ভাৰতৰ উচ্চতম ন্যায়ালয়ে আজি যৌন অপৰাধৰ পৰা শিশু সুৰক্ষা (POCSO) আইনৰ অপব্যৱহাৰ সন্দৰ্ভত গুৰুত্বপূৰ্ণ মন্তব্য প্ৰদান কৰিছে। আদালতে মত প্ৰকাশ কৰিছে যে বৈবাহিক অশান্তিৰ লগতে কিশোৰ-কিশোৰীৰ মাজত সন্মতিসূচক যৌন সম্পৰ্কৰ ক্ষেত্ৰতো এই আইনৰ ব্যৱহাৰ কৰা হৈছে।
ন্যায়াধীশ বিভি নাগাৰত্না আৰু ন্যায়াধীশ আৰ মহাদেৱনৰ দ্বৈত বিচাৰপীঠে শুনানিৰ সময়ত উল্লেখ কৰে যে দেশৰ বহু কিশোৰ-যুৱতী এই আইনৰ বিধানসমূহৰ বিষয়ে অৱগত নহয়, সেয়েহে এই ক্ষেত্ৰত সজাগতা সৃষ্টি কৰাটো অতি প্ৰয়োজনীয়।
সংবাদ সংস্থা পিটিআইৰ প্ৰতিবেদন অনুসৰি, ন্যায়াধীশসকলে পোনপটীয়াকৈ পৰ্যবেক্ষণ কৰে যে কিশোৰ-কিশোৰীৰ মাজৰ সন্মতিসূচক সম্পৰ্কবোৰৰ ক্ষেত্ৰত পাছলৈ এই আইনৰ অপব্যৱহাৰ কৰা হৈছে। আদালতে যুৱক-যুৱতীসকলক এই আইনৰ আইনী প্ৰভাৱ আৰু বিধানসমূহৰ বিষয়ে সজাগ কৰিবলৈকো আহ্বান জনাইছে।
POCSO আইন সন্দৰ্ভত সজাগতা সৃষ্টিৰ বাবে অধিবক্তা আবাদ হৰ্ষদ পণ্ডাৰে এই জনস্বাৰ্থ জড়িত আবেদন(PIL) দাখিল কৰিছিল। আবাদৰ দাবী যে, ১৪ বছৰৰ তলৰ শিশুক বিনামূলীয়া শিক্ষা প্ৰদান কৰা সকলো শিক্ষানুষ্ঠানতে নাৰী আৰু শিশুৰ বিৰুদ্ধে হোৱা বিভিন্ন অপৰাধৰ বিষয়ে সজাগতাৰ পাঠ্যক্ৰম অন্তৰ্ভুক্ত কৰিব লাগে।
ইয়াৰ পূৰ্বে উচ্চতম ন্যায়ালয়ে এই সজাগতা অভিযানত সন্মতি জনাইছিল আৰু ইয়াৰ প্ৰস্তুতিৰ বাবে কেন্দ্ৰীয় শিক্ষা মন্ত্ৰালয়, তথ্য আৰু সম্প্ৰচাৰ মন্ত্ৰালয়, আৰু কেন্দ্ৰীয় চলচ্চিত্ৰ প্ৰমাণীকৰণ ব’ৰ্ড (CBFC) লৈ জাননী প্ৰেৰণ কৰিছিল।
মঙলবাৰৰ শুনানিৰ পিছত উচ্চতম ন্যায়ালয়ে এই গুৰুত্বপূৰ্ণ গোচৰৰ পৰৱৰ্তী শুনানিৰ তাৰিখ ২ ডিচেম্বৰলৈ স্থগিত ৰাখিছে।
