কৰ্মৰত শিক্ষকসকলে টেট (Teacher Eligibility Test) উত্তীৰ্ণ হ’বই লাগিব। উচ্চতম ন্যায়ালয়ে পুনৰ এবাৰ স্পষ্ট কৰি দিছে যে টেট উত্তীৰ্ণ বাধ্যতামূলক। একে সময়তে পুনৰীক্ষণ আবেদনৰ পৰিপ্ৰেক্ষিতত দেশৰ শীৰ্ষ ন্যায়ালয়ে শিক্ষক নিযুক্তিৰ বাবে বাধ্যতামূলক টেট অৰ্হতা লাভৰ সময়সীমা আৰু এবছৰ বৃদ্ধি কৰিছে। ফলত য’ত পূৰ্বে টেট উত্তীৰ্ণৰ সময়সীমা আছিল ২০২৭ চনৰ ৩১ আগষ্ট, সেয়া এতিয়া ২০২৮ চনৰ ৩১ আগষ্টলৈ বৃদ্ধি কৰা হৈছে।
শুকুৰবাৰে ন্যায়াধীশ দীপাংকৰ দত্তৰ নেতৃত্বত গঠিত বিভাগীয় বিচাৰপীঠে একাধিক পুনৰীক্ষণ আবেদনৰ শুনানি গ্ৰহণ কৰি এই ৰায়দান কৰে। দেশৰ কেইবাখনো ৰাজ্য আৰু কেইবাটাও শিক্ষক সংগঠনে উচ্চতম ন্যায়ালয়ৰ পূৰ্বৰ ৰায়ৰ পুনৰীক্ষণ বিচাৰি শীৰ্ষ ন্যায়ালয়ৰ কাষ চাপিছিল।
বৰ্তমান সময়ত কৰ্মৰত বহু শিক্ষকে এতিয়াও টেটৰ বাবে যোগ্যতা অৰ্জন কৰিব পৰা নাই আৰু তেওঁলোকক অধিক সময় দিয়াৰ প্ৰয়োজন আছে বুলি আদালতে জানিবলৈ দিয়ে। সেইবাবেই এবছৰৰ অতিৰিক্ত ৰেহাই দিয়া হৈছে।
এই ৰায়দানৰ জৰিয়তে বিশেষভাৱে সেইসকল শিক্ষক উপকৃত হ’ব যিসকল শিক্ষকে দীৰ্ঘদিন ধৰি সেৱাত আছিল যদিও নিৰ্ধাৰিত সময়ৰ ভিতৰত টেট উত্তীৰ্ণ হ’ব নোৱাৰিলে। বিশেষজ্ঞৰ এটা অংশৰ মতে, বিভিন্ন ৰাজ্যত প্ৰশিক্ষণ, পৰীক্ষাৰ ব্যৱস্থা আৰু প্ৰশাসনিক জটিলতাৰ বাবে বহু শিক্ষকে সময়মতে টেট সম্পূৰ্ণ কৰিব নোৱাৰিলে। ফলত উচ্চতম ন্যায়ালয়ৰ এই সিদ্ধান্তই তেওঁলোকক যথেষ্ট সকাহ দিব।
মন কৰিবলগীয়া যে পাঠদানৰ বাবে নূন্যতম অৰ্হতা হিচাপে টেট বাধ্যতামূলক। এন চি টি ইৰ নিৰ্দেশনা অনুসৰি প্ৰাথমিক আৰু উচ্চ প্ৰাথমিক পৰ্যায়ত পাঠদানৰ বাবে এই অৰ্হতা অতি প্ৰয়োজনীয়। কিন্তু বহু ৰাজ্যত পূর্বে নিযুক্তি পোৱা শিক্ষকৰ সময়সীমা সন্দর্ভত বিতর্ক চলিছিল৷ সেই প্ৰেক্ষাপটত উচ্চতম ন্যায়ালয়ত কেইবাখনো পুনৰীক্ষণ আবেদন দাখিল কৰা হয়।
আদালতৰ নতুন নিৰ্দেশ অনুসৰি ২০২৮ চনৰ ৩১ আগষ্টৰ ভিতৰত সংশ্লিষ্ট শিক্ষকসকলে টেট অৰ্হতা লাভ কৰিব লাগিব। নিৰ্দিষ্ট সময়ৰ পিছতো যদি কোনোবাই যোগ্যতা অৰ্জন কৰিব নোৱাৰে তেন্তে তেওঁলোকৰ নিযুক্তি সন্দৰ্ভত পৰৱৰ্তী সিদ্ধান্ত ল’ব পাৰে প্ৰশাসনে।
২০২৫ চনৰ ১ ছেপ্টেম্বৰত শিক্ষক নিযুক্তিৰ সৈতে জড়িত এটা গোচৰত উচ্চতম ন্যায়ালয়ে স্পষ্ট কৰি দিছিল যে কৰ্মৰত শিক্ষকৰ বাবে টেট উত্তীৰ্ণ কৰাটো বাধ্যতামূলক। সেই নিৰ্দেশ অনুসৰি শিক্ষকসকলক টেট উত্তীৰ্ণ হ’বলৈ দুবছৰৰ সময় দিয়া হৈছিল। এই নিৰ্দেশত আদালতে কয় যে নিৰ্দিষ্ট সময়ৰ ভিতৰত টেট উত্তীৰ্ণ নহ’লে তেওঁলোকে চাকৰি এৰিব লাগিব বা বাধ্যতামূলক অৱসৰ ল’ব লাগিব। তেনে ক্ষেত্ৰত শিক্ষকসকলে অৱসৰৰ সুবিধাহে পাব।
