কেন্দ্ৰীয় তদন্তকাৰী সংস্থা বলবৎকাৰী সঞ্চালকালয় (ইডি)ৰ তদন্ত প্ৰক্ৰিয়াৰ ওপৰত উচ্চতম ন্যায়ালয়ে পুনৰ প্ৰশ্ন উত্থাপন কৰিছে। কোনো সংযোগ বা প্ৰমাণৰ ভিত্তি নোহোৱাকৈ কাৰোবাৰ বিৰুদ্ধে অভিযোগ আৰোপ কৰাটো ইডিৰ স্বভাৱ হৈ পৰিছে বুলি মন্তব্য কৰিছে ন্যায়ালয়ে। ছত্তীশগড়ৰ আবকাৰী দুৰ্নীতিৰ গোচৰত এজন অভিযুক্তৰ জামিন আবেদনৰ শুনানি গ্ৰহণ কৰি ন্যায়াধীশ অভয় এছ অকা আৰু উজ্জ্বল ভূঞাৰ বিচাৰপীঠে এই মন্তব্য কৰে। ন্যায়াধীশ অকাই উল্লেখ কৰে যে ইডিৰ গোচৰসমূহত তদন্তকাৰী সংস্থাই অভিযোগৰ সমৰ্থনত পৰ্যাপ্ত প্ৰমাণ দাখিল কৰিব নোৱাৰাটো এটা নিয়মিত পৰিণত হৈছে।
প্ৰকাশিত তথ্য অনুসৰি ইডিয়ে অভিযোগ কৰিছিল যে এই গোচৰৰ অভিযুক্তই বিভিন্ন অপৰাধমূলক উপায়েৰে ৪০ কোটি টকা উপাৰ্জন কৰিছিল। কিন্তু উচ্চতম ন্যায়ালয়ে উল্লেখ কৰিছে যে এই ধন কেনেকৈ উপাৰ্জন হৈছিল তাৰ বিশদ তথ্য ইডিয়ে দিব নোৱাৰিলে। লগতে, অভিযুক্তৰ সৈতে কোনো সংগঠনৰ সম্পৰ্কৰ প্ৰমাণো তদন্তকাৰী সংস্থাই আদালতত দাখিল কৰিব নোৱাৰিলে। ন্যায়াধীশ অকাই ইডিৰ অধিবক্তাক স্পষ্টভাৱে কয় যে, “আপুনি কিবা এটা প্ৰমাণ দেখুৱাব লাগিব!” তাৰ পিছত ইডিৰ অধিবক্তাই বিষয়টোৰ সবিশেষ তথ্য দাখিলৰ বাবে আদালতৰ পৰা অতিৰিক্ত সময় বিচাৰিছিল। আদালতে এই গোচৰত অভিযুক্তৰ কোনো কোম্পানীৰ সৈতে সম্পৰ্ক আছে নে নাই তাৰো প্ৰমাণ বিচাৰিছিল।
ইডিৰ তদন্ত প্ৰক্ৰিয়াৰ ওপৰত প্ৰশ্ন উত্থাপিত হোৱা এয়াই প্ৰথম নহয়। পূৰ্বেও বিভিন্ন গোচৰত সংস্থাটোৰ ভূমিকাৰ ওপৰত আদালতত সমালোচনা হৈছে। উদাহৰণস্বৰূপ, পশ্চিম বংগৰ নিযুক্তি দুৰ্নীতিৰ গোচৰত প্ৰাক্তন শিক্ষামন্ত্ৰী পাৰ্থ চেটাৰ্জীৰ জামিন শুনানিৰ সময়ত ন্যায়াধীশ সূৰ্য্য কান্ত আৰু ভূঞাৰ বিচাৰপীঠে ইডিক সুধিছিল যে তেওঁলোকৰ অভিযোগত কিমানজনক দোষী সাব্যস্ত কৰা হৈছে।
ন্যায়ালয়ে উল্লেখ কৰিছে যে ইডিৰ দোষী সাব্যস্তৰ হাৰ অতি কম, যি তেওঁলোকৰ তদন্তৰ গুণগত মানৰ ওপৰত প্ৰশ্ন উত্থাপন কৰে। দেশৰ বিভিন্ন আদালতত ইডিৰ তদন্তৰ পদ্ধতি আৰু নিৰ্ভৰযোগ্যতাৰ ওপৰত বাৰে বাৰে প্ৰশ্ন উত্থাপন হৈ আহিছে, যিয়ে সংস্থাটোৰ কাৰ্যপ্ৰণালীৰ বিশ্বাসযোগ্যতাৰ বিষয়টোক আলোকপাত কৰিছে।
