিবলৈ সক্ষম হ’ল। সেয়া আগন্তুক ৫ বছৰতো বৰ্তাই ৰাখিব লাগিব।‘ সোণোৱালে লগতে হিমন্ত বিশ্ব শৰ্মাৰ লগতে বিধায়কসকলক পৰামৰ্শ দি কয়।
