T-20 World Cup বৃহস্পতিবাৰে আবু ঢাবিৰ শ্বেখ জায়েদ ষ্টেডিয়ামত টছত হাৰি বেংটি কৰিবলৈ নামি শ্ৰীলংকাই নিৰ্দ্ধাৰিত ২০ অভাৰত ৩টা উইকেট হেৰুৱাই ১৮৯ ৰাণৰ বৃহৎ স্ক’ৰ গঢ়ে। প্ৰত্যুত্তৰত ১৬৯ৰাণতে ইনিংছ সামৰে ৱেষ্টি ইণ্ডিজে। ফলত ২০ৰাণ বিজয়ী হয় শ্ৰীলংকা।
বিজয়ৰ লক্ষ্য লৈ বেটিং কৰিবলৈ নামি ৱেষ্ট ইণ্ডিজে আৰম্ভণিতে উজুটি খায়। দ্বিতীয় অভাৰত ফাৰ্ণাণ্ডোৰ বলত মাত্ৰ ১ ৰাণ কৰিয়েই পেভলিয়ানলৈ ওভতে ক্ৰিছ গেইল।
ইয়াৰে তিনিটা বলৰ পাছতে ফাৰ্ণাণ্ডোৰ বলতেই ৮ ৰাণ কৰি আউট হয় আনগৰাকী অপেনাৰ এভিন লুইছ। নিকোলাছ পুৰানৰ সৈতে প্ৰতিৰোধ চেষ্টা কৰিলেও সফল নহ’ল ৰ’ষ্টন চেজ।
ব্যক্তিগত ৯ৰাণত কৰুনাৰত্নেৰ বলত আউট হয় ৰ’ষ্টন। তেওঁৰ বিদায়ৰ পাছত হেটমেয়াৰক লগত লৈ পুৰানে ইনিংছ আগবঢ়াই নিয়ে যদিও নিজৰ অৰ্দ্ধশতক পূৰণ কৰিবলৈ চাৰি ৰাণ বাকী থাকোতেই উইকেট হেৰুৱাই পুৰানে।
Also Read:T-20 World Cup: ৫খন মেচত হাৰি চৰম লজ্জাজনক অভিলেখ গঢ়িলে বাংলাদেশী ক্ৰিকেট দলে
বেটিং কৰিবলৈ নামি বেছি সময় তিষ্ঠিব নোৱাৰিলে এণ্ড্ৰু ৰাছেলেও। কৰুনাৰত্নেৰ বলত ৰাছেল আউট হোৱাৰ পাছৰ অভাৰটোত হাছৰাংগাৰ বলত শূন্য ৰাণতে বিদায় লয় কিৰেন পোলাৰ্ড।
ইয়াৰ পাছত এক অভাৰ সম্পূৰ্ণ নৌহওতেই বিদায় লয় হোল্ডাৰেও। আনটো মূৰত এককভাৱে যুঁজ চলাই যোৱা হেটমেয়াৰে ৩৮বলত নিজৰ অৰ্দ্ধশতৰাণ কৰে যদিও দলক বিজয়ী কৰিবলৈ সক্ষম নহ’ল।
অৱশ্যে, হেটমেয়াৰে ৪টা ছয় আৰু ৮টা চাৰিৰে ৫৪টা বলত ৮১ৰাণৰ এক দুৰ্দান্ত ইনিংছ খেলি অন্তিম সময়লৈকে যুঁজ দি যায়।
শ্ৰীলংকাৰ হৈ ফাৰ্ণাণ্ডো, কৰুনাৰত্নে আৰু হাছৰাংগাই প্ৰত্যেকেই ২টাকৈ উইকেট দখল কৰে।
