Special training for boat riders:যাত্ৰীৰ সুৰক্ষা নিশ্চিত কৰাৰ লক্ষ্যৰে পঞ্জীয়নভুক্ত বিভিন্ন ধৰণৰ নাৱৰ চালক আৰু সহায়কসকলৰ বাবে আজিৰে পৰা পাঁচ দিনীয়াকৈ ধুবুৰীত অসম আভ্যন্তৰীণ জল পৰিবহণ উন্নয়ণ সমিতিৰ উদ্যোগত তথা ধুবুৰী জিলা প্ৰশাসনৰ সহযোগত প্ৰশিক্ষণ শিবিৰ আৰম্ভ হৈছে ৷
বিশ্ববেংকৰ পূঁজিৰে পৰিচালিত অসম আভ্যন্তৰীণ জলপৰিবহণ প্ৰকল্পৰ অধীনত ধুবুৰী জিলা পুথিভঁড়াল প্ৰেক্ষাগৃহত আয়োজিত প্ৰশিক্ষণ শিবিৰটো আজি আনুষ্ঠানিকভাৱে মুকলি কৰে ধুবুৰী জিলাৰ উপায়ুক্ত অন্বামুথন এম পিয়ে৷
প্ৰশিক্ষণ কাৰ্যসূচী সন্দৰ্ভত উপায়ুক্তগৰাকীয়ে কয় যে নিমাতীঘাটৰ শোকাৱহ নাও দুৰ্ঘটনাৰ পৰৱৰ্তী সময়ত জল পৰিবহণত যাত্ৰীৰ সুৰক্ষাৰ দিশত চৰকাৰ অতিশয় সতৰ্ক হৈছে৷ ধুবুৰীতো নাৱৰ চালক আৰু সহায়কসকলক প্ৰশিক্ষণ দিয়াটো অতি জৰুৰী হৈ পৰাত এই কাৰ্যসূচী গ্ৰহণ কৰা হৈছে৷
প্ৰশিক্ষণ শিবিৰৰ উদ্বোধনী অনুষ্ঠানত ধুবুৰীৰ অতিৰিক্ত উপায়ুক্ত মানস শইকীয়াও উপস্থিত থাকে৷ তেওঁ অংশগ্ৰহণকাৰীসকলক প্ৰশিক্ষণ শিবিৰত ভাগ ললে কেনেধৰণে উপকৃত হ’ব সেই বিষয়ে বুজাই কয়৷
আজি প্ৰশিক্ষণ শিবিৰৰ প্ৰথমটো বেটছত প্ৰায় দুই শতাধিক নাৱৰীয়া আৰু সহায়কাৰীয়ে ভাগ লয়৷ তেওঁলোকক দুদিনৰ বাবে প্ৰশিক্ষণ দিয়া হ’ব৷ বুধবাৰৰ পৰা পৰৱৰ্তী বেটছৰ প্ৰশিক্ষণ আৰম্ভ হ’ব৷
Related news: অমানৱীয়! ৰুগীয়া ছাত্ৰীৰ বেংক একাউন্টৰ পৰা হেকাৰে সৰকালে হৃদয়ৱান লোকে আগবঢ়োৱা ধন
প্ৰশিক্ষণৰ অন্তত সকলোকে একোখনকৈ প্ৰমাণপত্ৰ দিয়া হ’ব৷
অৱসৰপ্ৰাপ্ত নৌ সেনা বিষয়া কমলেশ চন্দ্ৰ চৌধুৰীয়ে ভাৰ্ছুৱেল মাধ্যমেৰে নাও চালক-সহায়কসকলক প্ৰশিক্ষণ প্ৰদান কৰে৷
আভ্যন্তৰীণ জল পৰিবহণ বিভাগৰ পৰামৰ্শদাতা তথা অৱসৰপ্ৰাপ্ত নৌ সেনা বিষয়া কেপ্টেইন সৌৰভ খাউণ্ড আৰু আভ্যন্তৰীণ জল পৰিবহণ উন্নয়ন সমিতিৰ সামাজিক উন্নয়ন বিশেষজ্ঞ নবীন শৰ্মাও সমল ব্যক্তি হিচাপে উপস্থিত থাকি নাও চালক আৰু সহায়কসকলক যাত্ৰীৰ সুৰক্ষা নিশ্চিত কৰা সন্দৰ্ভত প্ৰশিক্ষণ প্ৰদান কৰে ৷
পৰৱৰ্তী দিনকেইটাতো তেওঁলোক তিনিওজনে সুৰক্ষিত ভাৱে নাও চালনা, যাত্ৰীৰ সুৰক্ষা, দুৰ্ঘটনা এৰাই চলা, একোখন নাৱত থাকিবলগীয়া নিম্নতম সা-সুবিধা আৰু সেইবোৰৰ ব্যৱহাৰ আদি বিষয়বোৰত প্ৰশিক্ষণ প্ৰদান কৰিব৷
