জয়েৰে চেম্পিয়নছ ট্ৰফীৰ যাত্ৰা আৰম্ভ কৰিছে দক্ষিণ আফ্ৰিকাই। ৰিকলটনৰ বেটিং পৰাক্ৰমত ধৰাশায়ী আফগানিস্তান। ৰছিদ খানৰ দলক ১০৭ ৰানত পৰাস্ত কৰি কেৱল দুটা মূল্যৱান পইণ্ট ঘৰলৈ লৈ যোৱাই নহয়, তাৰ লগতে টেম্বা বাভুমাৰ দলটোৱে নেট ৰান ৰেটতো বহু আগবাঢ়ি থাকিল।
শুকুৰবাৰে কৰাচী ষ্টেডিয়ামত টছত জয়লাভ কৰি দক্ষিণ আফ্ৰিকাই প্ৰথমে বেটিং কৰাৰ সিদ্ধান্ত লয়। আৰম্ভণিতে টনি ডি জিঅৰ্ডিৰ উইকেট হেৰুৱালেও ৰায়ান ৰিকেলটনে আনটোফালে নিজৰ আধিপত্য বজাই ৰাখিছিল। বাভুমাই তেওঁক যোগ্য সংগ দিয়ে। প্ৰটিয়াছ অধিনায়কগৰাকীয়ে ৭৬টা বলত ৫৮ ৰান সংগ্ৰহ কৰে।
আনহাতে, ৰিকেলটনে ৭ চাৰি আৰু এটা ছয়ৰে নিজৰ ইনিংছটো সজাইছিল। অৱশ্যে ১০৩ ৰান সংগ্ৰহ কৰি তেওঁ আউট হয়। তাকো অদ্ভুত ধৰণেৰে। তেওঁ ৰছিদ খানৰ ডেলিভাৰীত ষ্টেপ আউট কৰি মাৰিবলৈ ওলাই আহে। কিন্তু বলটো ৰছিদৰ হাততে থাকি যায়। তেওঁ বলটো উইকেটকীপাৰৰ ফালে দলিয়াই দিলে। ৰিকলটনে জপিয়াই পৰিও ৰান আউট ৰোধ কৰিব নোৱাৰিলে।
অৱশ্যে তেতিয়ালৈকে দক্ষিণ আফ্ৰিকাৰ ইনিংছৰ ভেটি মজবুত হৈছিল। ইয়াৰ পাছত ৰাছি ভান ডেৰ ডাচেনে ৫২ আৰু আইডেন মাৰ্ক্ৰামে ৫২*) অৰ্ধশতক অৰ্জন কৰে। শেষত ৬টা উইকেট হেৰুৱাই দক্ষিণ আফ্ৰিকাৰ স্ক’ৰ ৩১৫ ৰান হয়।
গুৰবাজৰ দলটোৱে বিশাল ৰানৰ লক্ষ্য অনুসৰণ কৰি ছন্দ ধৰি ৰাখিব নোৱাৰিলে। তেওঁ ১০ ৰানত আউট হৈছিল। ৰহমত শ্বাহ (৯০)ৰ বাহিৰে কোনেও সেই ধৰণে প্ৰত্যাক্ৰমণ কৰিব পৰা নাছিল। অধিনায়ক শ্বাহিদী শূন্য ৰানতে আউট হৈ ওভতে। অভিজ্ঞ মহম্মদ নবীৰ পৰা আৰম্ভ কৰি গুলবাদিন নাইবলৈকে সকলোৱে বিফল হয়।
মাজতে এটা ক’লা মেকুৰী খেলপথাৰত সোমাই আহে আৰু খেলখন অলপ সময়ৰ বাবে বন্ধ হৈ যায়। নিউজিলেণ্ড-পাকিস্তান ট্ৰাই ছিৰিজৰ ফাইনেলতো ঠিক একেই ঘটনাই ঘটিছিল। ইয়াৰ বাহিৰে দ্বিতীয় ইনিংছত আফগান অনুৰাগীৰ মুখত হাঁহি বিৰিঙাবলৈ আন একো নাছিল। শেষত ২০৮ ৰানত তেওঁলোকৰ ইনিংছ শেষ হয়। নিয়ন্ত্ৰিত বলিঙেৰে ৩টা উইকেট দখল কৰে কাগিছ’ ৰাবাডাই। এনগিডি আৰু মুল্ডাৰে দুটাকৈ উইকেট দখল কৰে। এই মেচখনত জয়লাভ কৰি দক্ষিণ আফ্ৰিকাই অষ্ট্ৰেলিয়া আৰু ইংলেণ্ডৰ কঠিন গ্ৰুপত বহুখিনি আগবাঢ়ি থাকি।
সংক্ষিপ্ত স্কোৰঃ
দক্ষিণ আফ্ৰিকা: ৩১৫/৬ (ৰিকেলটন ১০৩, বাভুমা ৫৮, নবী ৫১/২)
আফগানিস্তানঃ ২০৮/১০ (ৰহমত ৯০, ৰাবাদা ৩৬/৩)
দক্ষিণ আফ্ৰিকাই ১০৭ ৰানত জয়লাভ কৰে।
