‘হিন্দীৰ দাসত্ব মানি নলওঁ’, চৰকাৰী ভাষা প্ৰসংগত অমিত শ্বাহক প্ৰত্যুত্তৰ ষ্টেলিনৰ

হিন্দীক চৰকাৰী ভাষা হিচাপে গ্ৰহণ কৰিব লাগিব। এই ক্ষেত্ৰত কোনো বিৰোধিতা নচলিব। শুকুৰবাৰে চৰকাৰী ভাষাৰ সংসদীয় সমিতিৰ বৈঠকত এই দাবী কৰিছিল কেন্দ্ৰীয় গৃহমন্ত্ৰী অমিত শ্বাহে। কেন্দ্ৰীয় গৃহমন্ত্ৰীৰ এনে দাংকোপ মৰা বক্তব্যৰ বিৰোধিতা কৰি গৰ্জি উঠিল তামিলনাডুৰ মুখ্যমন্ত্ৰী এম কে ষ্টেলিন। তেওঁৰ স্পষ্ট কথা, “হিন্দীৰ দাসত্ব মানি নলওঁ”।

শুকুৰবাৰে দিল্লীত চৰকাৰী ভাষাৰ সংসদীয় সমিতিৰ ৩৮ সংখ্যক বৈঠক অনুষ্ঠিত হয়। তাত অমিত শ্বাহে কয় যে হিন্দীক বিনা বিৰোধিতাই চৰকাৰী ভাষা হিচাপে গ্ৰহণ কৰিব লাগিব। গ্ৰহণৰ গতি লেহেমীয়া হ’ব পাৰে।

সূত্ৰ অনুসৰি শ্বাহে লগতে কয় যে হিন্দীৰ আন ভাষাৰ লগত প্ৰতিযোগিতাত নাই। তেওঁ লগতে সকলো ভাৰতীয় ভাষাৰ প্ৰচাৰৰ জৰিয়তে জাতিটোক সবলীকৰণ কৰা হ’ব বুলিও তেওঁ আশ্বাস দিয়ে।

ইপিনে, তামিলনাডুৰ মুখ্যমন্ত্রীয়ে হিন্দী সন্দর্ভত অমিত শ্বাহৰ বক্তব্য খণ্ডন কৰি টুইট কৰে৷ ষ্টেলিনে লিখিছে, ‘কেন্দ্ৰীয় গৃহমন্ত্ৰী অমিত শ্বাহে হিন্দী ভাষাক জোৰ-জবৰদস্তি কৰাৰ চেষ্টাক মই তীব্ৰ গৰিহণা দিছো। এইটো অহিন্দীভাষীসকলক নিয়ন্ত্ৰণৰ এক নিকৃষ্ট প্ৰয়াস। হিন্দী আধিপত্য তথা জাপি দিয়াৰ এই ষড়যন্ত্ৰ নাকচ কৰে তামিলনাডুৱে। আমাৰ ভাষা আৰু ঐতিহ্যই আমাক সংজ্ঞায়িত কৰে। আমি হিন্দীৰ দাসত্ব মানি নলওঁ।”

I strongly denounce Union Home Minister @AmitShah's audacious push for Hindi acceptance. It's a blatant attempt to subjugate non-Hindi speakers. Tamil Nadu rejects any form of Hindi hegemony and imposition. Our language and heritage define us – we won't be enslaved by Hindi!… pic.twitter.com/gNiJ2TGtKm

— M.K.Stalin (@mkstalin) August 5, 2023

তেওঁ আন অন্যভাষী ৰাজ্যসমূহৰ ওপৰত হিন্দী ভাষা “জাপি” দিয়াৰ বিৰুদ্ধেও সৰৱ হয় তামিলনাডুৰ মুখ্যমন্ত্ৰীগৰাকী।