অসমত নাগৰিকপঞ্জীৰ তালিকা প্ৰস্তুতৰ কামত নিয়োজিত বিষয়াসকলে অহা ৩১ তাৰিখে প্ৰকাশ পাবলগীয়া চূড়ান্ত তালিকাৰ সময়সীমাক অধিক গুৰুত্ব দি খৰধৰ কৰাৰ পৰিৱৰ্তে সম্পূৰ্ণ শুদ্ধভাৱে বিষয়টো পৰীক্ষণ কৰাৰ বাবে আজি উচ্চতম ন্যায়ালয়ে নিৰ্দেশ দিয়ে।
‘’সংবাদ মাধ্যমত কিছুমান উদ্বেগজনক বাতৰি প্ৰকাশ পাইছে। সংবাদম মাধ্যম সদায় ভুল নহয়। বাতৰিত প্ৰকাশ পাইছে কেনেকৈ অভিযোগসমূহ মোকাবিলা কৰা হৈছে। আপত্তিৰ শুনানি এক সঠিক ধৰণে কৰিব লাগিব,’’- উচ্চতম ন্যায়ালয়ৰ মুখ্য ন্যায়াধীশ ৰঞ্জন গগৈৰ নেতৃত্বত গঠিত এখন বিচাৰপীঠে আজি এইদৰে কয়।
উল্লেখযোগ্য যে সেনাবাহিনীত ৩০ বছৰ ধৰি চাকৰি কৰা এগৰাকী অৱসৰপ্ৰাপ্ত সৈনিকক ৰাজ্যৰ আৰক্ষীয়ে বিদেশী বুলি ঘোষণা কৰা বাতৰি প্ৰকাশ হোৱাৰ এদিন পাছতে উচ্চতম ন্যায়ালয়ে এন আৰ চিত নিয়োজিত বিষয়াসকলক এইদৰে সকীয়াই দিছে।
সৰ্বোচ্চ ন্যায়ালয়খনে কয় যে এনআৰচিৰ প্ৰস্তুতকৰণত নথি পৰীক্ষণৰ কামত নিয়োজিত বিষয়াসকল ‘নিকা’ হোৱা উচিত আৰু ‘স্বচ্ছ শুনানি হ্ৰস্ব কৰা’ উচিত নহয়।
মুখ্য ন্যায়াধীশ ৰঞ্জন গগৈয়ে কয়,’’ চূড়ান্ত এন আৰ চি তালিকা প্ৰকাশৰ বাবে সময়সীমা (৩১ জুলাইলৈ)লৈ দিন চমু চাপি অহাৰ মানে এইটো নহয় যে সমগ্ৰ প্ৰক্ৰিয়াটো কাটি হ্ৰাস কৰা হ’ব। সংবাদ মাধ্যমৰ বাতৰি যদি বিশ্বাস কৰা হয়, প্ৰক্ৰিয়াটো সঠিকভাৱে কৰা হোৱা নাই।‘’
উল্লেখযোগ্য যে সেনাবাহিনীত ২০১৭ চনলৈকে এগৰাকী চুবেদাৰ হিচাপে সেৱা আগবঢ়োৱা মহম্মদ সোনাউল্লাহ (৫৩)ক বুধবাৰে গ্ৰেপ্তাৰ কৰি ডিটেনশ্যন কেন্দ্ৰ লৈ প্ৰেৰণ কৰা হয়। তেওঁ মণিপুৰ তথা জম্মু আৰু কাশ্মীৰত সন্ত্ৰাসবাদীৰ বিৰুদ্ধে যুঁজ দিছিল।
আনহাতে, ২০১৭ চনত অৱসৰ গ্ৰহণ কৰাৰ পাছত তেওঁ বিশেষভাৱে অবৈধ অনুপ্ৰৱেশকাৰী চিনাক্তকৰণৰ বিষয় চোৱা চিতা কৰা অসম সীমান্ত আৰক্ষীৰ এগৰাকী উপ পৰিদৰ্শক হিচাপে কাম কৰি আছিল। তাৎপৰ্যপূৰ্ণভাৱে, সেই বিভাগটোৱে এতিয়া তেওঁক এগৰাকী অবৈধ নাগৰিক হিচাপে অভিযুক্ত কৰিছে।