ভাৰতীয় মহাকাশ গৱেষণা সংস্থা (ইছৰো)ই দেশৰ ইতিহাসত এক নতুন অধ্যায় যোগ দি ভাৰতীয় নৌসেনাৰ আটাইতকৈ উন্নত যোগাযোগ উপগ্ৰহ GSAT-7R সফলতাৰে উৎক্ষেপণ কৰে। অন্ধ্ৰ প্ৰদেশৰ শ্ৰীহৰিকোটাৰ সতীশ ধাৱন মহাকাশ কেন্দ্ৰৰ দ্বিতীয়টো উৎক্ষেপণ স্থানৰ পৰা সন্ধিয়া ৫:২৬ বজাত এই অভিযান সম্পন্ন হয়।
৪৪০০ কিলোগ্ৰাম ওজনৰ এই উপগ্ৰহটোক বৰ্তমানলৈকে ভাৰতৰ গধুৰতম যোগাযোগ উপগ্ৰহ হিচাপে গণ্য কৰা হৈছে। এই উপগ্ৰহটো সম্পূৰ্ণৰূপে থলুৱাভাৱে নিৰ্মাণ কৰা হৈছে, যি ‘আত্মনিৰ্ভৰশীল ভাৰত’ৰ এক উদাহৰণ।
GSAT-7Rক ইছৰোৰ আটাইতকৈ শক্তিশালী ৰকেট, যাক ‘বাহুবলী’ ৰকেট বুলিও অভিহিত কৰা হয়, তাৰ জৰিয়তে মহাকাশলৈ প্ৰেৰণ কৰা হয়।
এই উপগ্ৰহটোৱে ভাৰতীয় নৌসেনাৰ জাহাজ, বিমান, চাবমেৰিন আৰু সামুদ্ৰিক অভিযান কেন্দ্ৰসমূহৰ মাজত দ্ৰুত আৰু সুৰক্ষিত যোগাযোগ প্ৰদান কৰিব।
ইয়াত থকা যোগাযোগ সঁজুলিসমূহে সামুদ্ৰিক সুৰক্ষা, চোৰাংচোৱা ব্যৱস্থা আৰু নৌসেনাৰ নেটৱৰ্ক ক্ষমতাক আৰু অধিক শক্তিশালী কৰি তুলিব। উপগ্ৰহটোৱে ভাৰত মহাসাগৰৰ এক বৃহৎ অংশত শক্তিশালী সংকেত আৰু অধিক তথ্য স্থানান্তৰ কৰিব।
ইছৰোৱে এই অভিযানৰ মুখ্য উদ্দেশ্য সামুদ্ৰিক ক্ষেত্ৰত সেৱা প্ৰদান কৰা বুলি বাখ্যা কৰিছে। এই সফল উৎক্ষেপণে মহাকাশ গৱেষণাৰ ক্ষেত্ৰত ইছৰোৰ দুৰ্দান্ত ক্ষমতা পুনৰ প্ৰমাণ কৰিলে।
উল্লেখ্য যে ইয়াৰ পূৰ্বে ইছৰোৱে এল ভি এম-৩ ৰকেটেৰে ২০২৩ চনত চন্দ্ৰযান-৩ সফলতাৰে উৎক্ষেপণ কৰিছিল। ভাৰত চন্দ্ৰৰ দক্ষিণ মেৰুৰ ওচৰত সফলতাৰে অৱতৰণ কৰা বিশ্বৰ প্ৰথমখন দেশ হিচাপে পৰিগণিত হৈছিল।
