বিমান দুৰ্ঘটনাত মৃত্যু হোৱা অজিত পাৱাৰৰ চকীখনত বহিব পত্নী সুনেত্ৰা পাৱাৰ। শনিবাৰেই তেওঁ মহাৰাষ্ট্ৰৰ উপ-মুখ্যমন্ত্ৰী হিচাপে শপত গ্ৰহণ কৰিবলৈ ওলাইছে। সংবাদ মাধ্যমৰ সূত্ৰৰ পৰা এই কথা জানিব পৰা গৈছে।
কেৱল সেয়াই নহয়, নেশ্যনেল কংগ্ৰেছ পাৰ্টি (এন চি পি) দুভাগ হোৱাৰ পিছত এন চি পিৰ সভাপতি আছিল অজিত পাৱাৰ। তেওঁৰ ঠাইত সভাপতিৰ দায়িত্ব ল’বলৈ আগবাঢ়িছে প্ৰফুল্ল পেটেলে।
সূত্ৰ অনুসৰি, অজিতৰ অনুপস্থিতিত অভিভাৱকবিহীন এন চি পিৰ দায়িত্ব ল’বলৈ শনিবাৰে বিয়লি ২ বজাত এখন বৈঠক আহ্বান কৰা হৈছে। সভাৰ নেতৃত্ব দিব অজিত পাৱাৰৰ পত্নী সুনেত্ৰাই। ইয়াৰ পিছত সন্ধিয়া ৫ বজাৰ ভিতৰত মুম্বাইৰ ৰাজভৱনলৈ যাব। তাতেই অনুষ্ঠিত হ’ব সুনেত্ৰাৰ শপত গ্ৰহণ অনুষ্ঠান।
বুধবাৰে পুৱা বিমান দুৰ্ঘটনাত অজিত পাৱাৰৰ মৃত্যু হয়। মৃত্যুৰ কেইঘণ্টামানৰ ভিতৰতে এন চি পিয়ে দলৰ ভৱিষ্যতৰ কথা ভাবিবলৈ আৰম্ভ কৰে। সূত্ৰ অনুসৰি এন চি পিৰ কাৰ্যকৰী সভাপতি প্ৰফুল্ল পেটেল আৰু অন্যান্য দলৰ নেতাই সুনেত্ৰাৰ সৈতে পৃথকে পৃথকে বাৰ্তালাপ কৰে। সেই বৈঠকৰ পিছতে এই তথ্য পোহৰলৈ আহিছে।
এনচিপিয়ে বিচাৰিছে যে পাৱাৰ পৰিয়ালৰ দুৰ্গ বাৰামটিৰ পৰাই সুনেত্ৰাক প্ৰাৰ্থী কৰক। এই বাৰামটিৰ পৰা অজিত পাৱাৰ সাতবাৰ বিধায়ক হৈছিল। জীৱনৰ শেষ মুহূৰ্ততো বাৰামটি তেওঁৰ লগত জড়িত আছিল। সুনেত্ৰাক উপ-মুখ্যমন্ত্ৰী কৰাৰ পিছত এন চি পিৰ লক্ষ্য এই আসনৰ পৰাই সুনেত্ৰাক বিধায়ক কৰা। এই সন্দৰ্ভত আগন্তুক দিনত প্ৰফুল্ল পেটেলে মহাৰাষ্ট্ৰৰ মুখ্যমন্ত্ৰী দেৱেন্দ্ৰ ফডনৱিছকো সাক্ষাৎ কৰিব। কিন্তু সম্প্ৰতি এন চি পিয়ে শাৰদ পাৱাৰৰ সৈতে ‘পুনৰ মিলন’ৰ কথা চিন্তা কৰা নাই।
উল্লেখ্য যে যিকোনো আঞ্চলিক দলৰ বাবে প্ৰতিষ্ঠাপক বা তেওঁৰ স্পষ্ট উত্তৰাধিকাৰী থকাটো গুৰুত্বপূৰ্ণ। অন্যথা আঞ্চলিক দল এটাৰ বৰ্তি থকাটো কঠিন হৈ পৰে। অতীতত বহু ৰাজনৈতিক দলৰ বিলুপ্তি বা অৱনতিয়ে এই তত্ত্ব প্ৰতিষ্ঠা কৰে।
অজিতৰ মৃত্যুৰ পিছৰে পৰা এন চি পিৰ অস্তিত্বক লৈ প্ৰশ্ন উত্থাপন হৈছে। কাৰণ মৃত্যুৰ আগদিনালৈকে অজিত ৰাজনীতিৰ মাজত আছিল। খুড়াক শাৰদ পাৱাৰৰ ছাঁৰ পৰা ওলাই আহি তেওঁ নিজকে স্বতন্ত্ৰ ৰাজনীতিবিদ হিচাপে প্ৰতিষ্ঠা কৰিছিল মাত্ৰ। কিন্তু উত্তৰাধিকাৰী বাছি ল’বলৈ সময় নাপালে। এনে পৰিস্থিতিত অজিতৰ পত্নীৰ ওপৰত নিৰ্ভৰ কৰিয়েই এন চি পিয়ে সদ্যহতে অস্তিত্ব ৰক্ষাৰ যুঁজ দিব।
