দীৰ্ঘদিন ধৰি চিৰিয়াখানাৰ সুৰক্ষাৰ বাবে মাত মাতি অহা চিৰিয়াখানা সুৰক্ষা মঞ্চই শনিবাৰে পুৱা ১১ বজাত বনমন্ত্ৰী পৰিমল শুক্লবৈদ্যক সাক্ষাৎ কৰি পুনৰ বাৰ আলোচনাত বহে।
উল্লেখযোগ্য যে যোৱা ২৯ মে’ৰ দিনা চিৰিয়াখানা সুৰক্ষা মঞ্চই বনমন্ত্ৰীগৰাকীৰ সৈতে আলোচনাত মিলিত হৈছিল। কিন্তু তেওঁ চিৰিয়াখানাখনৰ উন্নয়নৰ বাবে বিশেষ ভুমিকা গ্ৰহণ নকৰাৰ বাবে শনিবাৰে পুনৰবাৰ সুৰক্ষা মঞ্চই মন্ত্ৰীগৰাকীক সাক্ষাৎ কৰে।
আনহাতে, সাক্ষাতৰ সময়ত মন্ত্ৰীগৰাকীয়ে নিজ মুখে তেওঁ একপ্ৰকাৰে নিৰুপায় বুলি স্বীকাৰ কৰা বুলি ৰাজকুমাৰ বৈশ্যই নৰ্থ ইষ্ট নাওৰ আগত জানিবলৈ দিয়ে। তেওঁ লগতে কয়, ‘মন্ত্ৰীগৰাকীয়ে নিজৰ মুখেৰে চিৰিয়াখানাত চলি থকা আমোলাৰ বেহুটো ভেদ কৰিব পৰা নাই।‘
তদুপৰি, বিগত আঢ়ৈ মাহৰ ভিতৰত হৰিণাকে ধৰি অন্য প্ৰায় ত্ৰিশটা জন্তু মৃত্যুমুখত পৰিল বুলি জানিবলৈ দি বৈশ্যই কয়, ‘দুৰ্নীতিত অভিযুক্ত চিৰিয়াখানা কৰ্তৃপক্ষৰ চাৰিজনৰ নাম দিয়া হৈছিল যদিও তেওঁলোকৰ বিৰুদ্ধে বন মন্ত্ৰীগৰাকীয়ে কোনোধৰণৰ ব্যৱস্থা নোলোৱাৰ বাবে তেওঁলোকৰ উৎপাত বৃদ্ধি পাইছে।‘
তেওঁ লগতে কয়, ‘মন্ত্ৰীৰ লগত আলোচনা কৰি তেওঁলোকে নিজৰ সময়খিনি অপব্যয়হে কৰিছে। এটা দুষ্ট চক্ৰই চিৰিয়াখানাখন ধ্বংসৰ বাবে গা কৰি উঠিছে। তেনে অৱস্থাত মন্ত্ৰী গৰাকী যদি নিৰুপায় হয়, তেন্তে তেওঁ পদত্যাগ কৰিব লাগে।‘
অহা ১৯ আগষ্টৰ পৰা পুনৰ চিৰিয়াখানা সুৰক্ষা মঞ্চই চিৰিয়াখানাত সংঘটিত হৈ অহা দুৰ্নীতিৰ বিৰুদ্ধে ধাৰাবাহিকভাৱে উত্তাল প্ৰতিবাদ সাব্যস্ত কৰিব বুলিও নৰ্থ ইষ্ট নাওক জানিবলৈ দিয়ে।
উল্লেখ্য যে যোৱা ২৯ মে’ৰ দিনা হোৱা আলোচনাৰ সময়তে বনমন্ত্ৰীগৰাকীয়ে জীৱ-জন্তুৰ স্বাস্থ্য পৰীক্ষা কৰোৱাৰ ব্যৱস্থা অনতিপলমে কৰা হ’ব আৰু চিৰিয়াখানাৰ চিকিৎসালয়খন উন্নত কৰোৱা হ’ব বুলি প্ৰতিশ্ৰুতি দিয়াৰ উপৰিও চিৰিয়াখানাত চলি থকা দুৰ্নীতিৰ বিৰুদ্ধে তৎকালীনভাৱে উচ্চ পৰ্য্যায়ৰ তদন্ত দিয়া হ’ব বুলি ঘোষণা কৰিছিল।
তাৎপৰ্য্যপূৰ্ণভাৱে শনিবাৰে আলোচনাৰ বাবে যোৱা চিৰিয়াখানাৰ সঁজাতি দলটোকো সেই একেখিনি আশ্বাস প্ৰদান কৰিয়ে ক্ষান্ত থাকে বুলি ৰাজকুমাৰ বৈশ্যই নৰ্থ ইষ্ট নাওৰ আগত জানিবলৈ দিয়ে।
উল্লেখযোগ্য যে ‘চিৰিয়াখানা সুৰক্ষা মঞ্চ’ই চিৰিয়াখানাৰ ভিতৰত চিৰিয়াখানাৰ দায়িত্বত থকা লোকে শ শ হৰিণ ভক্ষণ কৰাকে ধৰি আন কেতবোৰ দুৰ্নীতিৰ বিৰুদ্ধে দীৰ্ঘদিন ধৰি মাত মাতি আহিছিল। এই অভিযোগৰ সত্যতা অনুধাৱন কৰিয়ে বৰ্তমানৰ বন মন্ত্ৰী পৰিমল শুক্লবৈদ্যই নিজেই এই বিষয়ে বিস্তৃতভাৱে চিৰিয়াখানা সুৰক্ষা মঞ্চৰ সৈতে আলোচনা কৰিবৰ বাবে যোৱা ২৯ মে’ৰ দিনা আমন্ত্ৰণ জনাইছিল।
