বিতৰ্কই লগ এৰা নাই ভাৰতীয় ষ্টেট বেংকক। ইলেক্ট্ৰ’ৰেল বণ্ডৰ পৰা আৰম্ভ কৰি বিভিন্ন বদনামে আগুৰি ধৰিছে এই চৰকাৰী বেংকটোক।
এইবাৰ ঘৰ আৰু গাড়ীৰ লোণৰ সুতৰ হাৰ বৃদ্ধি কৰি গালি খোৱাৰ বাট মুকলি কৰিছে ভাৰতীয় ষ্টেট বেংকে।
১৫ জুলাই অৰ্থাৎ সোমবাৰৰ পৰা বৃদ্ধি পাইছে এছ বি আইৰ গ্ৰাহকৰ গাড়ী আৰু ঘৰৰ ঋণৰ ই এম আই। যাৰ বাবে মধ্যবিত্ত শ্ৰেণীটো স্বাভাৱিকতে অধিক হেঁচাত পৰিছে।
কালিলৈকে এছ বি আইৰ মাৰ্জিনেল কষ্ট অৱ লেণ্ডিং ৰেট বা এমচিএলআৰ ৫ বেছিছ পইণ্ট আছিল। সোমবাৰৰ পৰা চৰকাৰী বেংকটোৱে ১০ বেছিছ পইণ্ট বৃদ্ধি কৰিছে।
উল্লেখ্য যে গাড়ী, ঘৰকে ধৰি কেইবাটাও ঋণৰ সুতৰ হাৰ এই এমচিএলআৰৰ ওপৰত নিৰ্ভৰশীল। এই কাৰণেই গ্ৰাহকৰ ইএমআই বৃদ্ধি হ’বলৈ গৈ আছে।
আজি এছবিআই কৰ্তৃপক্ষই তেওঁলোকৰ ৱেবছাইটত এমচিএলআৰ বৃদ্ধিৰ কথা ঘোষণা কৰে। কোৱা হৈছে যে এতিয়াৰ পৰা তিনিমাহৰ পৰা তিনিবছৰলৈকে এমচিএলআৰৰ সুতৰ হাৰ ০.১০ শতাংশ বৃদ্ধি পাইছে। অতিৰিক্ত ইএমআই কিমান বোজা হ’ব সেয়া নিৰ্ভৰ কৰিব গ্ৰাহকৰ সুতৰ হাৰৰ ওপৰত।
