মুখ্য মন্ত্ৰীৰ বিশেষ জলপানি আঁচনি ২০১৮ বৰ্ষত উজলিল শিৱসাগৰ জিলা। এই আঁচনিৰ অধীনত অনুষ্ঠিত হোৱা পঞ্চম আৰু অষ্টম শ্ৰেণীৰ লিখিত পৰীক্ষাত শ্ৰেষ্ঠ ১১ জনৰ ভিতৰত ৫ গৰাকীয়েই শিৱসাগৰৰ শিক্ষাৰ্থী।
পঞ্চম শ্ৰেণীৰ প্ৰথম দুটা ৰেংকত স্থান লাভ কৰা ৪ জন শিক্ষাৰ্থীৰ ভিতৰত শিৱসাগৰৰ ২ গৰাকী ছাত্ৰীয়ে দ্বিতীয় স্থান লাভ কৰিবলৈ সক্ষম হয়। তেওঁলোক হৈছে লক্ষ্মীনাথ বেজবৰুৱা শিশু ভৱন প্ৰাথমিক বিদ্যালয়ৰ আইচেং গগৈ আৰু ১ নং টাউন প্ৰাঃ বিঃৰ নাচিমা চাহিন হুছেইন।
দুয়োগৰাকীয়ে ১০০ৰ ভিতৰত ৯৩ নম্বৰ লাভ কৰিবলৈ সক্ষম হয়।
আনহাতে অষ্টম শ্ৰেণীত ১৫০ নম্বৰৰ ভিতৰত ১৩৯ নম্বৰ লাভ কৰি ৰাজ্যৰ ভিতৰতে প্ৰথম স্থান লাভ কৰে কালুগাঁও উচ্চ মাধ্যমিক বিদ্যালয়ৰ ছাত্ৰী অনন্যা চুতীয়াই।
উল্লেখযোগ্য যে অষ্টম শ্ৰেণীত প্ৰথম দুটা ৰেংকত স্থান লাভ কৰা ৭ গৰাকী শিক্ষাৰ্থীৰ ভিতৰত শিৱসাগৰৰ ৩ গৰাকী শিক্ষাৰ্থীয়ে স্থান লাভ কৰিছে।
অনন্যা চুতীয়াৰ উপৰি স্থান লাভ কৰা বাকী দুগৰাকী শিক্ষাৰ্থী হৈছে দিলীহি ধাইআলি হাইস্কুলৰ ছাত্ৰী স্বৱনম বৰগোঁহাই আৰু বানমুখ উচ্চতৰ মাধ্যমিক বিদ্যালয়ৰ ৰাখী বুঢ়াগোঁহাই। তেওঁলোকে লাভ কৰা নম্বৰ হৈছে ১৩২।
ছাত্ৰ-ছাত্ৰীসকলক উচ্চ শিক্ষাৰ ক্ষেত্ৰত আগ্ৰহী কৰি তোলাৰ উদ্দেশ্যে অসম চৰকাৰে এই আঁচনি ৰূপায়ণ কৰিছিল। পঞ্চম আৰু অষ্টম শ্ৰেনীৰ ছাত্ৰ-ছাত্ৰীয়ে এই আঁচনিত অংশগ্ৰহণ কৰিব পাৰে। প্ৰতি বছৰে ব্লক পৰ্যায়ত লিখিত পৰীক্ষা অনুষ্ঠিত হয়। জলপানি হিচাপে ৫ হাজাৰ টকা ( ৫ বছৰৰ ফিক্সড ডিপ’জিটৰ প্ৰমাণপত্ৰ) প্ৰদান কৰা হয়।
