অসম তথা ভাৰতবৰ্ষৰ সাম্প্ৰতিক পৰিস্থিতি দেখি আমি বাৰুকৈয়ে উদ্বিগ্ন হৈ পৰিছো । দিল্লীৰ সাম্প্ৰদায়িক সংঘৰ্ষই আমাৰ লগতে কোটি কোটি বিশ্ববাসীৰ হৃদয় জোকাৰি গৈছে । মোদী নেতৃত্বাধীন কেন্দ্ৰীয় চৰকাৰৰ ‘CAA-NRC-NPR’ সম্পৰ্কীয় পদক্ষেপ তথা আন আন বৈষম্যমূলক কাম-কাজে বিশ্বৰ সুধী সমাজৰ সন্মুখত ভাৰতবাসীক লজ্জানত কৰিছে।
বিজেপি নেতৃত্বাধীন অসম চৰকাৰেও অনুৰূপ কার্যনীতি গ্ৰহণ কৰি অসমৰ ভৱিষ্যতৰ প্ৰতি সংকট নমাই আনিছে । ‘কা’ৰে অসম চুক্তিক উলংঘা কৰি বৃহত্তৰ অসমীয়া জাতিৰ অস্তিত্ব বিপদাপন্ন কৰি তুলিছে । সেয়ে অসমৰ সচেতন ৰাইজে চৰকাৰৰ এই গণবিৰোধী, অসমবিৰোধী নীতিৰ বিৰুদ্ধে সবল প্ৰতিবাদ সাব্যস্ত কৰি আহিছে ।
কিন্তু গণতান্ত্ৰিক প্ৰক্ৰিয়াৰে নিৰ্বাচিত চৰকাৰে জনগণৰ প্ৰতিবাদক গুৰুত্ব দিয়াৰ পৰিৱৰ্তে প্ৰতিবাদকাৰীৰ ওপৰত অগণতান্ত্রিক দমন আৰু আমানৱীয় নিৰ্যাতনহে চলাইছে । অসমৰ কেইবাগৰাকী নিৰীহ যুৱ প্ৰতিবাদকাৰীক গুলীয়াই হত্যা কৰা হ’ল । আপোচহীন আৰু শক্তিশালী ‘কা’-বিৰোধী স্থিতিৰ বাবে অসমৰ জ্যেষ্ঠ সাংবাদিক অজিত কুমাৰ ভূঞাক ‘প্রাগ নিউজ’ৰপৰা পদত্যাগ কৰিবলৈ অতি কৌশলেৰে বাধ্য কৰোৱা হ’ল ।
‘কা’বিৰোধী আন্দোলনৰ অগ্ৰণী নেতা অখিল গগৈ প্ৰমুখ্যে বিভিন্ন প্ৰতিবাদীক মনেসজা অভিযোগৰ ভিত্তিত চৰকাৰে কাৰাগাৰত বন্দী কৰি থৈছে। গুৰুতৰভাৱে অসুস্থ কাৰাৰুদ্ধ অখিল গগৈক উপযুক্ত চিকিৎসা প্ৰদান নকৰি চৰকাৰে যেন ‘অখিল গগৈক এইবাৰ নিঃশেষ কৰা হ’বই’ বুলি বুজাব খুজিছে ।
চৰকাৰৰ এনে অগণতান্ত্রিক আৰু আমানৱীয় দমন-নিৰ্যাতন দেখি বিবেকৱান জনগণ মৌন হৈ থকাটো উচিত নহয়। সেয়ে আমি অসমৰ সকলো গণতান্ত্ৰিক অসমপ্ৰেমী ৰাইজক ঐক্যবদ্ধ হৈ চৰকাৰৰ এই দমন-নিৰ্যাতনৰ বিৰুদ্ধে সবল প্ৰতিবাদ সাব্যস্ত কৰিবলৈ আহ্বান জনাইছো, লগতে আমি নিম্নস্বাক্ষৰিত প্ৰবাসী অসমীয়াসকলে এই প্ৰতিবাদলৈ আমাৰ নৈতিক সমৰ্থন আগবঢ়াইছো ।
‘কা’ বাতিল, সংবিধান আৰু গণতন্ত্ৰ ৰক্ষা, অসম চুক্তি ৰূপায়ন তথা কাৰাৰুদ্ধ হৈ থকা সকলো ‘কা’-বিৰোধী নেতা-কৰ্মীৰ তাৎক্ষণিক মুক্তি আমি দাবী কৰিছো, অখিল গগৈক অতি শীঘ্ৰে উন্নত চিকিৎসা প্ৰদানৰ বাবে আবেদন কৰিছো ।
অসমৰ হিতাৰ্থে এইখিনিতে আন এটা কথা উল্লেখ কৰাটো সমীচীন হ’ব, বৰ্তমানৰ দল-সংগঠন-নেতা-নাগৰিকে অসমৰ অস্তিত্ব ৰক্ষাৰ বাবে কেৱল ভাষা-সাহিত্য-সংস্কৃতি আৰু ৰাজনৈতিক অধিকাৰ সুৰক্ষিত কৰাৰ কথাহে কৈ থকাটো আমি সচেতনভাৱে লক্ষ্য কৰিছো।
কিন্তু অসমৰ অস্তিত্ব ৰক্ষাৰ সংগ্ৰামখনত বিজ্ঞান-প্ৰযুক্তিবিদ্যাৰ অগ্ৰগতিৰ দিশটো সম্পূৰ্ণ অৱহেলিত হৈ আছে। কোৱা বাহুল্য, একবিংশ শতিকাত বৃহত্তৰ অসমীয়া জাতিক সকলো দিশৰ পৰা আগুৱাই লৈ যাবলৈ হ’লে বিজ্ঞান-প্ৰযুক্তিৰ অগ্ৰগতি আৰু সমাজত বিজ্ঞানমনস্কতা গঢ়ি তোলাটো অপৰিহাৰ্য । অসমৰ সচেতন ৰাইজে সময় থাকোঁতেই এই দিশত মন-কাণ দিব বুলি আশা কৰিছো।
ডঃ বিপুল ডেকা (দক্ষিণ কোৰিয়া)
ডঃ কৌশিক তালুকদাৰ (জাৰ্মানী)
ডঃ নমিতা শৰ্মা (দক্ষিণ কোৰিয়া)
ডঃ পার্থজ্যোতি দাস (আমেৰিকা যুক্তৰাষ্ট্ৰ)
কল্যাণী ৰাজকুমাৰী (ভুৱনেশ্বৰ, উৰিষ্যা)
ভূপালী কলিতা (আমেৰিকা যুক্তৰাষ্ট্ৰ)