উচ্চতম ন্যায়ালয়ৰ ন্যায়াধীশসকল যেন বহু দূৰৈৰ গ্ৰহৰ লোক। উচ্চতম ন্যায়ালয়ৰ ৱেবছাইটত যি তথ্য দিয়া আছে তাৰ বাহিৰে সাধাৰণ মানুহৰ বাবে তেওঁলোকৰ বিষয়ে প্ৰায় কোনো তথ্য বিচাৰি পোৱাটো সম্ভৱ নহয়।
কিন্তু এইবাৰ তেওঁলোকৰ কিমান সম্পত্তি আছে সেয়া সাধাৰণ জনতাই জানিব পাৰিব। বৃহস্পতিবাৰে (৩ এপ্ৰিল) উচ্চতম ন্যায়ালয়ৰ ন্যায়াধীশসকলে সৰ্বসন্মতিক্ৰমে মুখ্য ন্যায়াধীশ সঞ্জীৱ খান্নাৰ ওচৰত নিজৰ সম্পত্তি ঘোষণা কৰিবলৈ সন্মত হয়।
তেওঁলোকৰ ঘোষিত সম্পত্তিৰ তথ্য উচ্চতম ন্যায়ালয়ৰ ৱেবছাইটত আপলোড কৰা হ’ব। গতিকে এতিয়াৰ পৰা মাত্ৰ এটা ক্লিকতে গম পোৱা যাব উচ্চতম ন্যায়ালয়ৰ এগৰাকী ন্যায়াধীশৰ কিমান সম্পত্তিৰ গৰাকী।
ন্যায়াধীশ ভাৰ্মাৰ বিৰুদ্ধে হিচাপহীন ধনৰ অভিযোগ উত্থাপন হোৱাৰ কেইদিন পিছতে উচ্চতম ন্যায়ালয়ৰ ন্যায়াধীশসকলে এই সিদ্ধান্ত গ্ৰহণ কৰে। খবৰ অনুসৰি ন্যায়পালিকাত স্বচ্ছতা বজাই ৰাখিবলৈ সম্পত্তি সম্পৰ্কীয় তথ্য প্ৰকাশৰ সিদ্ধান্ত লোৱা হৈছে।
১৪ মাৰ্চৰ নিশা দিল্লী উচ্চ ন্যায়ালয়ৰ ন্যায়াধীশ যশৱন্ত ভাৰ্মাৰ বাসগৃহ চৌহদত অৱস্থিত এটা বহিৰ্গৃহত অগ্নিকাণ্ড সংঘটিত হয়। অভিযোগ অনুসৰি অগ্নিনিৰ্বাপক বাহিনীয়ে তাৰ পৰা জ্বলি যোৱা নগদ ধনৰ বাণ্ডিল উদ্ধাৰ কৰে। ইয়াৰ পিছতে আৰক্ষীক খবৰ দিয়া হয়। উচচতম ন্যায়ালয়ে ঘটনা সন্দৰ্ভত আভ্যন্তৰীণ তদন্তৰ নিৰ্দেশ দিছে। ন্যায়াধীশ ভাৰ্মাক বদলি কৰা হৈছে এলাহাবাদ উচ্চ ন্যায়ালয়লৈ।
নগদ ধন উদ্ধাৰৰ ফলত ৰাষ্ট্ৰীয় ন্যায়িক নিযুক্তি আয়োগ আইন সন্দৰ্ভতো আলোচনা হৈছে। ইয়াৰ পূৰ্বে উচ্চতম ন্যায়ালয়ে এই আইনখনক অসাংবিধানিক বুলি বাতিল কৰিছিল। কিন্তু এই আইনখন সংসদৰ দুয়োটা সদনত প্ৰায় সৰ্বসন্মতিক্ৰমে গৃহীত হয়।
ন্যায়াধীশ ভাৰ্মা কাণ্ডৰ কথা জানিব পৰাৰ পাছত ৰাজ্যসভাৰ অধ্যক্ষ তথা উপ-ৰাষ্ট্ৰপতি জগদীপ ধনখৰে সংসদত এই আইনখনৰ বিষয়টো উত্থাপন কৰে। উপ-ৰাষ্ট্ৰপতিগৰাকীয়ে কয় যে এই আইনখন কাৰ্যকৰী হোৱা হ’লে হয়তো আমি এনে সমস্যাৰ সন্মুখীন নহ’লোহেঁতেন।
