কেইঘণ্টামানৰ ভিতৰতে ভাৰতৰ উপকূলত আঘাত হানিব এক শক্তিশালী ঘূৰ্ণীবতাহ ‘দিতৱাহ’ (Cyclone Ditwah)। শ্ৰীলংকাত বিধ্বংসী ৰূপ ধাৰণ কৰাৰ পিছত এতিয়া এই ঘূৰ্ণীবতাহ দ্ৰুতগতিত ভাৰতৰ দক্ষিণ উপকূলৰ দিশে আগবাঢ়িছে। ইয়াৰ ফলত শনিবাৰৰ পৰা তামিলনাডুৰ বহু জিলাত ধাৰাসাৰ বৰষুণ আৰম্ভ হৈছে, পানী জমা হোৱাৰ ফলত কিছু অঞ্চলত পৰিস্থিতি অধিক ভয়াৱহ হৈ পৰিছে। ঘূৰ্ণীবতাহৰ আশংকাত দক্ষিণ ভাৰতত আতংক বৃদ্ধি পাইছে।
আজি (৩০ নৱেম্বৰ) ভাৰতৰ উপকূলত খুন্দা মাৰিব পাৰে দিতৱাহ
আই এম ডিৰ শেহতীয়া আপডেটত প্ৰকাশ পাইছে যে যোৱা ছয় ঘণ্টাত এই ঘূৰ্ণীবতাহে ঘণ্টাত প্ৰায় ৮ কিলোমিটাৰ বেগেৰে উত্তৰ-উত্তৰ-পশ্চিম দিশলৈ গতি কৰিছে। শনিবাৰে পুৱা দক্ষিণ-পশ্চিম বংগোপসাগৰ আৰু উত্তৰ শ্ৰীলংকাৰ ওপৰত অৱস্থান কৰিছিল।
পূৰ্বাভাস মতে দেওবাৰে পুৱা ভাৰতৰ দক্ষিণ উপকূলত উপস্থিত হ’ব আৰু ইয়াৰ প্ৰত্যক্ষ প্ৰভাৱ তামিলনাডু-অন্ধ্ৰ প্ৰদেশৰ উপকূলত পৰিব। পুদুচেৰিও প্ৰভাবিত হ’ব পাৰে।
তামিলনাডু প্ৰশাসনে অৱগত কৰিছে যে পৰিস্থিতিৰ সৈতে মোকাবিলা কৰিবলৈ সকলো ব্যৱস্থা গ্ৰহণ কৰা হৈছে। ৰাজ্যিক দুৰ্যোগ ব্যৱস্থাপনা মন্ত্ৰী কে.কে.এছ.এছ.আৰ. ৰামচন্দ্ৰনে কয় যে এই পৰ্যন্ত কোনো লোক হতাহতৰ খবৰ পোৱা নাই।
তদুপৰি, তামিলনাডুৰ বিভিন্ন জিলাত ১৪টা এন ডি আৰ এফৰ দল নিয়োগ কৰা হৈছে। অতিৰিক্ত উদ্ধাৰকাৰী দল পুডুচেৰীতো আছে। ভাৰতীয় বায়ুসেনা আৰু উপকূলৰক্ষী বাহিনীয়ে পৰিস্থিতি নিৰীক্ষণ কৰি আছে। সাগৰৰ পৰিস্থিতি স্বাভাৱিক নোহোৱালৈকে মাছমৰীয়াসকলক সাগৰলৈ যোৱাত নিষেধাজ্ঞা আৰোপ কৰা হৈছে।
বিমান আৰু ৰে’ল সেৱা ব্যহত হ’ব পাৰে
ঘূৰ্ণীবতাহৰ প্ৰভাৱৰ বাবে তামিলনাডুকে ধৰি দক্ষিণৰ কেইবাখনো ৰাজ্যত বিমান আৰু ৰে’ল সেৱা ব্যাহত হোৱাৰ সম্ভাৱনা আছে। ইতিমধ্যে- চেন্নাই বিমানবন্দৰত ৫৪খন বিমান বাতিল কৰা হৈছে। এয়াৰ ইণ্ডিয়াকে ধৰি বিভিন্ন বিমান সংস্থাৰ বিমানৰ সময়সূচী সলনি কৰা হৈছে।
ঘূৰ্ণীবতাহ দিতৱাহ ভাৰতত প্ৰৱেশ কৰাৰ পূৰ্বে শ্ৰীলংকাক প্ৰায় বিধ্বস্ত কৰি পেলাইছে। ইয়াৰ ফলত কমেও ১৩২ জন লোকৰ মৃত্যু হৈছে। ১৫০ জনতকৈ অধিক লোক সন্ধানহীন হৈছে। বহু ঘৰ ভাঙি গৈছে। সমগ্ৰ দেশত জৰুৰীকালীন অৱস্থা ঘোষণা কৰা হৈছে। মানৱীয় সাহায্য হিচাপে ভাৰতে ‘অপাৰেচন সাগৰ বন্ধু’ আৰম্ভ কৰি চি-১৩০জে বিমানেৰে ১২ টন জৰুৰীকালীন সাহায্য প্ৰেৰণ কৰিছে।
উপকূলৰ কাষ চাপি অহাৰ লগে লগে ঘূৰ্ণীবতাহৰ শক্তি বৃদ্ধি পাব পাৰে বুলি বতৰ বিজ্ঞান কেন্দ্ৰই সকীয়াই দিছে। উপকূলত প্ৰবলৰ পৰা অতি প্ৰবল বৰষুণ, ধুমুহা বতাহ আৰু জোৱাৰ-ভাটাৰ সম্ভাৱনা আছে। উপকূলৰ ওচৰৰ বাসিন্দাসকলক সজাগ হৈ থাকিবলৈ আৰু ঘৰৰ পৰা ওলাই নাযাবলৈ পৰামৰ্শ দিয়া হৈছে।
