তামুলপুৰ মহকুমাৰ নাগ্ৰীজুলি আৰক্ষী চকীৰ অন্তৰ্গত ২ নং বগৰীখুটিত বাল্টি নৈৰ বুকুত সোমবাৰে ৰাতিপুৱা স্থানীয় ৰাইজে এখন দুচকীয়া বাহন পুতি থোৱা অৱস্থাত প্ৰত্যক্ষ কৰে।
স্থানীয় ৰাইজৰ খবৰৰ ভিত্তিত ঘটনাস্থলীত নাগ্ৰীজুলি আৰক্ষী চকীৰ ভাৰপ্ৰাপ্ত বিষয়া ৰঞ্জন দাসৰ নেতৃত্বত এটা দল উপস্থিত হৈ এ এছ ০২ ডি এফ-০৪৩৩ নম্বৰৰ এখন ৰয়েল এনফিল্ড বাইক উদ্ধাৰ কৰে।
উল্লেখযোগ্য যে, ২১ ছেপ্টেম্বৰৰ নিশা তামুলপুৰ আৰক্ষী থানাৰ অন্তৰ্গত আনন্দবজাৰ গাঁৱৰ প্ৰণৱজ্যোতি মেধি নামৰ এজন যুৱকে তেওঁৰ নিজ ঘৰৰ চৌহদৰ পৰা এ এছ ০২ ডি এফ-০৪৩৩ নম্বৰৰ এখন বাইক চুৰি হোৱা বুলি এখন এজাহাৰ দাখিল কৰিছিল।
আনহাতে, তামুলপুৰ আৰক্ষীয়ে প্ৰণৱজ্যোতি গগৈৰ এজাহাৰৰ ভিত্তিত উদ্ধাৰ হোৱা দুচকীয়া বাহনখন সন্দৰ্ভত তেওঁক খবৰ দিয়ে।
আৰক্ষীৰ খবৰৰ অনুসৰি মেধিয়ে নাগ্ৰীজুলি আৰক্ষী চকীত উপস্থিত হৈ উদ্ধাৰ হোৱা দুচকীয়া বাহনখন তেওঁৰে চুৰি হোৱা বাহনখন বুলি চিনাক্ত কৰে।
তামুলপুৰ আৰক্ষী আৰু নাগ্ৰীজুলি আৰক্ষীয়ে ইতিমধ্যে ঘটনা সন্দৰ্ভত তদন্ত অব্যাহত ৰাখিছে।
বাগছা জিলাৰ তামুলপুৰ মহকুমাত বিগত কিছু সময়ৰ পৰা বাইক চুৰিৰ ঘটনা ক্ৰমাগতভাৱে বৃদ্ধি পাই আহিছে।