মঙলবাৰৰ পৰা আৰম্ভ হোৱা অসম বিধানসভাৰ শীতকালীন অধিৱেশনৰ প্ৰথম দিনটোত শিল্পী জুবিন গাৰ্গৰ ৰহস্যজনক মৃত্যুৰ প্ৰসংগই ব্যাপক চৰ্চা লাভ কৰে। বিধানসভাৰ পৰম্পৰা ভংগ কৰি ইতিহাসত প্ৰথমবাৰৰ বাবে বিৰোধীৰ এক সভা স্থগিত প্ৰস্তাৱ অধ্যক্ষই গ্ৰহণ কৰাৰ লগে লগে সদনত জুবিন গাৰ্গৰ মৃত্যুৰ তদন্ত আৰু ন্যায় বিচাৰি বিৰোধীয়ে বিধানসভাৰ মজিয়া উত্তাল কৰি তোলে। এই আলোচনাত অংশ লৈ মুখ্যমন্ত্ৰী ড০ হিমন্ত বিশ্ব শৰ্মাই জুবিনৰ মৃত্যু এক ‘পৰিকল্পিত হত্যাকাণ্ড’ বুলি স্পষ্ট কৰি দিয়ে।
বিধানসভাত জুবিন গাৰ্গৰ মৃত্যুৰ বিষয়ে আলোচনা কৰিবলৈ অনা প্ৰস্তাৱ গ্ৰহণ কৰা কাৰ্যক বিৰোধী দলপতি দেৱব্ৰত শইকীয়াই এক নজিৰবিহীন ঘটনা বুলি অভিহিত কৰে। তেওঁ কয়, “জুবিন গাৰ্গৰ মৃত্যু ৰহস্যক লৈ আমি আলোচনা হোৱাটো বিচাৰিছিলোঁ। অধ্যক্ষই আমাক সুযোগ দিছে, কিন্তু বৰ্তমান চলি থকা SIT-ৰ অনুসন্ধানৰ গতি আৰু দিশক লৈ আমি সুখী নহয়।”
সদনত জুবিন গাৰ্গৰ গীত আৰু আদৰ্শৰ অপব্যাখ্যা কৰা বুলি চৰকাৰৰ বিৰুদ্ধে সৰৱ হৈ পৰে বিৰোধী বিধায়কসকল। চিপিআইএমৰ বিধায়ক মনোৰঞ্জন তালুকদাৰে জুবিনৰ জনপ্ৰিয় গীত “নমতা আলহীয়ে চোতাল ভৰিছে…”ৰ উদ্ধৃতি দি ৰাজ্যৰ মন্ত্ৰী অশোক সিংহলক লক্ষ্য কৰি লয়।
তালুকদাৰে কয়, “আজি যিসকল বণিয়াই সোণাপুৰ, ঢেকীয়াজুলি আদিত হাজাৰ হাজাৰ বিঘা মাটি দখল কৰিছে, তেওঁলোক আৰু তেওঁলোকক চৰকাৰীভাৱে সহায় কৰা মন্ত্ৰীজনো ‘নমতা আলহী’।” লগতে জুবিনৰ ধৰ্মনিৰপেক্ষ সত্তাক বিকৃত নকৰিবলৈ তেওঁ চৰকাৰক সকীয়াই দিয়ে।
ইপিনে, ৰাইজৰ দলৰ বিধায়ক অখিল গগৈয়ে জুবিনৰ মৃত্যুৰ তদন্তত কেইবাটাও খুঁট থকা বুলি অভিযোগ কৰে। তেওঁ প্ৰশ্ন তোলে— ছিংগাপুৰৰ ‘নৰ্থ-ইষ্ট ফেষ্টিভেল’ৰ মূল উদ্যোক্তা শ্যামকানু মহন্তৰ পত্নী আৰু অনুষ্ঠানটোৰ সৈতে জড়িত কেন্দ্ৰীয় মন্ত্ৰী পবিত্ৰ মাৰ্ঘেৰিটাক কিয় তদন্তৰ আওতালৈ অনা হোৱা নাই? লগতে ১৯ ছেপ্টেম্বৰৰ সেই অভিশপ্ত মুহূৰ্তৰ ভিডিঅ’ ফুটেজ আজিলৈকে কিয় ৰাজহুৱা কৰা নহ’ল, সেই লৈ তেওঁ চৰকাৰক উভতি ধৰে। জুবিনৰ “পলিটিক্স নকৰিবা বন্ধু” গীতটি কাৰ বাবে গাইছিল, সেই লৈও মুখ্যমন্ত্ৰী আৰু অখিল গগৈৰ মাজত বাক-বিতণ্ডা চলে।
বিৰোধীৰ সকলো অভিযোগ আৰু প্ৰশ্নৰ উত্তৰ দি মুখ্যমন্ত্ৰী হিমন্ত বিশ্ব শৰ্মাই সদনত এক চাঞ্চল্যকৰ ঘোষণা কৰে। তেওঁ কয়, “জুবিন গাৰ্গক ধনৰ লোভতে হত্যা কৰা হৈছিল। এই হত্যাকাণ্ডত ৪-৫ জন লোক জড়িত আছে; এজনে হত্যা কৰিছে আৰু বাকীকেইজনে সহযোগ কৰিছে।”
মুখ্যমন্ত্ৰীয়ে সদনক কয় যে কেৱল হত্যাই নহয়, ক’ভিডৰ সময়ৰ পৰা জুবিনৰ সৈতে হোৱা সকলো অন্যায়ৰ তদন্ত হ’ব আৰু এজনো দোষী সাৰি যাব নোৱাৰিব। ইফালে, বিৰোধীয়ে আক্ৰমণৰ লক্ষ্য কৰি লোৱা মন্ত্ৰী অশোক সিংহলক মুখ্যমন্ত্ৰীয়ে সদনৰ মজিয়াত ৰক্ষণাবেক্ষণ দিয়াও পৰিলক্ষিত হয়।
