শংকৰদেৱ কলাক্ষেত্ৰৰ ড০ বাণীকান্ত কাকতি প্ৰেক্ষাগৃহত ‘আজি জনতাৰ চৰকাৰ মাই গভ অসম’ৰ উদ্যোগত তথা সাংস্কৃতিক সঞ্চালকালয়ৰ সহযোগত ‘প্ৰজ্ঞা অসম’ শীৰ্ষক এখন সদৌ অসম ভিত্তিক এক কুইজ প্ৰতিযোগিতা অনুষ্ঠিত হয়।
অহা ২ ডিচেম্বৰত অনুষ্ঠিত হ’ব লগীয়া ‘অসম দিৱস’ৰ সৈতে সংগতি ৰাখি উক্ত কুইজ প্ৰতিযোগিতাখন অনুষ্ঠিত কৰা হৈছে। উল্লেখযোগ্য যে স্বৰ্গদেউ চাওলুং ছ্যুকাফাৰ সোঁৱৰণত প্ৰতি বছৰে ২ ডিচেম্বৰৰ দিনটো ৰাজ্যত ‘অসম দিৱস’ হিচাপে পালন কৰি অহা হৈছে।
উচ্চতৰ মাধ্যমিকৰ পৰা স্নাতকোত্তৰ পৰ্যায়লৈ অনুষ্ঠিত হোৱা তথা কুইজ মাষ্টাৰ ধীৰাজ কুমাৰ শৰ্মাই পৰিচালনা কৰা আজিৰ এই প্ৰতিযোগিতাত অসমৰ বিভিন্ন প্ৰান্তৰ পৰা অহা প্ৰতিযোগীয়ে অংশগ্ৰহণ কৰে।
প্ৰতিযোগিতাত প্ৰথম স্থান লাভ কৰা গুৱাহাটী বিশ্ববিদ্যালয়ৰ ৰুবুল কলিতা আৰু নলবাৰী মহাবিদ্যালয়ৰ ভূপাল শৰ্মাৰ দলক নগদ ১০,০০০ টকা, দ্বিতীয় স্থান লাভ কৰা কটন বিশ্ববিদ্যালয়ৰ অংকুৰজ্যোতি শৰ্মা আৰু ৰক্তিম ৰঞ্জন বৈশ্যৰ দলক ৭,০০০ টকা আৰু তৃতীয় স্থান লাভ কৰা কটন বিশ্ববিদ্যালয়ৰ মাধূৰ্য গোস্বামী আৰু ত্ৰিদিৱ ভাগৱতীৰ দলক ৫,০০০ টকাৰ নগদ ধন আগবঢ়োৱা হয়।
নগদ ধনৰ উপৰি উক্ত বিজয়ী দলকেইটাৰ প্ৰতি গৰাকীকে দিয়া হয় একোখনকৈ প্ৰশংসা পত্ৰ আৰু কিতাপৰ টোপোলা।