শেহতীয়াকৈ দিল্লীৰ পথৰ কুকুৰৰ সমস্যাক কেন্দ্ৰকৰি দেশ জুৰি চৰ্চা অব্যাহত আছে। দিল্লীৰ এই সমস্যাক সম্বোধন কৰি তৰা এটা গোচৰৰ উচ্চতম ন্যায়ালয়ত শুনানিৰ সময়ত কেন্দ্ৰ চৰকাৰে স্পষ্ট কৰিছে যে কোনেও কুকুৰক হত্যা কৰাৰ কথা কোৱা নাই। বৰঞ্চ ইহঁতক পৃথককৈ ৰখাৰ ব্যৱস্থা গ্ৰহণ কৰাৰ কথাহে কোৱা হৈছে। ছলিচিটৰ জেনেৰেল তুষাৰ মেহতাই আদালতত এই মন্তব্য কৰি কয় যে জীৱ-জন্তুৰ প্ৰতি কোনো ঘৃণা নাই, কিন্তু মানুহৰ সুৰক্ষাৰ বাবে পৃথকীকৰণ প্ৰয়োজনীয়। এই শুনানিত কেন্দ্ৰই দেশজুৰি কুকুৰে কামোৰাৰ ভয়াবহ পৰিসংখ্যা দাঙি ধৰে, য’ত প্ৰতি বছৰে ৩৭ লাখ ঘটনা সংঘটিত হয় বুলি উল্লেখ কৰা হয়।
বৃহস্পতিবাৰে ন্যায়াধীশ বিক্ৰম নাথ, সন্দীপ মেহতা আৰু এন অঞ্জৰিয়াৰ তিনিজনীয়া বিচাৰপীঠে শুনানিৰ গ্ৰহণৰ সময়ত তুষাৰ মেহতাই কয় যে প্ৰতিদিনে প্ৰায় ১০ হাজাৰ কুকুৰে কামোৰাৰ ঘটন সংঘটিত হয়, যি মানুহৰ স্বাস্থ্য আৰু সুৰক্ষাৰ বাবে চিন্তাৰ বিষয় হৈ পৰিছে। তেওঁ আৰু কয়, “কোনোৱে পথৰ কুকুৰক হত্যা কৰাৰ কথা কোৱা নাই। আমাৰ কোনোৱেই জীৱ-জন্তুক ঘৃণা নকৰে। কিন্তু পৃথকে ৰখাটো প্ৰয়োজনীয়।” অৱশ্যে পশুপ্ৰেমীসকলে চিন্তা প্ৰকাশ কৰিছে যে স্থানীয় অঞ্চলৰ পৰা ধৰা পৰা কুকুৰসমূহক ক’ত ৰখা হ’ব? আশ্ৰয় শিবিৰসমূহ এতিয়াও সাজু হোৱা নাই বুলি তেওঁলোকে প্ৰশ্ন উত্থাপন কৰিছে।
আদালতে এই গোচৰত দুজন ন্যায়াধীশৰ বিচাৰপীঠৰ নিৰ্দেশত আংশিক স্থগিতাদেশ বিচাৰিছে যদিও তিনিজনীয়া বিচাৰপীঠে আজি এই শুনানি স্থগিত ৰাখে। লগতে আদালতে কয় যে আদালতৰ নিৰ্দেশক লৈ প্ৰশ্ন উত্থাপন কৰাসকলেও দায়িত্ব ল’ব লাগে। বিশ্লেষকসকলে আশা কৰিছে যে এই গোচৰে ভৱিষ্যতে এই সমস্যা সমাধানৰ বাবে নতুন নিৰ্দেশনা প্ৰদান কৰিব।
