যুদ্ধ বিধ্বস্ত ইউক্ৰেইনৰ পৰা আহি মুম্বাই আৰু নতুন দিল্লীত পৃথক বিমানেৰে অৱতৰণ কৰিলে অসমৰ কমেও দহজন শিক্ষাৰ্থীয়ে। অসমৰ শিক্ষাৰ্থী কেইগৰাকীয়ে যোৱানিশা মুম্বাই আৰু দিল্লীত অৱতৰণ কৰাৰ পিছতে আজি তেওঁলোকে মাতৃভূমি অসম আহি পায়হি।
মুম্বাইত অসম ভৱনৰ বিষয়াসকলে ইউক্ৰেইনৰ পৰা আহি ভাৰতত উপস্থিত হোৱা শিক্ষাৰ্থীসকলক আদৰণি জনায়।
অসমৰ শিক্ষাৰ্থী কেইগৰাকীক গুৱাহাটীলৈ বিনামূলীয়া ভ্ৰমণৰ সকলো ব্যৱস্থা অসম চৰকাৰৰ তৰফৰ পৰা কৰা হৈছে।
অসমৰ দুই ছাত্ৰী ক্ৰমে তন্ময়ী পৰাশৰ আৰু চিয়া দাসে আজি গুৱাহাটীত আহি উপস্থিত হৈছে৷
গুৱাহাটীৰ বাসিন্দা দুয়োগৰাকী ছাত্ৰীয়ে ইউক্ৰেইনৰ পৰা ২৬ ফেব্ৰুৱাৰীৰ নিশা এয়াৰ ইণ্ডিয়াৰ বিমানেৰে মুম্বাইত উপস্থিত হৈছিল। তেওঁলোকক অসম ভৱনৰ বিষয়াসকলে আদৰণি জনায় আৰু গুৱাহাটীলৈ বিনামূলীয়া ভ্ৰমণৰ ব্যৱস্থা কৰি দিয়ে।
ছাত্ৰীদুগৰাকীয়ে আজি পুৱা মুম্বাইৰ পৰা ইণ্ডিগো বিমানেৰে আহি গুৱাহাটীৰ বৰঝাৰ বিমানবন্দৰত অৱতৰণ কৰে। আনহাতে, কামৰূপ জিলাৰ শুৱালকুছিৰ হিমাশ্ৰী কাকতি আৰু গুৱাহাটীৰ মালিগাঁৱৰ ডেইজী বসুমতাৰীয়েও সুৰক্ষিত ভাবে নিজৰ ঘৰ আহি পাইছে।
তেওঁলোকে যোৱা নিশা এয়াৰ ইণ্ডিয়াৰ এখন বিমানেৰে দিল্লী পাইছিল ।
ইফালে, ইউক্ৰেইনৰ বুকোভিনিয়ান ষ্টেট মেডিকেল ইউনিভাৰ্চিটিত অধ্যয়ন কৰি থকা অসমৰ বিশ্বনাথ চাৰিআলিৰ গহপুৰৰ অনুৰাগ ভূঞা আৰু গুৱাহাটীৰ কৃতিকাই দেওবাৰে পুৱা ৩:১৫ বজাত দিল্লীত উপস্থিত হোৱাৰ পিছত তেওঁলোকক অসম ভৱনৰ বিষয়াসকলে মাতৃভূমিলৈ প্ৰেৰণৰ দিহা কৰে।
অসমলৈ সুকলমে উভতি অহা শিক্ষাৰ্থীসকল হৈছে ক্ৰমে তন্ময়ী পৰাশৰ, চিয়া দাস, ডেইজী বসুমতাৰী ,কৃতিকা বসন্ত (গুৱাহাটী), অনুৰাগ ভূঞা (গহপুৰ) হিমাশ্ৰী কাকতি (শুৱালকুছি),নগাঁৱৰ সমন্বয় কুমাৰ শৰ্মা,নলবাৰীৰ অংশুমান শৰ্মা, ৩ )কামাখ্যা ধামৰ গুণজিৎ কাশ্যপ আৰু নগাঁৱৰ সজন হাজৰিকা।
উল্লেখ্য এয়াৰ ইণ্ডিয়াৰ প্ৰথম খন বিমানে ২১৯ জন যাত্ৰী কঢ়িয়াই আনিছিল। বিমান খনত বেছিভাগ যাত্ৰীয়েই আছিল ছাত্ৰ-ছাত্ৰী । ইয়াৰোপৰি ২৫০ আৰু ২৪০ জন যাত্ৰী কঢ়িয়াই অনা দ্বিতীয় তথা তৃতীয় বিমান দুখনেও দেওবাৰে দিল্লীত উপস্থিত অৱতৰণ কৰিছে।
