উত্তৰ প্ৰদেশৰ ধৰ্মীয় নগৰী মথুৰাৰ এখন হোটেলত বলীউডৰ অভিনেত্ৰী ছানী লিয়নৰ উপস্থিতিত অনুষ্ঠিত হ’বলগীয়া নৱবৰ্ষৰ এক বিশেষ কাৰ্যসূচী বাতিল কৰা হৈছে। দৰ্শক আৰু বিভিন্ন ধৰ্মীয় সংগঠনৰ তীব্ৰ আপত্তিৰ পাছতে আয়োজকসকলে এই সিদ্ধান্ত গ্ৰহণ কৰিবলৈ বাধ্য হয়। প্ৰতিবাদকাৰীসকলৰ মতে, মথুৰাৰ দৰে এক পবিত্ৰ ধৰ্মীয় স্থানত এনে ধৰণৰ অনুষ্ঠানৰ আয়োজন কৰাটো ব্ৰজ ভূমিৰ আধ্যাত্মিক মৰ্যাদাৰ পৰিপন্থী।
২০২৬ চনৰ নৱবৰ্ষক আদৰাৰ উদ্দেশ্যে এখন বাৰত এই অনুষ্ঠানটোৰ পৰিকল্পনা কৰা হৈছিল। কিন্তু অনুষ্ঠানটোৰ কথা ঘোষণা কৰাৰ লগে লগে বিভিন্ন ধৰ্মীয় নেতা আৰু স্থানীয় লোকসকলে ইয়াৰ বিৰুদ্ধে সৰব হৈ পৰে। তেওঁলোকে যুক্তি দিয়ে যে মথুৰাৰ দৰে এখন ধৰ্মীয় আৰু সাংস্কৃতিক চহৰৰ পবিত্ৰতা কোনো কাৰণতে নষ্ট হ’বলৈ দিব নোৱাৰি। বিশেষকৈ ব্ৰজ ভূমিৰ পৰম্পৰা ৰক্ষাৰ বাবে এনে সাংস্কৃতিক অনুষ্ঠান অনুচিত বুলি তেওঁলোকে দাবী জনায়।
বিৰোধিতাৰ মাজতে শ্ৰী কৃষ্ণ জন্মভূমি সংঘৰ্ষ ন্যাসে সোমবাৰে জিলা দণ্ডাধীশলৈ এখন আনুষ্ঠানিক পত্ৰ প্ৰেৰণ কৰি অনুষ্ঠানটো বাতিল কৰাৰ বাবে অনুৰোধ জনায়। জনসাধাৰণৰ আৱেগ আৰু ধৰ্মীয় সংগঠনসমূহৰ ক্ৰমাগত হেঁচাৰ প্ৰতি লক্ষ্য ৰাখি শেষত আয়োজকসকলে কাৰ্যসূচীটো বাতিল কৰাৰ কথা ঘোষণা কৰে। ইয়াৰ জৰিয়তে স্থানীয় লোকৰ আৱেগক সন্মান জনোৱা হৈছে বুলিও জানিব পৰা গৈছে।
এই সন্দৰ্ভত শ্ৰীকৃষ্ণ জন্মভূমি গোচৰৰ মূল আবেদনকাৰী তথা ধৰ্মীয় নেতা দীনেশ ফালহাৰী ধৰ্মচাৰ্যই মত প্ৰকাশ কৰি কয় যে মথুৰা হৈছে ভগৱান শ্ৰীকৃষ্ণৰ ভূমি আৰু তপস্যাৰ স্থান। এই পবিত্ৰ স্থানতে ভগৱানে মহাৰাস কৰিছিল, সেয়েহে ইয়াত এনেধৰণৰ মনোৰঞ্জনধৰ্মী অনুষ্ঠান শোভা নাপায়। ধৰ্মীয় অনুভূতিৰ প্ৰতি গুৰুত্ব প্ৰদান কৰি অনুষ্ঠানটো বাতিল কৰাৰ বাবে তেওঁ প্ৰশাসনক ধন্যবাদ জ্ঞাপন কৰে।
আনহাতে, হিন্দু গোটৰ নেতা গিৰাজ সিঙেও এই সিদ্ধান্তক আদৰণি জনাই উত্তৰ প্ৰদেশ চৰকাৰক ধন্যবাদ জনাইছে। সংবাদ মাধ্যমৰ সৈতে হোৱা কথা-বতৰাত তেওঁ কয় যে ব্ৰজ ভূমিৰ জনসাধাৰণৰ আৱেগক গুৰুত্ব দি চৰকাৰে যি পদক্ষেপ গ্ৰহণ কৰিলে সেয়া প্ৰশংসনীয়।
