মঙলবাৰে বিয়লি অহা এজাক প্ৰবল ধুমুহা-বৰষুণে বোকাখাতৰ পাণবাৰী আৰু সমীপৰ বৰভেটা গাঁৱৰ বিস্তৰ ক্ষতি সাধন কৰে৷
তীব্ৰ বেগত বোৱা বতাহজাকে অঞ্চলটোৰ বহু লোকৰ বাসগৃহৰ বিস্তৰ ক্ষতি সাধন কৰে৷ উৰুৱাই নিয়ে বহু বাসগৃহৰ ছাল-বেৰ৷
বতাহজাকৰ লগত অহা বৰষুণে নষ্ট কৰে সাঁচতিয়া শস্যৰ ভঁৰাল, খাদ্য সামগ্ৰীৰ লগতে কাপোৰ-কানি৷
বতাহত কোনোমতে প্ৰাণ ৰক্ষা কৰে বহুজনে৷ ধুমুহা-বৰষুণত অৱশ্যে কোনো লোক বা পশুধনৰ ক্ষয়-ক্ষতিৰ বাতৰি অহা নাই৷
পাণবাৰী আৰু বৰভেটা গাঁৱৰ কুৰিটাৰো অধিক লোকৰ বাসগৃহৰ ক্ষতি কৰে ধুমুহাই৷ সপ্তাহটোৰ ভিতৰতে অহা দুজাক ধুমুহাই এতিয়া কোঙা কৰি পেলাইছে অঞ্চলবাসীক৷
কৰ’নাভাইৰাছৰ বিৰুদ্ধে লকডাউনৰ মাজতে শেহতীয়াকৈ দুটাকৈ ধুমুহাত এতিয়া সৰ্বস্ৰান্ত হৈছে পাণবাৰী আৰু বৰভেটাৰ জনসাধাৰণ৷
দুটা দিন পাৰহৈ যোৱা বাসগৃহবোৰ যেনে তেনে মেৰামতি কৰি লওঁতেই অহা এই জাক ধুমুহাই পুনৰ বিধ্বস্ত কৰিলে সৰ্বসাধাৰণক৷
প্ৰায় এঘন্টা ধৰি চলা এই ধুমুহা-বৰষুণৰ পাচত এতিয়া বতৰ শান্ত যদিও ধুমুহাই গৃহহীন কৰি গ’ল বহু পৰিয়ালক৷
