দেশখনৰ হাজাৰ হাজাৰ লোকে দুবেলা দুমুঠি ভালদৰে খাবলৈ পোৱা নাই, বিদ্যুতৰ অভাৱত আন্ধাৰতেই যাপন কৰি গৈছে প্ৰতিটো নিশা।
ভয়ংকৰ অথনৈতিক সংকটে গ্ৰাস কৰা দ্বীপৰাষ্ট শ্ৰীলংকাত আজিও জ্বলি আছে দেশ খনৰ জনতাৰ প্ৰতিবাদৰ জুই। অৰ্থনৈতিক সংকট দূৰ কৰিব নোৱাৰাৰ বিৰুদ্ধে চৰকাৰ বিৰোধী প্ৰতিবাদে উত্তাল কৰি ৰাখিছে দেশ খনক।
এনেসময়তে মঙলবাৰে সন্ধিয়া প্ৰতিবাদকাৰীৰ ওপৰত নিৰ্বিচাৰ গুলীচালনা কৰে দেশখনৰ আৰক্ষীয়ে। আৰক্ষীৰ গুলীত এজন প্ৰতিবাদকাৰী নিহত হোৱাৰ লগতে আন ১০ জন গুৰুতৰ ভাবে আহত হয় ।
প্ৰতিবাদকাৰীসকলক ছত্ৰভংগ দিয়াবলৈ মঙলবাৰে সন্ধিয়া আৰক্ষীয়ে নিৰ্বিচাৰ গুলীচালনা কৰাৰ ফলত এজন প্ৰতিবাদকাৰী নিহত হয়। আহত ১০ জন প্ৰতিবাদকাৰীক কলম্বোৰ চিকিৎসালয়ক ভৰ্তি কৰোৱা হৈছে যদিও তেওঁলোকক পৰ্যাপ্ত পৰিমাণে দৰব যোগান ধৰিব পৰা নাই চিকিৎসালয় কৰ্তৃপক্ষই।
উল্লেখ্য শ্ৰীলংকাত জীৱনদায়িনী ঔষধৰ নাটনিৰ বাবে শ্ৰীলংকাত জৰুৰী স্বাস্থ্য অৱস্থা ঘোষণা কৰা হৈছে। এই জৰুৰী অৱস্থা কাৰ্যকৰী হৈ আছে।
দেশখনৰ ৰাজধানী কলম্বকো ধৰি অন্যান্য চহৰসমূহতো ৰাষ্ট্ৰপতি গোটাবায়াৰ পদত্যাগৰ দাবীত বিক্ষুব্ধ জনতাৰ প্ৰতিবাদ অব্যাহত আছে।
কিছুদিন পূৰ্বে দেশখনৰ ৰাষ্ট্ৰপতিৰ বাসভৱনত অগ্নিসংযোগৰ চেষ্টা চলাইছিল একাংশ ক্ষুব্ধ জনতাই ।
শ্ৰীলংকাত বৈদেশিক মুদ্ৰাৰ অভাৱত ইন্ধনৰ নাটনি দেখা দিয়াত দেশখনত পৰ্যাপ্ত বিদ্যুৎ উৎপাদন সম্ভৱ হোৱা নাই। এনে পৰিস্থিতিত দেশখনত চৰকাৰে দিনে ১০-১২ঘন্টা বিদ্যুৎ কৰ্তনৰ সিদ্ধান্ত লৈছে।
দ্বীপৰাষ্ট্ৰখনৰ চৰকাৰে এনে পৰিস্থিতিৰ পৰা পৰিত্ৰাণৰ বাবে উপায় বিচাৰি আছে।