তিনিচুকীয়া জিলাৰ মাৰ্ঘেৰিটা মাকুম পথাৰত কালি সন্ধিয়া প্ৰায় ৬ মান বজাত সংঘটিত এক পথ দুৰ্ঘটনাত এজন বেংক কৰ্মচাৰী নিহত হোৱাৰ লগতে গুৰুতৰ ভাবে আহত হয় এজন বাইক আৰোহী। বাইক আৰোহী জনক ডিব্ৰুগড়ৰ চিকিৎসালয়লৈ প্ৰেৰণ কৰিছে।
জানিব পৰা মতে ডিগবৈ এচ বি আই বেংকত কোষাধ্যক্ষ ৰূপে কৰ্মৰত মাৰ্ঘেৰিটাৰ ৪ নং মাকুম পথাৰ নিবাসী জীৱন শইকীয়া (৫৪) নামৰ ব্যক্তিজনে সন্ধিয়া সময়ত বাছৰ পৰা নামি ৰাস্তা পাৰ হ’বলৈ লওতেই ডিগবৈ দিশৰ পৰা দুজন আৰোহী কঢ়িয়াই আহি থকা এ এচ ২৩ ৱাই ৮৩৩২ নামৰ পালচাৰ বাইক খনে তীব্ৰ জোৰেৰে খুন্দা মৰাৰ ফলত ব্যক্তিজন থিতাতে নিহত হয়।
অন্যহাতে বাইকত অহা আৰোহী এজনৰ অৱস্থা সংকট জনক হোৱাৰ হেতুকে ডিব্ৰুগড় চিকিৎসা মহাবিদ্যালয়লৈ প্ৰেৰণ কৰাৰ বিপৰীতে আনজনক মাৰ্ঘেৰিটা আৰক্ষীয়ে আটক কৰিছে।
অৱসৰ গ্ৰহণ কৰিবলৈ মাত্ৰ চাৰি বছৰ থকা মৃত ব্যক্তি গৰাকীয়ে পত্নীসহ এহাল লৰা -ছোৱালী ইহসংসাৰত এৰি থৈ যায়।
ইতিমধ্যে মাৰ্ঘেৰিটা আৰক্ষীয়ে ইউ ডি ৰ অধীনত এক গোচৰ ৰুজু কৰি মৃতদেহটো মৰণোত্তৰ পৰীক্ষাৰ বাবে প্ৰেৰণ কৰিছে।
