কৃষকৰ ন্যায্য দাবী বিবেচনা কৰিবলৈ কিয় সাজু নহয় কেন্দ্ৰ? কিয় কৃষকৰ অভিযোগ শুনিবলৈ চৰকাৰ সাজু বুলি কোৱা নাই? উচ্চতম ন্যায়ালয়ে বৃহস্পতিবাৰে কেন্দ্ৰীয় চৰকাৰলৈ এই প্ৰশ্ন উত্থাপন কৰে। শস্যৰ বাবে নূন্যতম সমৰ্থন মূল্য বা এম এছ পিৰ ওপৰত আইনী নিশ্চয়তা দাবী কৰা কৃষকৰ আন্দোলনৰ সৈতে জড়িত এটা গোচৰত উচ্চতম ন্যায়ালয়ে এই পৰ্যবেক্ষণ কৰে।
ন্যায়াধীশ সূৰ্য কান্ত আৰু উজ্জ্বল ভূঞাৰ বিচাৰপীঠে উচ্চতম ন্যায়ালয়ত কৃষক আন্দোলন সন্দৰ্ভত এখন নতুন আবেদনৰ শুনানিৰ ভিত্তিত কেন্দ্ৰক উত্তৰ দিবলৈ কৈছে। কৃষক নেতা জগজিৎ সিং দলেৱালৰ হৈ এই আৱেদন কৰা হৈছিল।
২০২১ চনত কৃষি আইন বাতিলৰ পিছত কৃষকক দিয়া প্ৰতিশ্ৰুতি কাৰ্যকৰী কৰাৰ দাবী উত্থাপন কৰা হৈছে আবেদনখনত। সেইবাবেই বৰ্তমান কৃষকসকলে বিভিন্ন দাবীৰে পঞ্জাৱ আৰু হাৰিয়ানাৰ সীমান্তত প্ৰতিবাদ সাব্যস্ত কৰিছে। কৃষক নেতা জগজিৎ সিং দলেৱালে ২৬ নৱেম্বৰৰ পৰা অনিৰ্দিষ্টকাললৈ অনশন কৰি আছে।
উচ্চতম ন্যায়ালয়ৰ বিচাৰপীঠে কেন্দ্ৰীয় চৰকাৰক উদ্দেশ্যি প্ৰশ্ন কৰে যে, ‘আপোনাৰ ক্লায়েণ্টে কিয় এটা বিবৃতি দিব নোৱাৰে যে তেওঁলোকে কৃষকৰ অভিযোগসমূহ বিবেচনা কৰিব আৰু তেওঁলোকৰ দাবীৰ ওপৰত আলোচনা কৰিব বিচাৰে?’
ইয়াৰ উত্তৰত ছলিচিটৰ জেনেৰেল তুষাৰ মেহতাই কয় যে চৰকাৰে প্ৰতিজন কৃষকৰ প্ৰতি চিন্তিত আৰু এই ক্ষেত্ৰত উপযুক্ত পদক্ষেপ গ্ৰহণ কৰিব।
আবেদনকাৰীৰ অধিবক্তা গুনিন্দৰ কৌৰ গিলে ইয়াৰ বিপৰীতে কয় যে ২০২১ চনতো চৰকাৰে প্ৰতিশ্ৰুতি দিছিল আৰু এই প্ৰতিশ্ৰুতিৰ ভিত্তিতেই কৃষকসকলে আন্দোলন প্ৰত্যাহাৰ কৰিছিল। একেটা বিষয়তে বাৰে বাৰে কমিটী গঠন কৰি কোনো সমাধান অহা নাই বুলিও তেওঁ লগতে অভিযোগ কৰে৷
উচ্চ ন্যায়ালয়ৰ অৱসৰপ্ৰাপ্ত ন্যায়াধীশৰ নেতৃত্বত এখন উচ্চ পৰ্যায়ৰ কমিটি গঠন কৰা হৈছে বুলি বিচাৰপীঠে জনাইছিল। এই কমিটীত কৃষি আৰু অৰ্থনীতিৰ বিশেষজ্ঞসকল অন্তৰ্ভুক্ত। কৃষকৰ সমস্যা আৰু দাবী সন্দৰ্ভত বিতংভাৱে আলোচনা কৰাটোৱেই হ’ব কমিটীৰ কাম।
অৱশ্যে বাস্তৱত এনেকুৱা হোৱা নাই বুলি অভিযোগ উত্থাপন হৈছে। সেইবাবেই আকৌ আন্দোলন হৈছে। আন্দোলনৰ মূল দাবী হৈছে এম এছ পিৰ আইনী নিশ্চয়তা আৰু কেন্দ্ৰীয় চৰকাৰৰ প্ৰতিশ্ৰুতি কাৰ্যকৰী কৰা।
বৃহস্পতিবাৰৰ শুনানিত কেন্দ্ৰ আৰু কমিটিক ১০ দিনৰ ভিতৰত তেওঁলোকৰ মতামত দাখিল কৰিবলৈ নিৰ্দেশ দিয়া হৈছে। আদালতে উল্লেখ কৰে যে আদালতত কৃষকৰ অভিযোগৰ ওপৰত পোনপটীয়াকৈ আলোচনা কৰাটো সম্ভৱ নহয়। ইয়াৰ বাবে কমিটীক কামত লগাবলৈ পৰামৰ্শ দিয়া হৈছে।
