দেশৰ ৰাজনীতিত ক্ৰমাৎ শক্তিহীন হৈ পৰাৰ সময়তে হিমাচল প্ৰদেশত ক্ষমতা পুনৰুদ্ধাৰেৰে হৃত শক্তি কিঞ্চিত হ’লেও উদ্ধাৰ কৰা কংগ্ৰেছে অৱশেষত ৰাজ্যখনৰ নৱ মুখ্যমন্ত্ৰীৰ নাম ঘোষণা কৰিছে। বিধানসভা নিৰ্বাচনত দলৰ প্ৰচাৰ সমিতিৰ নেতৃত্ব বহন কৰি জয়ৰ লক্ষ্যত উপনীত হোৱাত অন্যতম ভূমিকা গ্ৰহণ কৰা জেষ্ঠ নেতা সুখবিন্দৰ সিং চুখুক পৰৱৰ্তী মুখ্যমন্ত্ৰী হিচাপে নিযুক্তি দিছে কংগ্ৰেছে।
হামিৰপুৰ জিলাৰ নদাউন সমষ্টিৰ চাৰিবাৰৰ বিধায়ক ৫৮ বৰ্ষীয় সুখুৱে কাইলৈ পুৱা ১১ বজাত মুখ্যমন্ত্ৰী হিচাপে শপত গ্ৰহণ কৰিব। আনহাতে প্ৰদেশ কংগ্ৰেছৰ আন এগৰাকী জেষ্ঠ নেতা তথা পাঁচবাৰৰ বিধায়ক মুকেশ অগ্নিহোত্ৰীক উপ-মুখ্যমন্ত্ৰী হিচাপে নিযুক্তি দিছে দলটোৱে।
মুখ্যমন্ত্ৰীৰ দায়িত্ব লাভ কৰাৰ পাছতে সাংবাদিকৰ আগত সুখুৱে কয় যে, “মই ১৭ বছৰ বয়সৰ পৰাই মোৰ ৰাজনৈতিক কেৰিয়াৰ আৰম্ভ কৰিছিলো। কংগ্ৰেছ দলে মোৰ বাবে কি কৰিছে সেয়া মই কেতিয়াও পাহৰিব নোৱাৰিম।”
হিমাচল প্ৰদেশ কংগ্ৰেছৰ প্ৰাক্তন সভাপতি চুখুক দলৰ শীৰ্ষ নেতা ৰাহুল গান্ধীৰ ঘনিষ্ঠ বুলি গণ্য কৰা হয়। কিন্তু বিগত বৰ্ষৰ জুলাই মাহত মৃত্যু হোৱা ৰাজ্যখনৰ ছবাৰৰ মুখ্যমন্ত্ৰী তথা হিমাচল কংগ্ৰেছৰ অবিসম্বাদী নেতা বীৰভদ্ৰ সিং পৰিয়ালৰ সৈতে সু-সম্পৰ্ক নাছিল সুখুৰ।
অৱশ্যে ইয়াৰ পাছতো তেওঁক কংগ্ৰেছ হাইকমাণ্ডে প্ৰচাৰ সমিতিৰ মুৰব্বীৰ দায়িত্ব প্ৰদান কৰে। দলৰ এক সূত্ৰ অনুসৰি, বীৰভদ্ৰ সিঙৰ পত্নী তথা বৰ্তমানৰ হিমাচল কংগ্ৰেছৰ সভানেত্ৰী প্ৰতিভা সিঙে সুখুক নিৰ্বাচনত টিকট দিয়াৰ ক্ষেত্ৰত তীব্ৰ আপত্তি জনাইছিল।
উল্লেখ্য যে মুখ্যমন্ত্ৰী হিচাপে সুখুৰ লগতে ৰাজ্যিক কংগ্ৰেছৰ মুৰব্বী প্ৰতিভা সিং আৰু মুকেশ অগ্নিহোত্ৰীৰ নাম চৰ্চাত আছিল। অৱশ্যে দলৰ নৱনিৰ্বাচিত ৪০ গৰাকী বিধায়কৰ মাজত প্ৰতিভা জনসমৰ্থন কম হোৱাৰ বাবে তেওঁক মুখ্যমন্ত্ৰী পদৰ পৰা বাদ দিয়া হৈছে বুলি আজি সন্ধিয়া দলৰ সূত্ৰই প্ৰকাশ কৰিছিল।