দিল্লী-এনচিআৰত বিপথগামী কুকুৰৰ সংখ্যা আৰু জলাতংক ৰোগত মৃত্যুৰ সংখ্যা বৃদ্ধি পোৱাৰ ফলত উদ্বেগজনক পৰিস্থিতিৰ সৃষ্টি হৈছে। উচ্চতম ন্যায়ালয়ে ইয়াক ‘অতি গুৰুতৰ’ সমস্যা বুলি অভিহিত কৰি ৰাজধানী আৰু আশে-পাশে থকা অঞ্চলৰ ৰাজ্য চৰকাৰসমূহক আঠ সপ্তাহৰ ভিতৰত সকলো কুকুৰক আশ্ৰয় শিবিৰলৈ লৈ গৈ বন্ধ্যাকৰণ আৰু টিকাকৰণ কৰিবলৈ নিৰ্দেশ দিছে।
কেৱল ২০২৪ চনত সমগ্ৰ দেশতে ৩৭ লাখতকৈ অধিক কুকুৰে কামোৰাৰ ঘটনা নথিভুক্ত কৰা হৈছে, ইয়াৰে প্ৰায় ৫১৯ লাখ ভুক্তভোগী শিশু (১৫ বছৰৰ তলৰ)। দিল্লীত প্ৰতিদিনে গড়ে ২০০০ কুকুৰে কামোৰাৰ খবৰ পোৱা যায়। জানুৱাৰীৰ পৰা জুনলৈকে ৩৫,১৯৮টা পশুৰ কামোৰ ৰেকৰ্ড কৰা হৈছে।
জলাতংক ৰোগত মৃত্যু হোৱা লোকৰ সংখ্যাও চিন্তাৰ কাৰণ হৈ পৰিছে। ২০২৪ চনত দিল্লীত সন্দেহজনকভাৱে ৫৪ জন লোকৰ মৃত্যু হৈছিল, যিটো ২০২৩ চনৰ তুলনাত অধিক। বিশ্ব স্বাস্থ্য সংস্থাৰ তথ্য অনুসৰি বিশ্বত জলাতংক ৰোগত মৃত্যু হোৱা লোকৰ ৩৬% ভাৰতত ঘটে।
পশু জন্ম নিয়ন্ত্ৰণ (এবিচি) নিয়ম ২০২৩ অনুসৰি বন্ধ্যাকৰণ আৰু প্ৰতিষেধক পৰিকল্পনা কৰা সত্ত্বেও দিল্লীৰ প্ৰায় ১০ লাখ অঘৰী কুকুৰৰ আধাতকৈও কম কুকুৰক বন্ধ্যাকৰণ কৰা হৈছে। ফলত জনসংখ্যা নিয়ন্ত্ৰণৰ ক্ষেত্ৰত আশা কৰা ধৰণৰ ফলাফল লাভ কৰিব পৰা নাই। ২০২৩ চনৰ তুলনাত দিল্লীত কুকুৰে কামোৰাৰ সংখ্যা ১৪৩% বৃদ্ধি পাইছে।
আঠ সপ্তাহৰ ভিতৰত দিল্লী-এনচিআৰত থকা সকলো বিপথগামী কুকুৰক আশ্ৰয় শিবিৰলৈ স্থানান্তৰ কৰা হ’ব।
উচ্চতম ন্যায়ালয়ৰ নিৰ্দেশ
বন্ধ্যাকৰণ আৰু টিকাকৰণৰ পিছত ৰাজপথত এৰি নিদিব কুকুৰ।
এসপ্তাহৰ ভিতৰত কুকুৰে কামোৰাৰ অভিযোগৰ বাবে আৰম্ভ হ’ব হেল্পলাইন।
আশ্ৰয় প্ৰক্ৰিয়াত বাধাৰ সৃষ্টি কৰাৰ বাবে আদালত অৱমাননাৰ ব্যৱস্থা।
ভেকচিনৰ মজুত আৰু চিকিৎসাৰ তথ্য ৰাজহুৱা কৰা।
৫ হাজাৰ কুকুৰৰ ক্ষমতা থকা আশ্ৰয় শিবিৰ আৰু প্ৰশিক্ষিত কৰ্মচাৰী নিযুক্তি দিয়া।
উচ্চতম ন্যায়ালয়ৰ এই পদক্ষেপে সমাজত মিশ্ৰিত প্ৰতিক্ৰিয়া লাভ কৰিছে। পশুপ্ৰেমীসকলে উদ্বেগ প্ৰকাশ কৰিছে যদিও বহুতে অনুভৱ কৰে যে মানৱ সুৰক্ষা আৰু জনস্বাস্থ্য ৰক্ষাৰ বাবে এই ব্যৱস্থা অতি প্ৰয়োজনীয়।
