দেশৰ বৃহত্তম ৰাজহুৱা খণ্ডৰ বেংক ভাৰতীয় ষ্টেট বেংকে দেশৰ কোটি কোটি গ্ৰাহকৰ একাউন্টৰ বিতং তথ্য ফাদিল হৈ পৰাৰ আশংকা দূৰ কৰি কাৰিকৰী আসোঁৱাহ খিনি অঁতৰোৱা বুলি দাবী কৰিছে।
ষ্টেট বেংক অৱ ইণ্ডিয়াই এক আনুষ্ঠানিক বিবৃতিযোগে শুকুৰবাৰে জানিব দিয়ে যে ‘বেংকটোৱে ইয়াৰ সকলো গ্ৰাহককে জনাব বিচাৰে যে তেওঁলোকৰ তথ্যসমূহ নিৰাপদ তথা সুৰক্ষিত’ আৰু ষ্টেট বেংক অৱ ইণ্ডিয়া ‘সেইটো নিশ্চিত কৰাৰ ক্ষেত্ৰত সম্পূৰ্ণ দায়বদ্ধ’।
যোৱা বুধবাৰে Techcrunch নামৰ আমেৰিকা যুক্তৰাষ্ট্ৰৰ এক প্ৰতিষ্ঠানে ইয়াৰ ৱেবছাইটত প্ৰকাশ কৰা মতে এছ বি আয়ে তেওঁলোকৰ মুম্বাইৰ এক ছাৰ্ভাৰ ৰখা কেন্দ্ৰৰ অত্যন্ত স্পৰ্শকাতৰ তথ্য মজুত থকা এটা গুৰুত্বপূৰ্ণ ছাৰ্ভাৰ পাৰ্ছৱৰ্ডেৰে সুৰক্ষিত কৰি ৰাখিবলৈ পাহৰি থকাত কোটি-কোটি বেংক একাউণ্টৰ বেংক বেলেঞ্চ, বেংক একাউণ্ট নম্বৰ আদি তথ্য ফাদিল হোৱাৰ সন্দেহ কৰা হৈছিল।
আনহাতে, বেংকটোৱে বিবৃতিটোত লগতে উল্লেখ কৰিছে যে তেওঁলোকে গ্ৰাহকৰ একাউন্টৰ তথ্যপাতিসমূহ গোপনে ৰখাৰ এক পদ্ধতি অৱলম্বন কৰিছে।
ষ্টেট বেংক অৱ ইণ্ডিয়াৰ বিবৃতিটোত কোৱা মতে তেওঁলোকে ‘দ্য চাৰ্ভিচেছ অৱ টেলিকম এণ্ড এগ্ৰিগেটৰছ’ পদ্ধতি ব্যৱহাৰ কৰিছে।
‘’অনুসন্ধানত গম পোৱা গৈছে যে যোৱা ২৭ জানুৱাৰিত উদ্ভৱ হোৱা তেওঁলোকৰ পদ্ধতিত এক ছিদ্ৰ বা অৱয়ৱত ত্ৰুটি দেখা গৈছিল যিটো তাৎক্ষণিকভাৱে ঠিকঠাক কৰা হৈছে,’’-বিবৃতিটোত এইদৰে কোৱা হয়।
বেংকটোৱে লগতে সদৰী কৰিছে যে ইয়াৰ চাৰ্ভাৰটো সুৰক্ষিত হৈ আছে আৰু ইয়াৰ পৰা কোনো তথ্য পাতি ইফাল-সিফাল হোৱা নাই।
