দেশৰ তাৰকা বক্সাৰ তথা ছয়বাৰৰ বিশ্ব চেম্পিয়ন মেৰী কমৰ নাম ক্ৰীড়া মন্ত্ৰ্যালয়ে পদ্মবিভূষণ বঁটাৰ বাবে প্ৰেৰণ কৰিছে।
দেশৰ দ্বিতীয় সৰ্বোচ্ছ অসামৰিক সন্মান পদ্মবিভূষণ বঁটাৰ বাবে প্ৰথম বাৰৰ বাবে এগৰাকী মহিলা খেলুৱৈ হিচাপে উত্তৰ-পূবৰ বক্সাৰগৰাকীৰ নাম প্ৰেৰণ কৰা হৈছে।
এই পৰ্য্যন্ত দেশৰ মাত্ৰ তিনিগৰাকী খেলুৱৈয়ে পদ্মবিভূষণ সন্মান লাভ কৰিবলৈ সক্ষম হৈছে।
পদ্মবিভূষণ সন্মান লাভ কৰা খেলুৱৈ তিনিগৰাকী হ’ল ক্ৰমে ক্ৰিকেটাৰ শচীন টেণ্ডুলকাৰ, পৰ্বতাৰোহী এডমাণ্ড হিলাৰী আৰু ডবা চেম্পিয়ন বিশ্বনাথ আনন্দ।
মেৰীকমে পদ্মবিভূষণ সন্মান লাভ কৰিলে চতুৰ্থগৰাকী খেলুৱৈত পৰিণত হ’ব।
উল্লেখযোগ্য যে, মেৰীকমে ২০০৬ চনত পদ্মশ্ৰী আৰু ২০১৩ চনত পদ্মভূষণ সন্মান লাভ কৰিছিল।
মেৰীকমৰ উপৰি দেশৰ আন ৯ গৰাকী মহিলা এথলীটৰ নাম ক্ৰীড়া মন্ত্ৰ্যালয়ে ক্ৰমে পদ্মশ্ৰী, পদ্মভূষণ আৰু পদ্মবিভূষণ সন্মানৰ বাবে প্ৰেৰণ কৰিছে।
বিশ্ব চেম্পিয়ন আৰু ৰিঅ’ অলিম্পিকৰ ৰূপৰ পদক বিজেতা পি ভি সিন্ধুৰ নাম পদ্মভূষণ সন্মানৰ বাবে প্ৰেৰণ কৰা হৈছে বুলি জানিব পৰা গৈছে।