জয়ী হ’লেই বিশ্বকাপৰ ছেমি ফাইনেল। সোমবাৰে পুৱা ৱেষ্ট ইণ্ডিজ আৰু দক্ষিণ আফ্ৰিকাই এই মৰণপণ মেচখনত মুখামুখি হৈছিল। সেই মেচত দক্ষিণ আফ্ৰিকাই দুবাৰৰ টী-২০ বিশ্ব চেম্পিয়নক পৰাস্ত কৰিলে। কঠোৰ যুঁজৰ অন্তত দক্ষিণ আফ্ৰিকাৰ মুখত শেষ হাঁহি দেখা গ’ল। বৰ্ষাবিঘ্নিত মেচখনত ডাকৱৰ্থ-লুইছৰ নিয়মৰ অধীনত দক্ষিণ আফ্ৰিকাই তিনি উইকেটত জয়লাভ কৰে।
আইচিচি টী-২০ বিশ্বকাপ ২০২৪ আৰম্ভ হোৱাৰ পৰাই ৱেষ্ট ইণ্ডিজ আৰু দক্ষিণ আফ্ৰিকা ভাল ফৰ্মত আছিল। কিন্তু সোমবাৰে দুয়োটা দলৰ মাজত গ্ৰুপ পৰ্যায়ৰ খেলখন কাৰ্যতঃ নক আউট আছিল। কাৰণ ইতিমধ্যে ইংলেণ্ডে গ্ৰুপ ২ৰ পৰা ছেমি ফাইনেলত প্ৰৱেশ কৰিছে। আনটো দল হিচাপে কোনে ছেমি ফাইনেল খেলিব সেইটো নিৰ্ণয় কৰিবলৈ দুয়োটা দলে খেলিছিল।
দক্ষিণ আফ্ৰিকাই টছত জয়লাভ কৰি প্ৰথমে বলিং কৰাৰ সিদ্ধান্ত লয়। তাব্ৰিজ ছামছি আৰু কেশৱ মহাৰাজৰ মিতব্যয়ী বলিঙৰ সন্মুখত ৱেষ্ট ইণ্ডিজৰ ছন্দপতন ঘটে। নিৰ্ধাৰিত ২০ অভাৰৰ শেষত তেওঁলোকে ৮টা উইকেট হেৰুৱাই ১৩৫ ৰানহে সংগ্ৰহ কৰে। ৪২টা বলত সৰ্বাধিক ৫২ ৰান সংগ্ৰহ কৰে ৰষ্টন চেজে। অ’পেনাৰ কাইল মেয়াৰ্ছেও ৩৫ ৰানৰ ইনিংছ খেলে। কেৰিবিয়ানৰ তিনিটা উইকেট দখল কৰে তাব্ৰিজ ছামছিয়ে।
১৩৬ ৰানৰ লক্ষ্য খেদি দক্ষিণ আফ্ৰিকাই আৰম্ভণিতে বিপৰ্যয়ৰ সন্মুখীন হয়। আন্দ্ৰে ৰাছেলে এটা অভাৰতে দুই অ’পেনাৰৰ উইকেট দখল কৰে। ইয়াৰ পিছত বৰষুণৰ বাবে খেলখন বন্ধ কৰি দিয়া হয়। দীৰ্ঘসময় ধৰি বৰষুণৰ ফলত দক্ষিণ আফ্ৰিকাৰ ইনিংছ তিনি অভাৰলৈ হ্ৰাস কৰি ১২৪ ৰানৰ লক্ষ্য নিৰ্ধাৰণ কৰা হয়।
যদিও এটা সময়ত মেচখন আঁতৰি গৈছিল, আলঝাৰি জোচেফবাহিনীয়ে ডেথ অভাৰত দুৰ্দান্ত কামবেক কৰিছিল। কিন্তু ১৯ নং অভাৰৰ শেষৰ পৰাই মাৰ্কো জান্সেনে শীতল মস্তিষ্কৰে দলটোক পুনৰ মেচলৈ ঘুৰাই আনে। তেওঁ শেষৰ অভাৰত ছয় মাৰি দলৰ জয় নিশ্চিত কৰে। এই পৰাজয়ে দুবাৰৰ চেম্পিয়ন ৱেষ্ট ইণ্ডিজৰ টী-২০ বিশ্বকাপ অভিযানৰ অন্ত পেলালে।
