দেওবাৰে এছিয়া কাপৰ ফাইনেলত ভাৰতীয় ক্ৰিকেট দল শ্ৰীলংকাৰ মুখামুখি হয়। এই খেলখনত ভাৰতে এক বৃহৎ ব্যৱধানত জয়লাভ কৰে। ফাইনেলত টছত জয়ী হৈ প্ৰথমে বেটিং কৰিবলৈ নামি ভাৰতীয় পেচাৰসকলৰ আক্ৰমণৰ সন্মুখত শ্ৰীলংকাই মাত্ৰ ৫০ ৰান সংগ্ৰহ কৰিয়েই অল আউট হয়। ভাৰতৰ দুই অ’পেনাৰ শুভমন গীল আৰু ঈশান কিষানে কোনো উইকেট নেহেৰুৱাকৈ ৬.১ অভাৰত জয়ৰ বাবে প্ৰয়োজনীয় ৰানখিনি সহজে সংগ্ৰহ কৰে।
কিন্তু ভাৰতৰ তাৰকা পেচাৰ মহম্মদ ছিৰাজৰ বাবেই ইমান সহজে এই জয় সম্ভৱ হৈ উঠিছিল। বিগত বছৰৰ পৰাই ফৰ্মেট নিৰ্বিশেষে ছিৰাজে নতুন বলৰ জৰিয়তে ভাৰতক আত্মবিশ্বাস প্ৰদান কৰি আহিছে। ফলত তেওঁৰ ওপৰত প্ৰত্যাশাৰ চাপো বেছি আছিল। এছিয়া কাপৰ খেলকেইখনত তেওঁৰ প্ৰদৰ্শন বৰ ভাল নাছিল। ফাইনেলৰ পূৰ্বে তিনি ইনিংছত মাত্ৰ চাৰিটা উইকেটহে লাভ কৰিছিল। তাৰে তিনিটা আহিছিল দুৰ্বল নেপালৰ বিৰুদ্ধে।
লগতে পঢ়ক: গতি বিনে গতি নাই! চিৰাজৰ গতিত চকু দিল্লী আৰক্ষীৰ; জৰিমনা বিহিব নেকি ভাৰতীয় পেচাৰক?
বহুতে হায়দৰাবাদৰ পেচাৰগৰাকীক দলৰ পৰা বাদ দি বুমৰাহৰ সৈতে অভিজ্ঞ ছামীক সুযোগ দিয়াৰ পৰামৰ্শ দিছিল। সমালোচকৰ প্ৰতিক্ৰিয়াৰ প্ৰত্যুত্তৰত ছিৰাজে ফাইনেলত ৭ অভাৰত এটা মেডেনকে ধৰি মাত্ৰ ২১ ৰাণত ৬টা উইকেট দখল কৰে। বিশ্বকাপত পেচ বলিঙৰ ক্ষেত্ৰত তেওঁৱেই ভাৰতৰ মূল আশা হ’বলৈ গৈ আছে, সেয়া যেন আকৌ এবাৰ প্ৰমাণিত হ’ল।
তেওঁৰ চমৎকাৰ প্ৰদৰ্শনত আপ্লুত হৈ পৰিছে কিংবদন্তি চলচ্চিত্ৰ পৰিচালক এছ এছ ৰাজামৌলি। বাহুবলী, আৰ আৰ আৰৰ দৰে ব্যৱসায়িকভাৱে সফল চিনেমাৰ নিৰ্মাতাগৰাকীয়ে ছিৰাজৰ বলিং চাই টুইট কৰি কয়, “এছিয়া কাপৰ ফাইনেলত আমাৰ টলিচৌকীৰ ল’ৰা ছিৰাজ মিয়াই ৬টা উইকেটেৰে উজলি উঠিছে… আৰু তেওঁৰ নিজৰ বলিঙতে বাউণ্ডেৰী ৰক্ষা কৰিবলৈ লং-অনলৈ দৌৰি মাৰিছে।”
Siraj Miyan, Our Tolichowki boy shines at the Asia Cup final with 6 wickets…👌🏽👌🏽👌🏽👏🏻👏🏻👏🏻
And has a big heart, running to long-on to stop the boundary off his own bowling… 🤗🤗🤗— rajamouli ss (@ssrajamouli) September 17, 2023
ছচিয়েল মিডিয়াত ভাইৰেল হৈছে তেওঁৰ এই টুইট। ৰাজামৌলিৰ অনুৰাগীয়ে এতিয়া ছচিয়েল মিডিয়াত অনুৰোধ জনাইছে যে তেওঁৰ পৰৱৰ্তী ছবিত চিৰাজক নায়ক হিচাপে লোৱা হয়। ভাৰতীয় ক্ৰিকেট অনুৰাগীৰ দৃষ্টিত এক নিশাৰ ভিতৰতে নায়ক হৈ পৰিছে ভাৰতীয় পেচাৰগৰাকী।
