অধিনায়ক হিচাপে IPL ট্ৰফীত চুমুক দিয়াৰ শেষ আশা নিৰ্বাপিত হৈছে তাৰকা খেলুৱৈ বিৰাট কোহলীৰ। কোহলী নেতৃত্বাধীন ৰয়েল চেলেঞ্জাৰ্জ বাংগালোৰক এলিমিনেটৰ মেচত IPL ৰ পৰা বাহিৰ হোৱাৰ পথ দেখুৱালে কলকাতা নাইট ৰাইডাৰ্ছে।
শ্বাৰজাহ ক্ৰিকেট ষ্টেডিয়ামত কালি অনুষ্ঠিত এলিমিনেটৰ মেচত কলকাতাই বাংগালোৰক ৪ উইকেটত পৰাস্ত কৰি কোৱালিফায়াৰত প্ৰৱেশ কৰিছে।
খেলখনত টছত জয়ী হৈ বাংগালোৰে প্ৰথমে বেটিং কৰাৰ সিদ্ধান্ত লয়। প্ৰথম উইকেটত অপেনাৰদ্বয় পাৰিকাল আৰু কোহলীয়ে ৪৯ ৰানৰ যুটি বন্ধাৰ পিছত ব্যক্তিগত ২১ ৰানত বিদায় লয় পাৰিকালে।
ইয়াৰ পাছত দলটোৱে দীঘলীয়া যুটি বান্ধিবলৈ ব্যৰ্থ হয়। অধিনায়ক কোহলীয়ে সৰ্বাধিক ৩৯ ৰান কৰি আউট হয়।
মেক্সৱেল, শ্বাহবাজ আহমেদ আৰু ডে ভিলিয়াৰ্চৰ বেটৰ পৰা আহে ক্ৰমে ১৫, ১৩ আৰু ১১ ৰান।
সঘন উইকেট পতন আৰু মন্থৰ বেটিঙৰ ফলত দলটোৱে ২০ অভাৰত ৭ উইকেটৰ বিনিময়ত মাত্ৰ ১৩৮ ৰান সংগ্ৰহ কৰে।
কলকাতাৰ হৈ চমকপ্ৰদ স্পেলেৰে সুনীল নাৰাইণে ২১ ৰান খৰচ কৰি ৪ টা মূল্যৱান উইকেট দখল কৰে। দুটা উইকেট যায় লকী ফাৰ্গুচনৰ হাতলৈ।
আনহাতে ১৩৯ ৰানৰ সহজ লক্ষ্য অতিক্ৰম কৰিবলৈ কলকাতায়ো কষ্ট কৰিবলগীয়া হয়। অপেনাৰদ্বয় গিল আৰু আয়াৰে ৪১ ৰান সংগ্ৰহ কৰি দলক এক সফল আৰম্ভণি দিয়ে। দুয়োৱে ক্ৰমে ২৯ আৰু ২৬ ৰানৰ অৱদান আগবঢ়ায়। ব্যৰ্থ হয় ত্ৰিপাঠী (৬) আৰু কাৰ্তিক (১০)।
নিতীশ ৰানাই ধৈৰ্যশীল বেটিঙেৰে ২৩ ৰান সংগ্ৰহ কৰি দলক এক স্থিৰ অৱস্থালৈ নিয়ে। পিছলৈ সুনীল নাৰাইণে খৰতকীয়াকৈ ১৫ বলত ২৬ ৰান সংগ্ৰহ কৰি দলক বিজয়ৰ প্ৰায় কাষ চপাই নিয়ে।
অন্তিম অভাৰত কলকাতাক জয়ৰ বাবে ৭ ৰানৰ প্ৰয়োজন আছিল। খ্ৰিষ্টিয়ানৰ প্ৰথমটো বলতে ছাকিব আল হাচানে ৪ কোবোৱাৰ পিছত ৩ টা বলত ৩ ৰান সংগ্ৰহ কৰি কলকাতাই জয় সাব্যস্ত কৰে।
খেলখনত অলৰাউণ্ড প্ৰদৰ্শনেৰে দলৰ জয়ত মুখ্য ভূমিকা লোৱা সুনীল নাৰাইণ মেচৰ শ্ৰেষ্ঠ খেলুৱৈ হিচাপে নিৰ্বাচিত হয়।
আজিৰ খেলখনত দুটা উইকেট দখল কৰি হৰ্ষল পেটেলে IPL ৰ ইতিহাসত এটা চিজনত সৰ্বাধিক উইকেট দখলকাৰী বলাৰ হিচাপে ডুৱাইন ব্ৰেভোক স্পৰ্শ কৰে। টুৰ্নামেণ্টত পেটেলে ৩২ টা উইকেট দখল কৰি ইতিমধ্যে পাৰ্পল কেপ লাভ কৰাটো প্ৰায় নিশ্চিত কৰিছে।
উল্লেখ্য যে অধিনায়ক হিচাপে এইখনেই অন্তিম IPL টুৰ্নামেণ্ট বুলি ইতিমধ্যে ঘোষণা কৰা বিৰাট কোহলীয়ে এই খেলখনত পৰাজয়ৰ লগে লগেই অধিনায়ক হিচাপে IPL ট্ৰফী বিহীন হৈ ৰয়।
বিজয়ী কলকাতা নাইট ৰাইডাৰ্ছে এতিয়া দ্বিতীয়খন কোৱালিফায়াৰত বুধবাৰে দিল্লী কেপিটেলছৰ বিৰুদ্ধে প্ৰতিদ্বন্দীতা আগবঢ়াব।
ইতিমধ্যে প্ৰথম কোৱালিফায়াৰত দিল্লীক পৰাস্ত কৰি প্ৰথমেই ফাইনেলত প্ৰৱেশ কৰিছে মহেন্দ্ৰ সিং ধোনী নেতৃত্বাধীন চেন্নাই চুপাৰ কিংছে।