আফ্ৰিকাৰ দক্ষিণ চুডানৰ বিমানবন্দৰত দুৰ্ঘটনাগ্ৰস্ত হয় এখন যাত্ৰীবাহী বিমান। বুধবাৰে বিমানখন দুৰ্ঘটনাগ্ৰস্ত হয় আৰু বিমানখনত ২১ জন যাত্ৰী আৰু বিমানকৰ্মী আছিল। এজনৰ বাহিৰে বাকী সকলো নিহত হৈছে।
দক্ষিণ চুডানত ৰাষ্ট্ৰসংঘৰ মিছনে জনোৱা মতে, ইউনিটি ৰাজ্যৰ তৈলক্ষেত্ৰৰ ৰাণৱেৰ পৰা ৰাজধানী জুবা অভিমুখী বিমানখন উৰণৰ কিছু সময়ৰ পিছতে দুৰ্ঘটনাগ্ৰস্ত হয়।
বিবিচিয়ে প্ৰকাশ কৰা এক প্ৰতিবেদনত দাবী কৰা হৈছে যে মৃত যাত্ৰীসকলৰ ভিতৰত এজন ভাৰতীয়ও আছে। সংবাদ সংস্থাৰ বাতৰি অনুসৰি স্থানীয় সময় দিনৰ প্ৰায় ১০:৩০ বজাত বিমানবন্দৰৰ পৰা ৫০০ মিটাৰ দূৰত্বত বিমানখন দুৰ্ঘটনাগ্ৰস্ত হয়।
দক্ষিণ চুডান চৰকাৰে বিমানখনৰ পাইলট আৰু সহ-পাইলটৰো এই দুৰ্ঘটনাত মৃত্যু হোৱা বুলি জানিবলৈ দিয়ে। বাকীবোৰ সকলো সেই তৈলখাদৰ শ্ৰমিক।
বিগত কেইবছৰত যুদ্ধবিধ্বস্ত দক্ষিণ চুডানত কেইবাখনো বিমান দুৰ্ঘটনা সংঘটিত হৈছে। ২০১৮ চনৰ ছেপ্টেম্বৰ মাহত জুবাৰ পৰা এৰ’ল চহৰলৈ যোৱা এখন যাত্ৰীবাহী বিমান দুৰ্ঘটনাগ্ৰস্ত হৈ ১৯ জন লোকৰ মৃত্যু হৈছিল। ২০১৫ চনতো জুবা বিমানবন্দৰৰ পৰা উৰা মৰা বিমান দুৰ্ঘটনাগ্ৰস্ত হৈ পাইলট আৰু ক্ৰু নিহত হয়।
