খাৰ্টুমত চুডানৰ ৰাষ্ট্ৰপতি ভৱনৰ সম্পূৰ্ণ নিয়ন্ত্ৰণ নিছে সেনাই। এই কথা দেশৰ চৰকাৰী সংবাদ মাধ্যম আৰু সামৰিক সূত্ৰই প্ৰকাশ কৰিছে। ছ’চিয়েল মিডিয়াত প্ৰচাৰ হৈছে একাধিক ভিডিঅ’ আৰু ছবি। য’ত দেখা গৈছে ৰাষ্ট্ৰপতি ভৱনৰ সন্মুখত ইটোৰ পিছত সিটোকৈ বিস্ফোৰণ ঘটিছে। বহু গাড়ী জ্বলি ছাই হৈ পৰিছে।
ৰাজপ্ৰসাদৰ এটা অংশ ভাঙি গৈছে। ইফালে সেনাবাহিনীয়ে হাতত বন্দুক লৈ উল্লাস কৰিবলৈ ধৰিছে। যদিও এই মুহূৰ্তত এই ভিডিঅ’সমূহৰ সত্যতা পৰীক্ষা কৰা হোৱা নাই।
দুবছৰ ধৰি চুডানত গৃহযুদ্ধই জুৰুলা কৰি আছে। ৰাষ্ট্ৰপতি ভৱনটো পূৰ্বে প্ৰতিদ্বন্দ্বী অৰ্ধসামৰিক ৰেপিড চাপৰ্ট ফৰ্চ (আৰ পি এফ)ৰ দখলত আছিল। সেইটো শুকুৰবাৰে দেশৰ সেনাই পুনৰ দখল কৰে।
২০২৩ চনৰ পৰাই চুডানৰ সামৰিক আৰু অৰ্ধসামৰিক বাহিনীৰ মাজত সমস্যা অব্যাহত আছে। প্ৰাক্তন ৰাষ্ট্ৰপতি ওমৰ আল বছিৰক ২০১৯ চনত পদচ্যুত কৰা হৈছিল। তেতিয়াৰ পৰাই দুয়োটা শক্তিয়ে একেলগে চুডানক শাসন কৰি আহিছে। কিন্তু লাহে লাহে সেই দেশত গৃহযুদ্ধই ঠাই ল’বলৈ ধৰে। চুডানত সংঘটিত হোৱা ৰক্তাক্ত সংঘৰ্ষত প্ৰায় ১০ হাজাৰ লোকৰ মৃত্যু হৈছে। বহু লোক গৃহহীন হৈছে।
যোৱা বছৰৰ এপ্ৰিল মাহত দেশৰ অৰ্ধসামৰিক বাহিনীয়ে খাৰ্টুমৰ ৰাষ্ট্ৰপতি ভৱন দখল কৰিছিল। অৱশ্যে এইবাৰ প্ৰতিদ্বন্দ্বী সেনাই সেইটো কাঢ়ি নিবলৈ সক্ষম হয়। একাংশ আন্তঃৰাষ্ট্ৰীয় বিশ্লেষকৰ মতে গৃহযুদ্ধত আক্ৰান্ত চুডানৰ ৰাষ্ট্ৰপতি ভৱন পুনৰ দখল কৰাটো তাৎপৰ্যপূৰ্ণ। অৰ্থাৎ এইবাৰ মধ্য চুডানত এই শক্তিয়ে শাসন কৰিব।
২০২১ চনৰ পৰা চুডানৰ সামৰিক বাহিনীৰ মুৰব্বী জেনেৰেল আব্দেল-ফাত্তাহ বুৰহানক চুডানৰ শাসক হিচাপে গণ্য কৰা হয়। তেওঁৰ ডেপুটি হৈছে আৰ এছ এফৰ মুৰব্বী জেনেৰেল মহম্মদ হামদান ডাগালো। কিন্তু ক্ৰমান্বয়ে দুয়োৰে সম্পৰ্কৰ অৱনতি ঘটিছিল। জেনেৰেল আব্দেল-ফাত্তাহ বুৰহানে অৰ্ধসামৰিক বাহিনী আৰ এছ এফক মূল সামৰিক বাহিনীত একত্ৰিত কৰাৰ প্ৰস্তাৱ আগবঢ়ায়। তেতিয়াই আৰম্ভ হয় গৃহযুদ্ধ। ২০২৩ চনৰ পৰা পৰিস্থিতি জটিল হৈ পৰে।
স্থানীয় সংবাদ মাধ্যমৰ সূত্ৰইও প্ৰকাশ কৰিছে যে যদিও ৰাষ্ট্ৰপতি ভৱন হাতৰ পৰা ওলাই গ’লেও খাৰ্টুমৰ কিছু অংশ, সংশ্লিষ্ট ওমদুৰমান প্ৰদেশ আৰু দক্ষিণ চুডানৰ কিছুমান অঞ্চল অৰ্ধসামৰিক বাহিনীৰ হাততে থাকিব।
