ৰাজ্যত স্বাস্থ্য বিভাগৰ তৰফৰ পৰা কাইলৈৰ পৰা এসপ্তাহৰ বাবে জাৰি কৰা হৈছে নতুন এছ অ’ পি। মঙলবাৰে স্বাস্থ্য মন্ত্ৰী কেশৱ মহন্তই সংবাদমেল যোগে প্ৰকাশ কৰে এই নতুন এছ অ’ পি।
সেই অনুসৰি, তিনিটা ভাগত বিভক্ত কৰা হৈছে এইবাৰৰ এছ অ’ পি।
নতুন এছ অ’ পিত কোভিডৰ সংক্ৰমণ বৃদ্ধি পোৱা সাতখন জিলাক সম্পুৰ্ণ ৰূপে কণ্টেইনমেণ্ট ঘোষণা কৰা হৈছে। ইয়াত সম্পূৰ্ণ লকডাউন প্ৰযোজ্য হ’ব।
সম্পুৰ্ণ কণ্টেইনমেণ্ট ঘোষণা কৰা জিলা কেইখন হৈছে ক্ৰমে- যোৰহাট, গোৱালপাৰা, গোলাঘাট, লখিমপুৰ, মৰিগাঁও, বিশ্বনাথ আৰু শোণিতপুৰ।
আনহাতে, ধুবুৰী, কামৰূপ মেট্ৰ, দক্ষিণ শালমাৰা, মাজুলী, বঙাইগাঁও, চিৰাং, ওডালগুৰি, পশ্চিম কাৰ্বি আংলং, ডিমা হাচাও, চৰাইদেউ আৰু হাইলাকান্দিত ৰাতিপুৱা ৫ বজাৰ পৰা বিয়লি ৫ বজালৈ কাৰ্ফিউ থাকিব। সেইদৰে, ৪ বজালৈ খোলা থাকিব দোকান-পোহাৰ।
কামৰূপ মহানগৰ জিলাত পুনৰ কোভিডৰ সংক্ৰমণ বৃদ্ধি পোৱাৰ পৰিপ্ৰেক্ষিতত পূৰ্বৰ নিৰ্দেশনাই বাহাল ৰখা হৈছে বুলি স্বাস্থ্য মন্ত্ৰীয়ে সংবাদ মেলত কয়।
শিৱসাগৰ, ডিব্ৰুগড়, কোকৰাঝাৰ, বজালী,বৰপেটা, নলবাৰী, দৰং, নগাঁও, হোজাই, তিনিচুকীয়া, কাৰ্বি আংলঙত দুপৰীয়া ২ বজাৰ পৰা ৰাতিপুৱা ৫ বজালৈ থাকিব কাৰ্ফিউ। দোকান পোহাৰ ১ বজাৰ ভিতৰত বন্ধ কৰিব লাগিব।
আনহাতে, পূৰ্বৰ দৰেই বন্ধ থাকিব ৰাজ্যৰ সকলো শিক্ষানুষ্ঠান।
চৰকাৰী কাৰ্য্যালয় খোলাৰ ক্ষেত্ৰত পুৰ্বৰ এছ অ’ পিৰ নিয়ম সমূহেই বাহাল থাকিব।
সম্পূৰ্ণ সান্ধ্য আইন ব্যৱস্থাৰ অধীনৰ জিলাসমূহত বিয়লি ৫.০০ বজালৈকে গেলামালৰ দোকান, শাক-পাচলিৰ দোকান আৰু ফলমূলৰ দোকান খোলা থাকিব।
পূৰ্বৰ দৰেই ৰাজ্যত আন্তঃজিলা যাতায়াত সম্পূৰ্ণ বন্ধ থাকিব।
আগৰ দৰেই জৰুৰী সেৱা, অত্যাৱশ্যকীয় সেৱাসমূহ বাধাহীনভাৱে চলি থাকিব।
সম্পূৰ্ণ সান্ধ্য আইনৰ অধীনৰ জিলাসমূহত ঔদ্যোগিক উৎপাদনমূলক কামকাজ, চাহ বাগিচাৰ নিয়মীয়া কামকাজ ক’ভিড প্ৰট’কল অনুসৰণ কৰি চলি থাকিব।
সম্পুৰ্ণ কণ্টেইনমেন্ট ৰূপে ঘোষণা কৰা জিলা কেইখনৰ বাহিৰেও বাকী জিলা সমূহত কোভিডৰ সংক্ৰমণ বৃদ্ধি পালে কণ্টেইনমেণ্ট অঞ্চল সমূহ চিনাক্ত কৰাৰ দায়িত্ব জিলা উপায়ুক্তসকলক দিয়া হৈছে।
কণ্টেইনমেণ্ট অঞ্চল সমূহত ১০০ শতাংশ টেষ্ট আৰু ভেকচিন প্ৰদান কৰা হ’ব বুলিও স্বাস্থ্য মন্ত্ৰী কেশৱ মহন্তই জনায়।
কণ্টেইনমেণ্ট জ’নত থকা পৰিয়াললৈ ২০০০ টকা মূল্যৰ খাদ্য সামগ্ৰীও আগবঢ়োৱা হব বুলি সদৰী কৰিছে স্বাস্থ্যমন্ত্ৰীয়ে।
আনহাতে, প্ৰতিগৰাকী পিতৃ-মাতৃলৈ স্বাস্থ্যমন্ত্ৰীয়ে আবেদন জনাই কয়, ‘’নিজৰ ১৮ বছৰ অনুৰ্দ্ধ সন্তানৰ সুৰক্ষাৰ স্বাৰ্থতে সাৱধানতা অৱলম্বন কৰক। জন সমাগমৰ পৰা নিজকে আঁতৰাই ৰাখক, জৰুৰী প্ৰয়োজন অবিহনে ঘৰৰ পৰা নোলাব। মাস্ক, ছেনিটাইজাৰ ব্যৱহাৰ কৰক, ন্যূনতম সামাজিক দূৰত্ব বজাই ৰাখক আৰু ক’ভিড প্ৰট’কল সম্পূৰ্ণ পালন কৰক।‘’
স্বাস্থ্য মন্ত্ৰীগৰাকীয়ে জানিবলৈ দিয়ে যে ৰাজ্যত আজিৰ দিনটোত ১৮ বছৰ অনুৰ্দ্ধ ২৮৯০টি শিশু-কিশোৰ ক’ভিড আক্ৰান্ত হৈ চিকিৎসাধীন হৈ আছে।
