ইছলামবাদত বোমা বিস্ফোৰণৰ পিছত পাকিস্তানত খেলি থকা শ্ৰীলংকাৰ ৮গৰাকী খেলুৱৈয়ে নিৰাপত্তাজনিত কাৰণত ঘৰলৈ উভতি যোৱাৰ সিদ্ধান্ত লৈছে। শ্ৰীলংকা ক্ৰিকেট (এছএলচি)ৰ সূত্ৰই বুধবাৰে এই তথ্য নিশ্চিত কৰে।
এই ঘটনাৰ ফলত বৃহস্পতিবাৰে ৰাৱালপিণ্ডিত অনুষ্ঠিত হ’বলগীয়া দ্বিতীয়খন এদিনীয়া বাতিল হ’ব পাৰে। মঙলবাৰে প্ৰথমখন এদিনীয়াত পাকিস্তানে ৬ ৰানত জয়লাভ কৰে। সোমবাৰে ইছলামবাদৰ এখন আদালতত সংঘটিত বোমা বিস্ফোৰণত ১২ জন লোক নিহত হোৱাৰ লগতে কেইবাজনো আহত হয়।
ইয়াৰ পূৰ্বে শ্ৰীলংকাৰ খেলুৱৈসকলে ব’ৰ্ডৰ আগত নিজৰ নিৰাপত্তাজনিত উদ্বেগ প্ৰকাশ কৰিছিল। তেওঁলোকে পাকিস্তান ভ্ৰমণ বাতিল কৰাৰ ইচ্ছা প্ৰকাশ কৰে। ইয়াৰ পিছত আঠজন খেলুৱৈয়ে পাকিস্তানৰ পৰা ঘৰলৈ উভতি যোৱাৰ সিদ্ধান্ত লয়। এই তিনিখন এদিনীয়া শৃংখলাৰ পিছত শ্ৰীলংকাৰ দলটোৱে জিম্বাবুৱে আৰু পাকিস্তানৰ সৈতে ট্ৰাই ছিৰিজ খেলাৰ কথা আছিল।
সূত্ৰই জনোৱা মতে, ৰাৱালপিণ্ডি আৰু ইছলামবাদৰ ওচৰত থকাৰ বাবে খেলুৱৈসকলে নিৰাপত্তাজনিত উদ্বেগ প্ৰকাশ কৰাৰ লগতে ঘৰলৈ উভতি অহাৰ ইচ্ছা প্ৰকাশ কৰে।
ইছলামবাদত সংঘটিত সন্ত্ৰাসবাদী আক্ৰমণৰ পিছত শ্ৰীলংকাৰ ক্ৰিকেট দলৰ নিৰাপত্তা অধিক তীব্ৰতৰ হৈ পৰে। পাকিস্তান ক্ৰিকেট ব’ৰ্ডৰ অধ্যক্ষ তথা গৃহমন্ত্ৰী মহছিন নাকভিয়ে শ্ৰীলংকাৰ দলৰ বিষয়াসকলক সাক্ষাৎ কৰি নিৰাপত্তাৰ আশ্বাস দিয়ে। অৱশ্যে খেলুৱৈসকলে এই কথাত সন্মত হোৱা নাই।
তিনি বছৰ পূৰ্বে নিউজিলেণ্ডৰ দলটোৱে ৰাৱালপিণ্ডিত হোৱা বগা বলৰ শৃংখলা শেষ মুহূৰ্তত বাতিল কৰি নিৰাপত্তাৰ ভাবুকিৰ বিশ্বাসযোগ্য তথ্য লাভ কৰি কোনো মেচ খেলা নেখেলাকৈ উভতি যায়। ২০০৯ চনত শ্ৰীলংকাৰ দলটোক আক্ৰমণ কৰা হৈছিল। ২০০৯ চনৰ মাৰ্চ মাহত গাদ্দাফি ষ্টেডিয়ামৰ সমীপত টিটিপি উগ্ৰপন্থীয়ে শ্ৰীলংকাৰ দলীয় বাছখনত আক্ৰমণ কৰিছিল, যাৰ ফলত পাকিস্তানত আন্তঃৰাষ্ট্ৰীয় ক্ৰিকেট খেল প্ৰায় ১০ বছৰ ধৰি বন্ধ হৈ পৰিছিল।
