সম্প্ৰতি এম টিভিযোগে প্ৰচাৰিত Splitsvilla 12ত ব্যস্ত হৈ থকা এসময়ৰ পৰ্ণ ষ্টাৰ তথা বৰ্তমান বলিউদৰ মোহময়ী অভিনেত্ৰী হিচাপে পৰিচিত ছানি লিয়নক অতি শীঘ্ৰে দেখা পাব কামসূত্ৰৰ আধাৰত নিৰ্মিত এটা ৱেব ছিৰিজত।
এটা সূত্ৰই প্ৰকাশ কৰা অনুসৰি বলিউদৰ জনপ্ৰিয় পৰিচালিকা একতা কাপুৰে ছানি লিয়নক লৈ এই ৱেব ছিৰিজটো নিৰ্মাণ কৰিব।
উল্লেখ্য যে ডিজিটেল মাধ্যমত নতুন নহয় ছানি লিয়ন। ইয়াৰ পূৰ্বে তেওঁ নিজৰ বায়’পিক ‘কৰেনজিৎ কৌৰ দ্যা অনট’ল্ড ষ্ট’ৰি অব ছানি লিয়ন’ত অভিনয় কৰিছিল।
উক্ত ৱেব ছিৰিজটো প্ৰদৰ্শিত হৈছিল Zee 5ত। ছিৰিজটোত কেনেদৰে এগৰাকী মধ্যবিত্ত শিখ পৰিয়ালৰ পৰা গৈ পৰ্ণ ষ্টাৰৰ লগতে বলিউদত খোজ পেলালে তাক দেখুওৱা হৈছিল।
মিদ দে’ত প্ৰকাশিত এক বাতৰি অনুসৰি, দীৰ্ঘদিনৰ পৰাই একতা কাপুৰে কামসূত্ৰক আধাৰ হিচাপে লৈ এটা ৱেব ছিৰিজ নিৰ্মাণৰ চিন্তা চৰ্চা কৰি আছিল, আৰু ইয়াত অভিনয়ৰ বাবে ছানি লিয়নৰ সৈতে যোগাযোগ কৰিছে।
ইফালে আন এটা সূত্ৰই প্ৰকাশ কৰা অনুসৰি ‘ৱেব ছিৰিজটো সম্পৰ্কত দীৰ্ঘদিনৰ পৰা একতা আৰু ছানিৰ মাজত কথা-বতৰা চলি আছে। ইতিমধ্যে শ্ব’টোৰ ৰূপৰেখা ছানিয়ে শুনিছে আৰু অভিনয় কৰিবলৈ মান্তি হৈছে’।
এই ৱেব ছিৰিজটোৰ বাবে ছানি লিয়ন উপযুক্ত অভিনেত্ৰী বুলিও মত ব্যক্ত কৰিছে একতা কাপুৰে।
উল্লেখ্য যে ইয়াৰ পূৰ্বে ২০১৪ত একতা কাপুৰৰ পৰিচালনাত নিৰ্মিত ‘ৰাগিনী এম এম এছ’ত ছানিয়ে অভিনয় কৰিছিল।
