মাৰাত্মক কৰ’না ভাইৰাছত আক্ৰান্ত বুলি সন্দেহ কৰা লোকক আছুতীয়াকৈ ৰাখিবৰ বাবে মহানগৰীৰ লখৰাস্থিত সৰুসজাই ষ্টেডিয়ামত নিৰ্মাণ কৰা হৈছে অস্থায়ী টেণ্ট।
৭০০ লোকক একেলগে ৰাখিব পৰাকৈ বা চিকিৎসা কৰিব পৰাকৈ নিৰ্মাণ কৰা হৈছে এই টেণ্ট।
আজি পুৱা প্ৰায় ১০ বজাত স্বাস্থ্য মন্ত্ৰী ডঃ হিমন্ত বিশ্ব শৰ্মাই পৰিদৰ্শন কৰে এই নিৰ্মাণস্থলী। অহা এসপ্তাহৰ ভিতৰত এই টেণ্ট নিৰ্মাণৰ কাম সম্পূৰ্ণ হ’ব বুলি মন্ত্ৰীগৰাকীয়ে দাবী কৰে।
লোকসকলৰ বাবে লেট্ৰিন বাথৰুম সকলো সুবিধা থাকিব আৰু এই টেণ্ট সম্পূৰ্ণ বিজ্ঞানসন্মত হ’ব বুলি সদৰী কৰে মন্ত্ৰীজনে।
প্ৰথমতে ২০০ লেট্ৰিন বাথৰুম নিৰ্মাণ কৰিব আৰু পৰৱৰ্তী পৰ্যায়ত প্ৰত্যেক ৰোগী ৰখা কক্ষত একোটাকৈ লেট্ৰিন বাথৰুম নিৰ্মাণ কৰা হ’ব বুলি মন্ত্ৰীগৰাকীয়ে জনায়।
ইপিনে সৰুসজাই ষ্টেডিয়ামৰ পাছত নেহৰু ষ্টেডিয়ামতো একেই অস্থায়ী শিবিৰ নিৰ্মাণ কৰা হ’ব।
পশ্চিমবংগ, বিহাৰ, কেৰেলা ইত্যাদি বাহিৰৰ পৰা অহা home quarantine লোকসকলক ৰখাৰ বাবে এই অস্থায়ী টেণ্ট নিৰ্মাণ কৰা হৈছে।
শ্ৰীৰামপুৰ গেটত বাহিৰৰ পৰা অহা প্ৰায় ৭০০ লোক আবদ্ধ হৈ আছে তথা গুৱাহাটীতো বহু লোক আবদ্ধ হৈ আছে বুলি মন্ত্ৰীগৰাকীয়ে সদৰী কৰে।
এইসকল লোকক এই অস্থায়ী কেম্পত ৰখা হ’ব বুলি তেওঁ জনায়।
তদুপৰি, GMCHত কেৱল কৰ’না আক্ৰান্ত লোকৰ চিকিৎসা চলিব বুলি পৰিদৰ্শন কালত সংবাদ মাধ্যমৰ আগত মন্ত্ৰী গৰাকীয়ে কয়।
চিকিৎসালয়খনত ৩০খন নতুন ICU বেডৰ ব্যৱস্থা কৰা হৈছে বুলিও তেওঁ জানিবলৈ দিয়ে।
ইপিনে মহানগৰীৰ পানবজাৰস্থিত মহেন্দ্ৰ মোহন চৌধুৰী হাস্পতালত কৰ’নাৰ চিকিৎসাৰ বাবে ১৫০খন বিছনা ইতিমধ্যে সাজু কৰা হৈছে আৰু চিকিৎসালয়খনত ১০খন আই চি ইউ বিছনা ইতিমধ্যে সাজু হোৱা বুলিও তেওঁ কয়।
তদুপৰি, সোণাপুৰত থকা জিলা হাস্পতাল কেৱল কৰ’না আক্ৰান্ত ৰোগীৰ চিকিৎসা কৰোৱাৰ বাবে সাজু কৰা হৈছে বুলি তেওঁ কয়। তাতো নতুনকৈ ১০খন ICU বেড সংযোজন কৰা হৈছে বুলি মন্ত্ৰীগৰাকীয়ে জনায়।
কামৰূপৰ শিঙিমাৰী আদৰ্শ হাস্পতাল, জালুকবাৰীৰ আয়ুৰ্বেদিক হাস্পতাল, চাবুৱাৰ টাটা ৰেফাৰেল, গুৱাহাটীৰ কালাপাহাৰ হাস্পতালত কেৱল কৰ’না আক্ৰান্ত ৰোগীক চিকিৎসা কৰোৱা হ’ব বুলি তেওঁ জনায়।
আনহাতে, কৰ’না ৰোগীৰ বাহিৰে আন ৰোগীৰ চিকিৎসাৰ দায়িত্ব ব্যক্তিগত চিকিৎসালয়ক ল’বলৈ আহ্বান জনায় স্বাস্থ্য মন্ত্ৰীগৰাকীয়ে।
