দীৰ্ঘদিন ধৰি জনজাতিকৰণৰ দাবী উত্থাপন কৰি থকা মৰাণ, মটক, চাহ জনগোষ্ঠী তথা আদিবাসী, কোচ-ৰাজবংশী, টাই-আহোম আৰু চুতীয়া জনগোষ্ঠীক ৰাজ্যৰ বিজেপি চৰকাৰে পুনৰ প্ৰতাৰণা কৰাৰ কৌশল ৰচনা কৰিছে। এই অভিযোগ আম আদমি পাৰ্টীৰ।
দলটোৰ ৰাজ্যিক সমন্বয়ক ভবেন চৌধুৰীয়ে কয় “ছয় জনগোষ্ঠীৰ এই দীৰ্ঘদিনীয়া দাবী প্ৰতিটো নিৰ্বাচনৰ আগে আগে বিজেপি চৰকাৰৰ মনত পৰে আৰু নিৰ্বাচন গ’লেই সমস্যাটো গাপ দি থয়। বিজেপিৰ এনে চৰিত্ৰ সকলোৱে চিনি থোৱা উচিত।”
“বিজেপিয়ে ছয় জনগোষ্ঠীক জনজাতিকৰণ কৰাৰ প্ৰতিশ্ৰুতিৰে ২০১৪ ৰ লোকসভা নির্বাচন, ২০১৬ আৰু ২০২১ৰ বিধানসভা নিৰ্বাচনত শাসনলৈ আহিছিল যদিও এতিয়া এই জনগোষ্ঠীকেইটাক জনজাতিকৰণৰ পৰিবৰ্তে অন্যান্য পিছপৰা শ্ৰেণীৰ ভিতৰতে বিশেষ সুবিধা প্ৰদান কৰাৰহে প্ৰস্তাৱ চৰকাৰে দিছে।
দীর্ঘদিনীয়া দাবী, সংগ্ৰামৰ পাছত চৰকাৰৰ এন প্রস্তাৱে জনগোষ্ঠীকেইটাৰ আত্ম মর্যাদাত আঘাত কৰিছে” বুলিও মন্তব্য প্ৰকাশ কৰে ভবেন চৌধুৰীয়ে।
