কৰ্ণাটকৰ মুখ্যমন্ত্ৰী সিদ্দাৰমাইয়াৰ পত্নী বি এম পাৰ্বতীক চমন কৰাৰ নিৰ্দেশ খাৰিজ কৰিছিল কৰ্ণাটক উচ্চ ন্যায়ালয়ে। সেই ৰায়ৰ বিৰুদ্ধে বলবৎকাৰী সঞ্চালকালয় (ইডি)ৰ আবেদন খাৰিজ কৰিছে দেশৰ সৰ্বোচ্চ ন্যায়ালয়ে।
সোমবাৰে মুখ্য ন্যায়াধীশ বি আৰ গাভাইৰ নেতৃত্বত খণ্ড বিচাৰপীঠে কয় যে এনে ৰাজনৈতিক যুঁজ আদালতত নহয় নিৰ্বাচনত হ’ব লাগে। আদালতে লগতে প্ৰশ্ন কৰে – “এনে ৰাজনৈতিক যুঁজত ইডিক কিয় ব্যৱহাৰ কৰা হৈছে?”
ন্যায়াধীশ বি আৰ গাভাই আৰু ন্যায়াধীশ কে বিনোদ চন্দ্ৰনৰ বিচাৰপীঠে কঠোৰ ভাষাত কয় যে, “মহাৰাষ্ট্ৰত মোৰ কিছু অভিজ্ঞতা আছে। আমাক একো ক’বলৈ বাধ্য নকৰিব। নহ’লে আমি ইডি সন্দৰ্ভত অতি কঠোৰ মন্তব্য দিব লাগিব। ৰাজনৈতিক যুঁজ ভোটাৰৰ জৰিয়তে হয়, আপোনালোকক ব্যৱহাৰ কৰা হৈছে কিয়?”
যুক্তিৰ সময়ত ইডিৰ হৈ অতিৰিক্ত ছলিচিটৰ জেনেৰেল এছ ভি ৰাজুৱে কয়, “ঠিক আছে, আমি আবেদনখন প্ৰত্যাহাৰ কৰিম। অৱশ্যে আমি অনুৰোধ কৰিছো যে এইটোক যাতে দৃষ্টান্ত হিচাপে গণ্য কৰা নহয়।”
কিন্তু সেই যুক্তি নিটিকল। বিচাৰপীঠে কয় যে একক বিচাৰপীঠৰ ন্যায়াধীশৰ যুক্তিত কোনো ভুল বিচাৰি পোৱা নাই। আদালতে পৰ্যবেক্ষণ কৰে—“বিশেষ পৰিস্থিতিৰ প্ৰতি লক্ষ্য ৰাখি আবেদনখন খাৰিজ কৰা হৈছে। ধন্যবাদ এছ ভি ৰাজু। আপুনি আমাক কিছু কঠিন কথা ক’বলগীয়া হোৱাৰ পৰা সকাহ দিলে।”
দৰাচলতে গোচৰটো কি আছিল? এই গোচৰত মহীশূৰ নগৰ উন্নয়ন কৰ্তৃপক্ষ (মুডা)ৰ জৰিয়তে কৰ্ণাটকৰ মুখ্যমন্ত্ৰী সিদ্দাৰমাইয়াৰ পত্নী বি এম পাৰ্বতীৰ বিৰুদ্ধে দুৰ্নীতি আৰু অনিয়মৰ অভিযোগ উত্থাপন হৈছে। অভিযোগ অনুসৰি ২০০৪ চনত পাৰ্বতীৰ ভাতৃয়ে মাটি কিনি ভগ্নীক ‘উপহাৰ’ দিছিল। সেই মাটিখিনি ব্যক্তিগত মালিকানাধীন হ’লেও মুডাই ডেভেলপ কৰি দিছিল।
তেতিয়া পাৰ্বতীয়ে সেই মাটিৰ বিনিময়ত ক্ষতিপূৰণ বিচাৰে। অভিযোগ অনুসৰি তেওঁ অবৈধভাৱে অতিৰিক্ত ক্ষতিপূৰণ লাভ কৰিছিল, য’ত আৰু ১৪টা প্লট আছিল। পিছলৈ অৱশ্যে তেওঁ সেই মাটি প্ৰশাসনক ঘূৰাই দিয়ে।
এই অভিযোগৰ ভিত্তিত ইডিয়ে পাৰ্বতীক তলব কৰিছিল। একে সময়তে এই গোচৰৰ অভিযুক্ত নোহোৱা সত্ত্বেও কৰ্ণাটকৰ মন্ত্ৰী বাইৰাথী সুৰেশক ইডিয়ে জেৰাৰ বাবে চমন কৰে।
কিন্তু চলিত বৰ্ষৰ ৭ মাৰ্চত কৰ্ণাটক উচ্চ ন্যায়ালয়ৰ ন্যায়াধীশ এম নাগাপ্ৰসন্নই পাৰ্বতী আৰু বাইৰাথী সুৰেশ দুয়োৰে গোচৰৰ চমন আদেশ খাৰিজ কৰে। সেই ৰায়ৰ বিৰুদ্ধে উচ্চতম ন্যায়ালয়ৰ কাষ চাপিছিল ইডিয়ে। অৱশ্যে সেই আবেদনো সোমবাৰে খাৰিজ কৰা হয়।
