মঙলবাৰে দক্ষিণ কোৰিয়াৰ ৰাষ্ট্ৰপতি ইউন ছুক-য়েওলে দেশখনত জৰুৰীকালীন অৱস্থা ঘোষণা কৰি সামৰিক আইন জাৰি কৰে। মঙলবাৰে দেশবাসীক টেলিভিছনযোগে দিয়া ভাষণত তেওঁ এই কথা ঘোষণা কৰে।
তেওঁ কয়, “উদাৰবাদী দক্ষিণ কোৰিয়াক উত্তৰ কোৰিয়াৰ কমিউনিষ্ট শক্তিৰ ভাবুকিৰ পৰা ৰক্ষা কৰিবলৈ আৰু ৰাষ্ট্ৰ বিৰোধী উপাদানক নিৰ্মূল কৰিবলৈ মই জৰুৰীকালীন সামৰিক আইন ঘোষণা কৰিছো।”
দেশবাসীক তেওঁ কয় যে, জনতাৰ স্বাৰ্থৰ প্ৰতি কোনো গুৰুত্ব নিদিয়া বিৰোধী শক্তিসমূহে কেৱল নিজৰ নেতাসকলক অভিযোগনামা, বিশেষ তদন্ত আৰু গোচৰৰ পৰা ৰক্ষা কৰিবলৈ শাসন ব্যৱস্থাক পংগু কৰি পেলাইছে।
ৰাষ্ট্ৰপতিগৰাকীয়ে লগতে কয় যে আমাৰ সংসদ এতিয়া অপৰাধীৰ আশ্ৰয়স্থল হৈ পৰিছে। আমাৰ উদাৰ গণতান্ত্ৰিক ব্যৱস্থাটোক উফৰাই পেলাবলৈ চেষ্টা কৰাৰ ফলত দেশখন স্বৈৰাচাৰী ৰাষ্ট্ৰত পৰিণত হৈছে। ড্ৰাগছ অপৰাধৰ বিৰুদ্ধে যুঁজ দিয়া, জনসাধাৰণৰ সুৰক্ষা বজাই ৰখাৰ দৰে গুৰুত্বপূৰ্ণ খণ্ডৰ বাজেট কৰ্তন কৰি দেশখনক ড্ৰাগছ অভয়াৰণ্য আৰু জনসাধাৰণৰ নিৰাপত্তাহীনতাৰ অৱস্থালৈ ৰূপান্তৰিত কৰা হৈছে।
ইউনে বিৰোধীক “ৰাষ্ট্ৰ বিৰোধী শক্তি” বুলি অভিহিত কৰি তেওঁলোকৰ লক্ষ্যক “শাসন ব্যৱস্থাৰ পৰিৱৰ্তন” বুলি অভিহিত কৰে। তেওঁ কয়, ৰাষ্ট্ৰবিৰোধী শক্তিক অতি সোনকালে নিৰ্মূল কৰি দেশক স্বাভাৱিক অৱস্থালৈ ঘূৰাই আনিম।
কিন্তু ইয়াৰ এদিনৰ পিছত বুধবাৰে এই আইন উঠাই লোৱাৰ কথা ঘোষণা কৰে দেশখনৰ ৰাষ্ট্ৰপতিগৰাকীয়ে। দেশখনৰ গণতান্ত্ৰিক কাঠামোৰ প্ৰতি লক্ষ্য ৰাখি এই আইন উঠাই লোৱা বুল ঘোষণা কৰে দেশখনৰ প্ৰশাসনে।
উল্লেখ্য যে দেশখনত সামৰিক শাসন বলৱৎ কৰাৰ পিছতেই আতংকিত হৈ পৰিছিল আমেৰিকাকে ধৰি দেশখনৰ মিত্ৰশক্তিসমূহ। বহুতেই এই সিদ্ধান্তক সমালোচনা কৰাৰ পিছত এই আইন উঠাই লয় ৰাষ্ট্ৰপতি ইউন ছুক-য়েওলে।
