মুখ্য ন্যায়াধীশ ৰঞ্জন গগৈৰ বিৰুদ্ধে উত্থাপিত যৌন নিৰ্যাতনৰ অভিযোগ খাৰিজ কৰিলে উচ্চতম ন্যায়ালয়ে। উচ্চতম ন্যায়ালয়ে ন্যায়াধীশ এছ এ ববদেৰ নেতৃত্বত গঠন কৰি দিয়া তিনিজনীয়া আভ্যন্তৰীণ কমিটিয়ে আজি মুখ্য ন্যায়াধীশ গগৈৰ বিৰুদ্ধে থকা অভিযোগ খাৰিজ কৰে।
উচ্চতম ন্যায়ালয়ে এক বিজ্ঞপ্তিৰ জৰিয়তে ৰঞ্জন গগৈৰ বিৰুদ্ধে উত্থাপিত যৌন অভিযোগৰ গোচৰ খাৰিজ কৰাৰ কথা জনায়।অৱশ্যে বিজ্ঞপ্তিটোত আভ্যন্তৰীণ প্ৰতিবেদন ৰাজহুৱা কৰিবলৈ দায়বদ্ধ নহয় বুলি উল্লেখ কৰা হয়।
এই সন্দৰ্ভত আভ্যন্তৰীণ তদন্ত কমিটিয়ে মুখ্য ন্যায়াধীশগৰাকীৰ বিৰুদ্ধে কোনো উপযুক্ত প্ৰমাণ লাভ নকৰা বাবেই অভিযোগ খাৰিজ কৰা বুলি উল্লেখ কৰিছে।
উল্লেখ্য যে উচ্চতম ন্যায়ালয়ৰ এগৰাকী প্ৰাক্তন মহিলা কৰ্মচাৰীয়ে যোৱা ১৯ এপ্ৰিলত মুখ্য ন্যায়াধীশৰ বিৰুদ্ধে উত্থাপন কৰিছিল যৌন নিৰ্যাতনৰ অভিযোগ। আৰু এই অভিযোগৰ পাছতে উচ্চতম ন্যায়ালয়ে সমগ্ৰ ঘটনাৰ তদন্তৰ বাবে তিনিজন ন্যায়াধীশক লৈ এখন তদন্ত কমিটি গঠন কৰিছিল।
