দক্ষিণ কোৰিয়াৰ ৰাষ্ট্ৰপতি পদৰ পৰা বৰ্খাস্ত হৈছে (ইমপিচমেন্ট) ইউন ছুক-য়েওলক। শনিবাৰে দেশৰ নেশ্যনেল এছেম্বলিত হোৱা ভোটদানত তেওঁক পদৰ পৰা বৰ্খাস্ত কৰাৰ সপক্ষে অধিকাংশ ভোটদান হয়। ফলত য়েওলৰ বিপদ বাঢ়িল। দক্ষিণ কোৰিয়াত সামৰিক আইন ঘোষণা কৰাৰ পিছৰে পৰা তেওঁ দেশৰ এক বৃহৎ অংশৰ পৰা প্ৰতিবাদৰ সন্মুখীন হ’বলগীয়া হৈছে।
সামৰিক আইন ঘোষণাৰ পিছৰে পৰা বিৰোধীয়ে য়েওলক পদৰ পৰা বৰ্খাস্ত কৰাৰ দাবী জনাইছে। বৰ্খাস্তৰ প্ৰস্তাৱো সংসদত আনে। যোৱা সপ্তাহত সংসদত হোৱা এক ভোটত বিৰোধীয়ে খাৰিজ কৰাৰ প্ৰস্তাৱৰ বাবে প্ৰয়োজনীয় ভোট সংগ্ৰহ কৰাত ব্যৰ্থ হয়। অৱশ্যে য়েওলক পদৰ পৰা বৰ্খাস্ত কৰাৰ প্ৰস্তাৱ পুনৰ দাখিল কৰিব বুলি জনাইছিল।
শনিবাৰৰ ভোটদানত ২০৪জন সংসদৰ সদস্যই এই প্ৰস্তাৱৰ সপক্ষে ভোটদান কৰে। ৩০০ সদস্যৰ ভিতৰত মাত্ৰ ৮৫ জন সদস্যইহে এই প্ৰস্তাৱৰ বিৰুদ্ধে ভোটদান কৰে। বাকী ১১ জনৰ ভিতৰত তিনিজন অনুপস্থিত থাকে। আন আঠজনৰ ভোট বাতিল হয় । অৰ্থাৎ তেওঁৰ দল পিপলছ পাৱাৰ পাৰ্টিৰ বহু সদস্যই য়েওলক পদৰ পৰা বৰ্খাস্ত কৰাৰ বাবে ভোট দিছিল।
লগতে পঢ়কঃ সংস্থাৰ বিৰুদ্ধে মুখ খুলি মাতিলে নেকি বিপদ! ৰহস্যৰ আৱৰ্তত ভাৰতীয় মূলৰ AI বিশেষজ্ঞৰ মৃত্যু
নেশ্যনেল এছেম্বলিত এই প্ৰস্তাৱ গৃহীত হোৱাৰ পিছতে য়েওলেক পদৰ পৰা বৰ্খাস্ত কৰা হয়। অৱশ্যে ইয়াক কাৰ্যকৰী নোহোৱালৈকে প্ৰধানমন্ত্ৰী হান ডাক-ছুৱে ভাৰপ্ৰাপ্ত ৰাষ্ট্ৰপতিৰ দায়িত্ব গ্ৰহণ কৰিব। এতিয়া য়েওলৰ ভাগ্য নিৰ্ভৰ কৰিছে সাংবিধানিক আদালতৰ ৰায়দানৰ ওপৰত। এই আদালতে য়েওলৰ অপসাৰণ বাতিল কৰা হ’ব নে নহয় তাৰ সিদ্ধান্ত ল’ব।
যোৱা ৩ ডিচেম্বৰত দেশবাসীক সম্বোধন কৰি য়েওলে কৈছিল যে তেওঁ সমগ্ৰ দেশতে সামৰিক আইন বলবৎ কৰাৰ সিদ্ধান্ত লৈছে। য়েওলে কিয় এনে সিদ্ধান্ত ল’বলগীয়া হৈছে সেই কথাও বুজাই দিয়ে। উত্তৰ কোৰিয়াৰ একনায়কত্ববাদী কিম জং উনৰ সহযোগত বিৰোধীয়ে ক্ষমতা দখল কৰাৰ পৰিকল্পনা কৰিছে বুলিও তেওঁ কয়। তেওঁ বুজাই দিয়ে যে দক্ষিণ কোৰিয়াত কমিউনিষ্ট আগ্ৰাসনৰ পৰা দেশখনক ৰক্ষা কৰিবলৈ আৰু ৰাষ্ট্ৰবিৰোধী শক্তিক নিৰ্মূল কৰিবলৈ সামৰিক আইন জাপি দিয়া হৈছে। এই আইন কাৰ্যকৰী কৰাৰ দায়িত্ব দিয়া হৈছিল দেশৰ সেনা প্ৰধান জেনেৰেল পাৰ্ক আন-ছুক। য়েওলে সামৰিক আইন জাৰি কৰি দেশৰ সকলো ৰাজনৈতিক কাৰ্যকলাপ নিষিদ্ধ কৰিব বিচাৰিছিল।
ৰাষ্ট্ৰপতিৰ ভাষণৰ পিছতে দক্ষিণ কোৰিয়াত আৰম্ভ হয় প্ৰতিবাদ। আনকি বিৰোধী, শাসকীয় দলৰ বহুতেই সামৰিক আইনৰ বিৰুদ্ধে গৈছিল। সেই দেশৰ সংসদৰ বিৰোধী সদস্যসকলে নেশ্যনেল এছেম্বলি ভৱনলৈ গৈ প্ৰতিবাদ কৰিবলৈ আৰম্ভ কৰে। হাজাৰ হাজাৰ লোকৰ সমাগম হোৱাত বিধানসভা ভৱন চৌহদ বিশৃংখল হৈ পৰিল। প্ৰতিবাদকাৰী আৰু আৰক্ষীৰ মাজত সংঘৰ্ষ আৰম্ভ হয়। পিছত পৰিস্থিতি ইমানেই বেয়া হৈ পৰে যে দক্ষিণ কোৰিয়াৰ ৰাষ্ট্ৰপতিয়ে সামৰিক আইন প্ৰত্যাহাৰ কৰিবলৈ বাধ্য হয়।
লগতে পঢ়কঃ দিল্লীৰ বিদ্যালয়ত ভুৱা বোমাৰ ভাবুকি স্কুলীয়া ছাত্ৰৰ; স্তম্ভিত তদন্তকাৰী দল
কিন্তু প্ৰত্যাহাৰৰ পিছতো য়েওলৰ বিৰুদ্ধে ক্ষোভ কমি যোৱা নাছিল। দেশৰ বিভিন্ন প্ৰান্তৰ পৰা ৰাষ্ট্ৰপতিগৰাকীক পদৰ পৰা বৰ্খাস্ত কৰাৰ দাবী উত্থাপন হৈছে। শনিবাৰে সংসদত ভোটদান প্ৰক্ৰিয়া চলি থকাৰ সময়তে বাহিৰত বহু লোক সমবেত হয়। হাতত পোষ্টাৰ লৈ প্ৰতিবাদ কৰে। ৰাষ্ট্ৰপতিগৰাকীক পদৰ পৰা বৰ্খাস্ত কৰাৰ দাবীত সকলোৱে শ্লোগান দিবলৈ আৰম্ভ কৰে।
